ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
អតីតសិស្សនិទ្ទេសA៣រូប ប្រាប់ពីការត្រៀមខ្លួនមុន និងក្នុងពេលប្រឡង
14, Aug 2016 ,
9:19 pm
រូបភាព
×
ដោយ:
ញឹក ស្រីល័ក្ខ (Nhek Sreyleak)
ការប្រឡង បាក់ឌុបសម្រាប់ឆ្នាំសិក្សា២០១៥-២០១៦ នឹងឈានមកដល់នៅសប្តាហ៍ក្រោយ។ នៅមុនការប្រឡងមួយសប្តាហ៍នេះ អតីតសិស្ស៣រូប ដែលទទួលបាននិទ្ទេសA នៅក្នុងឆ្នាំសិក្សា ២០១៣-២០១៤ ជាឆ្នាំដែលក្រសួងរឹតបន្តឹង និងកែទម្រង់វិស័យអប់រំលើកដំបូង បានបង្ហាញវិធីសាស្ត្រត្រៀមខ្លួន មុនពេលប្រឡង និងក្នុងពេលប្រឡង រួមនឹងបទពិសោធន៍មួយចំនួន តាមរយៈសារព័ត៌ថ្មីៗ ទៅដល់បេក្ខជនប្រឡងបាក់ឌុបឆ្នាំនេះ។
នៅសល់តែមួយសប្តាហ៍ទៀតប៉ុណ្ណោះ ការប្រឡងបាក់ឌុបសម្រាប់ឆ្នាំទី៣ នៃសម័យកំណែទម្រង់ការអប់រំ នឹងចាប់ផ្តើម។ មុនការប្រឡងមកដល់ អតីតសិស្សនិទ្ទេសA ក្នុងឆ្នាំសិក្សា២០១៣-២០១៤ ដែលក្រសួងរឹតបន្តឹងការប្រឡងបាក់ឌុបលើកដំបូងនោះ បានប្រាប់ពីគន្លឹះ និងការរៀបចំខ្លួន រួមនឹងបទពិសោធន៍មួយចំនួនទៅដល់បេក្ខជនជាង៩ម៉ឺននាក់ ដែលត្រូវចូលរួមប្រឡងសម្រាប់ឆ្នាំនេះ។
យុវជន វណ្ណ លីដា ដែលបានពិន្ទុ ៩៩,៩៩៩ បានប្រាប់សារព័ត៌មានថ្មីៗថា នៅមុនពេលប្រឡង រូបគេមិនសូវសម្រុករៀនទេ គ្រាន់តែរំលឹកមេរៀនចាស់ៗ និងទន្ទេញមេរៀនបន្តិចបន្តួចប៉ុណ្ណោះ។ អតីតសិស្សវិទ្យាល័យ១០ មករា ១៩៧៩ ខេត្តសៀមរាប បញ្ជាក់ថា ធ្វើដូចនេះទើបខួរក្បាលបានសម្រាកខ្លះ។ វណ្ណ លីដា ក៏បានប្រាប់ពីការត្រៀមខ្លួន ដើម្បីទៅប្រឡងដែរ។ អ្នកខេត្តសៀមរាបរូបនេះ បានបញ្ជាក់យ៉ាងដូច្នេះ៖«មុនពេលប្រឡង ត្រូវត្រៀមសម្ភារសម្រាប់ប្រឡង ឲ្យបានគ្រប់មុខជៀសវាងការភ្លេច ជាពិសេសកាតសិស្ស។ ចំណែកពេលប្រឡង ដើម្បីកុំភ័យ ឬតានតឹង ត្រូវដកដង្ហើមវែងៗ ប្រមូលអារម្មណ៍ឲ្យល្អ ដើម្បីប្រឡងដោយរលូន»។ វណ្ណ លីដា ក៏បានសង្កត់ធ្ងន់ដែរថា កត្តាសុខភាពក៏ជារឿងសំខាន់ដែរ ដូច្នេះត្រូវថែរក្សាសុខភាពឲ្យល្អ មិនត្រូវញ៉ាំអាហារផ្ដេសផ្ដាស ដែលបង្កឲ្យរាករូស ឬបញ្ហាផ្សេងៗ កើតឡើងក្នុងពេលប្រឡង។
ចំពោះ យុវជន រ៉េន សុខពេជ្រ អតីតសិស្សនិទ្ទេសA លំដាប់ពិន្ទុ៩៩,៩៩១ មកពីខេត្តកណ្ដាលវិញ ក៏បានប្រាប់ឲ្យបេក្ខជន ត្រូវប្រមូលអារម្មណ៍ឲ្យល្អក្នុងពេលប្រឡងដែរ។ សុខពេជ្រ បញ្ជាក់ថា ការភ័យព្រួយ មិនបានជួយអ្វីនោះទេ មានតែធ្វើឲ្យចុះខ្សោយ ប៉ះពាល់ដល់ប្រឡងប៉ុណ្ណោះ។ សម្រាប់រយៈពេលមួយសប្តាហ៍មុនការប្រឡងនេះវិញ យុវជន រ៉េន សុខពេជ្រ បានបញ្ជាក់យ៉ាងដូច្នេះ ថាវាជាពេលវេលាដែលសិស្ស គួរតែឈប់ទៅរៀនបន្ថែមម៉ោង តែត្រូវរៀននៅផ្ទះ ដើម្បីរក្សាសុវត្ថិភាពផ្ទាល់ខ្លួនផង និងថែរក្សាសុខភាពផង។ សុខពេជ្រ បន្តទៀតថានៅពេលប្រឡង បេក្ខជនត្រូវយកចិត្តទុកដាក់ដោះស្រាយលំហាត់ឲ្យបានហ្មត់ចត់ និងត្រូវផ្ទៀងផ្ទាត់ឲ្យច្បាស់់ មុននឹងទៅដោះស្រាយលំហាត់ផ្សេងទៀត។
កញ្ញា អ៊ិត ស្រីពៅ អតីតសិស្សនិទ្ទេសA នៅវិទ្យាល័យសម្ដេចសង្ឃ ជួន ណាត ក្នុងខេត្តកំពង់ចាម ក៏បានប្រាប់ពីការត្រៀមខ្លួន មុនពេលប្រឡង និងក្នុងពេលប្រឡងដែរ។ ស្រីពៅ បានបញ្ជាក់ថា ការរៀនត្រៀមប្រឡង ត្រូវឧស្សាហ៍ធ្វើលំហាត់ឲ្យបានច្រើន ស្រាវជ្រាវលំហាត់ចាស់ៗនិងថ្មីៗថែតទៀត។ «សម្រាប់ពេលជិតប្រឡង ត្រូវតាំងចិត្តធម្មតា មិនភ័យខ្លាច បើមានអារម្មណ៍ភ័យខ្លាច មើលមេរៀនមិនចូលទេ»។ នេះជាការបន្ថែមរបស់ សិស្សនិទ្ទេសA លំដាប់ពិន្ទុ៩៩,៩៩៧រូបនេះ មុននឹងនាងរៀបរាប់ពីការត្រៀមខ្លួនក្នុងពេលប្រឡងយ៉ាងដូច្នេះថា៖« ក្នុងពេលប្រឡងត្រួវចាំរូបមន្តឲ្យច្បាស់ ដើម្បីងាយស្រួលក្នុងការធ្វើលំហាត់ ហើយត្រូវមើលប្រធានឲ្យច្បាស់ មុននឹងដោះស្រាយលំហាត់ ឬឆ្លើយសំណួរ ចៀសវាងឆ្លើយខុសប្រធាន នាំឲ្យខាតពេល»។
គួរបញ្ជាក់ថា អតីតសិស្សនិទ្ទេសA ឆ្នាំ២០១៣-២០១៤ ក្នុងចំណោម១១នាក់នោះ មានបេក្ខជន៣រូប ដែលបានបន្តការសិក្សានៅបរទេស។ យុវជន ចាន់ ពិចិត្រ និទ្ទេសA ពិន្ទុ១០០ខ្ពស់បំផុត កំពុងសិក្សានៅប្រទេសថៃ យុវជន នាង បូរា សិស្សនិទ្ទេសA លំដាប់ពិន្ទុ ៩៩,៩៨៩ បានបន្តការសិក្សានៅប្រទេសសរុស្សី និងយុវតី អ៊ិន សុខផល្គុន បានចាកចេញទៅបន្តការសិក្សានៅសហរដ្ឋអាមេរិក កាលពីថ្ងៃទី ១៣ សីហា ឆ្នាំ២០១៦នេះ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
និទ្ទេសA
បាក់ឌុប
© រក្សាសិទ្ធិដោយ thmeythmey.com
អត្ថបទពេញនិយម
តើពាក្យ «សិទ្ធិ, សិទ្ធ» ប្រើខុសគ្នាដូចម្តេច?
11 ម៉ោង
ផ្សារដើមគរថ្មី លើផ្ទៃដី៣០ហិកតា ត្រូវបានដាក់ដំណើរការជាផ្លូវការហើយ
1 សប្តាហ៍
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ
2 ថ្ងៃ
តើពាក្យងារជា «សម្តេច» មានន័យដូចម្តេច?
4 ថ្ងៃ
រោងចក្រដំឡើងរថយន្តរបស់ក្រុមហ៊ុនជប៉ុនមួយទៀត បើកដំណើរការនៅកម្ពុជា
3 ថ្ងៃ
អត្ថបទពេញនិយមបន្ថែម