អន្តរជាតិ
បុរសខ្លាំងហ្វីលីពីន «នឹងមិននិយាយបញ្ហាសមុទ្រចិនខាងត្បូងឲ្យកិច្ចប្រជុំអាស៊ានអាប់អួរឡើយ»
× លោកប្រធានាធិបតីហ្វីលីពីន Rodrigo Duterte នឹងបំពេញទស្សនកិច្ចក្រៅប្រទេសផ្លូវការជាលើកដំបូងដើម្បីចូលរួមកិច្ចប្រជុំកំពូលអាស៊ានក្នុងក្រុងវៀងចន្ទន៍ នៃប្រទេសឡាវ ដែលឡាវគឺជាប្រធាននៃកិច្ចប្រជុំនោះ។ នាឱកាសដ៏ល្អនេះ លោកប្រធានាធិបតីដែលជាបុរសខ្លាំងហ្វីលីពីនរូបនេះ នឹងមិនយកបញ្ហាសមុទ្រចិនខាងត្បូងដែលជាបញ្ហាតានតឹងរវាងហ្វីលីពីន និងចិន ដាក់ជារបៀបវារៈធំក្នុងប្រជុំដើម្បីឲ្យមិត្តអាស៊ាន និងមេដឹកនាំកំពូលផ្សេងៗជួយដោះស្រាយឡើយ។
លោកប្រធានាធិបតី Rodrigo Duterte នៅថ្ងៃទី១៧ ខែសីហាកន្លងទៅ បានបញ្ជាក់ថា លោក នឹងមិននាំយកបញ្ហាបញ្ហាសមុទ្រចិនខាងត្បូងក្នុងអំឡុងពេលនៃដំណើរទស្សនកិច្ចចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធក្នុងក្រុងវៀងចន្ទន៍ នៃប្រទេសឡាវដែលនឹងប្រារព្ធឡើងនៅថ្ងៃទី០៦-០៨ ខែកញ្ញាខាងមុខនេះ។ លោក ថា លោក មិនចង់បង្កើតបរិយាកាសនៅទីនោះត្រូវអាប់អួរនោះទេ។
លោក Duterte បានបញ្ជាក់ក្នុងសន្និសីទកាសែតយ៉ាងដូច្នេះថា «ទេ, ខ្ញុំ នឹងដោះស្រាយបញ្ហាតែតាមរយៈមួយទល់មួយ(ជាមួយចិន) តែប៉ុណ្ណោះ...ហើយ យើងអាចបង្កើតបរិយាកាសមួយដែលជាកន្លែងដែលយើងអាចអង្គុយ និងនិយាយគ្នាដោយផ្ទាល់បាន។» នេះបើយោងតាមសារព័ត៌មាន GMA News Online ដែលចុះផ្សាយដែរថា លោកប្រធានាធិបតីរូបនោះ ក៏មិនចង់ធ្វើសង្គ្រាមប្រឆាំងនឹងចិនលើបញ្ហាអធិបតេយ្យនោះទេ។
សូមជម្រាបផងដែរថា កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធអាស៊ាន ដែលត្រូវបានធ្វើឡើងក្នុងប្រទេសសមាជិកអាស៊ានវិលជុំ គឺជាវេទិកាដើម្បីប្រមូលផ្តុំមេដឹកកំពូលក្នុងតំបន់ដើម្បីជជែកលើបញ្ហា និងស្វែងរកដំណោះស្រាយរួមគ្នា។ ហើយវា ក៏ជាវេទិកាដែលត្រូវបានប្រទេសពាក់ព័ន្ធដែលមានវិវាទនឹងគ្នាប្រែក្លាយឲ្យទៅជាសមរភូមិការទូតផងដែរ។ ជាពិសេសនោះ បញ្ហាសមុទ្រចិនខាងត្បូងដែលជាបញ្ហាក្នុងតំបន់មួយដ៏ក្តៅ តែងតែត្រូវបានជជែក និងកែប្រែកិច្ចប្រជុំឲ្យតានតឹងស្ទើរតែរៀងរាល់ឆ្នាំ។
សូមរម្លឹកផងដែរថា ជម្លោះសមុទ្រចិនខាងត្បូង គឺជាជម្លោះអធិបតេយ្យដែលមានរដ្ឋពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន វៀតណាម និងចិន។ កាលពីថ្ងៃទី១២ ខែកក្កដាកន្លងទៅ តុលាការមជ្ឈត្តការអចិន្ត្រៃយ៍ក្រុងឡាអេ បានប្រកាសសាលក្រមសមុទ្រចិនខាងត្បូងតាមបណ្តឹងរបស់ហ្វីលីពីនដោយបកស្រាយថាសកម្មភាព និងការទាមទាររបស់ចិនមិនមានមូលដ្ឋានផ្នែកច្បាប់នោះទេ។ ហើយសាលក្រមនេះ បានធ្វើឲ្យមេដឹកនាំក្នុងតំបន់ដាក់សម្ពាធការទូតខ្លាំងទៅលើចិន ខណៈចិនប្រកាន់ជំហរដាច់មិនអនុវត្តតាមសាលក្រមនោះឡើយ។
យ៉ាងណាក៏ដោយ ការប្រកាសរបស់ប្រធានាធិបតីហ្វីលីពីន លោក Duterte នឹងជួយធ្វើឲ្យកិច្ចប្រជុំកំពូលក្នុងក្រុងវៀងចន្ទន៍នាពេលខាងមុខដ៏ខ្លីនេះ មានភាពធូរស្រាលជាថ្មីម្តងទៀត។ កាលពីចុងខែកក្កដាកន្លងទៅ មតិក្នុងតំបន់ និងអន្តរជាតិ មានការព្រួយបារម្ភម្តងរួចទៅហើយ ដោយគេខ្លាចក្រែងថា កិច្ចប្រជុំរដ្ឋមន្ត្រីការបរទេសអាស៊ានលើកទី៤៩ មិនអាចចេញសេចក្តីថ្លែងការណ៍រួមបាន ដ្បិតសមាជិកអាស៊ានមានជំហរផ្សេងៗគ្នាលើបញ្ហាសមុទ្រចិនខាងត្បូង។ តែចុងក្រោយ អាស៊ាន អាចសម្របសម្រួល និងបានចេញសេចក្តីថ្លែងការណ៍រួមជាឯកច្ឆន្ទដោយមិនដាក់បញ្ហាសាលក្រមសមុទ្រចិនខាងត្បូង។ នេះ ក៏អាចនិយាយបានថាអវត្តមានបញ្ហាសមុទ្រចិនខាងត្បូងក្នុងកិច្ចប្រជុំ នឹងធ្វើកិច្ចប្រជុំ ប្រព្រឹត្តទៅដោយរលូន និងប្រកបដោយមាត្រីភាពរវាងបណ្តាមេដឹកនាំ៕
© រក្សាសិទ្ធិដោយ thmeythmey.com