អន្តរជាតិ
×![]()
ដោយ: តន ចាន់រិទ្ធារ៉ា
ថៃ ដែលជាប្រទេសនាំចេញអង្ករជាងគេលើពិភពលោក នឹងចូលរួមក្នុងការដេញថ្លៃនាំអង្ករទៅកាន់ហ្វីលីពីន ដែលនឹងធ្វើនៅដំណាច់ខែសីហានេះ។ ថៃ នឹងត្រូវប្រជែងជាមួយប្រទេសក្នុងតំបន់អាស៊ាន ដើម្បីនាំអង្ករច្រើនជាងពីរសែនតោនទៅកាន់ហ្វីលីពីន ដ្បិតហ្វីលីពីន មិនមែនជាប្រទេសផលិតអង្ករធំដុំអ្វីឡើយ និងតែងពឹងលើការនាំចូលយ៉ាងច្រើនសម្រាប់តម្រូវការក្នុងស្រុក។
ប្រទេសនាំចេញអង្ករធំជាងគេរបស់អាស៊ាន ថៃ នឹងប្រជែងជាមួយសមាជិកអាស៊ានពីរទៀត គឺកម្ពុជា និងវៀតណាម ក្នុងការលក់អង្ករទៅកាន់ហ្វីលីពីន ដែលបានប្រកាសដេញថ្លៃនាំចូលអង្ករចំនួន២៥ម៉ឺនតោន។ លោក Duangporn Rodphaya អគ្គនាយកពាណិជ្ជកម្មក្រៅប្រទេស និយាយថា ការដេញថ្លៃនាំចូលអង្ករនេះ ធ្វើឡើងដោយផ្អែកលើគោលការណ៍រវាងរដ្ឋាភិបាល និងរដ្ឋាភិបាល។
ការទិញអង្ករក្នុងបរិមាណច្រើនបែបនេះ គឺជាផ្នែកមួយនៃផែនការទិញអង្កររបស់ហ្វីលីពីន ដែលជាប្រទេសមួយក្នុងចំណោមប្រទេសនាំចូលអង្ករធំជាងគេលើពិភពលោក។ ហ្វីលីពីន បានដាក់គោលដៅនាំចូលគ្រាប់ធញ្ញជាតិនេះចំនួនមួយលានតោន ដើម្បីរក្សាសុវត្ថិភាពចំណីអាហាររហូតដល់ឆ្នាំក្រោយ ខណៈដែលតម្លៃនៃផលិតផលទាំងនេះ កំពុងមានតម្លៃទាបលើទីផ្សារ។
យោងតាមកាសែតបាងកកប៉ុស្តិ៍ អង្ករចំនួន៧៥ម៉ឺនតោន នឹងត្រូវទិញនៅក្រោមកិច្ចព្រមព្រៀងរវាងរដ្ឋាភិបាល និងរដ្ឋាភិបាល។ ចំណែកអង្ករចំនួន២៥ម៉ឺនតោនដែលនៅសល់ នឹងត្រូវនាំចូលតាមរយៈក្រុមហ៊ុនឯកជន។ នៅក្រោមកិច្ចព្រមព្រៀងរដ្ឋាភិបាល និងរដ្ឋាភិបាល ហ្វីលីពីន តែងទិញអង្ករពីវៀតណាម ឬថៃ ឬក៏កម្ពុជា ដែលសុទ្ធសឹងជាសមាជិកអាស៊ានដូចគ្នា។
ផែនការទិញអង្កររបស់ក្រុងម៉ានីល ក៏អាចជួយដំឡើងថ្លៃស្រូវអង្ករបានដែរ ស្របពេលដែលតម្លៃស្រូវអង្ករលើទីផ្សារអន្តរជាតិ បានធ្លាក់ចុះ ដោយសារតែតម្រូវការអង្ករនៅតាមបណ្ដាប្រទេសអាស៊ី និងអាហ្វ្រិក។ ការធ្លាក់ចុះតម្រូវការអង្ករនេះ ធ្វើដែលធ្វើឲ្យតម្លៃស្រូវនៅប្រទេសផ្គត់ផ្គង់ធំៗដូចជាថៃ និងវៀតណាម មានតម្លៃទាបជាច្រើនខែមកហើយ។ ប៉ុន្តែ លោក Duangporn Rodphaya បញ្ជាក់ដែរថា តម្លៃអង្ករថៃ គឺថ្លៃជាងតម្លៃមកពីគូប្រជែងផ្សេងទៀត។
លោក Rodrigo Duterte ដែលចូលកាន់តំណែងនៅខែឧសភា បានប្រកាសប្រែក្លាយហ្វីលីពីន ទៅជាប្រទេសដែលអាចផ្គត់ផ្គង់អង្ករបានដោយខ្លួនក្នុងរយៈពេល៦ឆ្នាំនៃអាណត្តិរបស់លោក។ ហ្វីលីពីន រំពឹងទទួលបានទិន្នផលអង្ករចំនួន១៨.៣លានតោននៅឆ្នាំ២០១៦ បើទោះជាប្រទេសនេះរងគ្រោះដោយបាតុភូត El Nino នៅពាក់កណ្ដាលឆ្នាំនេះក៏ដោយ៕
Tag:
កម្ពុជា
ថៃ
វៀតណាម
ហ្វីលីពីន
អង្ករ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
