បន្ទប់ប្រឡងមួយមានបេក្ខជន២នាក់ តែអនុរក្ស និងអ្នកសង្កេតការណ៍ច្រើន

ជាតិ

បន្ទប់ប្រឡងមួយមានបេក្ខជន២នាក់ តែអនុរក្ស និងអ្នកសង្កេតការណ៍ច្រើន

22, Aug 2016 , 5:47 pm

រូបភាព

ដោយ: ថ្មីៗ

អ្នកចេះ គឺជាប់! ប៉ុន្តែការភ័យព្រួយច្បាស់ជាគេចមិនផុតឡើយនៅពេលប្រឡង។ នៅបន្ទប់លេខ១៧ ក្នុងមណ្ឌលប្រឡងសាលាបឋមសិក្សាគំរូក្រុងខាងជើង នៃខេត្តកំពង់ឆ្នាំង មានបេក្ខនារីប្រឡងតែពីររូបប៉ុណ្ណោះ ប៉ុន្តែពួកគេស្ថិតក្រោមការត្រួតពិនិត្យពីសំណាក់អនុរក្ស២នាក់ រួមទាំងអ្នកសង្កេតការណ៍របស់អង្គភាពប្រឆាំងអំពើពុករលួយ។

បើតាមរូបភាពដែលបង្ហោះនៅលើទំព័រហ្វេសប៊ុករបស់អង្គភាពប្រឆាំងអំពើពុករលួយ (Anti-Corruption Unit) កាលពីព្រឹកថ្ងៃទី២២ ខែសីហា ដែលជាព្រឹកថ្ងៃដំបូងនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) បេក្ខនារី ឱ សារ៉ាយ មកពីវិទ្យាល័យហ៊ុន សែន ទឹកផុស និងបេក្ខនារី ឱ ស្រីរ៉ៃ មកពីវិទ្យាល័យព្រះបាទសុរាម្រឹត ស្ថិតក្នុងបន្ទប់ប្រឡងដ៏ធំទូលាយមួយ ដោយស្ថិតក្រោមក្រសែភ្នែកអនុរក្ស និងអ្នកសង្កេតការណ៍ដែលមានចំនួនច្រើនជាងខ្លួន។

អ្នកសង្កេតការណ៍របស់ ACU បានសរសេរបញ្ជាក់ថា៖ «តាមនិយាម ក្រសួងអប់រំ បានកំណត់ ក្នុងមួយបន្ទប់ត្រូវមានបេក្ខជនតែ២៥រូប ដូចនេះហើយបានជាបេក្ខជន០២រូបនេះ ត្រូវដាក់អោយនៅបន្ទប់ប្រលងមួយដូចគេដែរ ដោយសារតែចំនួនសេស សល់ពីបន្ទប់ផ្សេង។ ទោះមានបេក្ខជនតែ០២រូប អនុរក្សក៏មាន០២ រូប អមដោយអ្នកសង្កេតការណ៍យើងផងដែរ»។

ប្រហែលជាមិនមានអ្វីជាបញ្ហាចោទនោះឡើយ ព្រោះរូបភាពមួយសន្លឹកបានបង្ហាញបេក្ខនារីម្នាក់ បង្ហាញស្នាមញញឹមនៅមុខបន្ទប់ នាពេលប្រឡងវិញ្ញាសាភាសាអង់គ្លេស៕

រូបថតទាំងអស់៖ Facebook ACU