ជាតិ
សម្ដេច ហ៊ុន សែន ផ្ដាំទៅលោក អូបាម៉ា ឲ្យផ្ដល់ជំនួយដោះគ្រាប់មិនទាន់ផ្ទុះនៅកម្ពុជា
× បញ្ហាគ្រាប់មិនទាន់ផ្ទុះ ដែលបានកប់នៅក្នុងផ្ទៃដីប្រទេសកម្ពុជា តាំងពីសម័យសង្គ្រាមនោះ នៅតែជាបញ្ហាគំរាមកំហែង អាយុជីវិតប្រជាពលរដ្ឋ។ នេះជាការបញ្ជាក់របស់សម្ដេចនាយករដ្ឋមន្ត្រី ហ៊ុន សែន ដែលបានផ្ដាំតាមអគ្គរដ្ឋទូតអាមេរិកប្រចាំកម្ពុជា ឲ្យប្រាប់ប្រធានាធិបតីអាមេរិក លោក បារ៉ាក់ អូបាម៉ា ផ្ដល់ជំនួយថវិកាបន្ថែមទៀត ដើម្បីដោះគ្រាប់មិនទាន់ផ្ទុះនៅកម្ពុជា។
ថ្លែងនៅចំពោះមុខអគ្គរដ្ឋទូតអាមេរិកប្រចាំកម្ពុជាលោក វីល្លៀម ហេដ (Willaim Heidt) នៅក្នុងវេទិកាស្តីពី ការការពារ និងអភិរក្សធនធានធម្មជាតិ កាលពីថ្ងៃទី២២ សីហា លោកនាយករដ្ឋមន្ត្រី ហ៊ុន សែន បានរំឮកពីបញ្ហាគ្រាប់បែកចង្កោម ដែលអាមេរិកបានទម្លាក់មកលើទឹកដីប្រទេសកម្ពុជា នាសម័យសង្គ្រាម ក្នុងទសវត្សរ៍ ឆ្នាំ១៩៧០ ដែលបណ្ដាឲ្យប្រជាពលរដ្ឋខ្មែររងគ្រោះរាប់លាននាក់។ ប្រមុខរដ្ឋាភិបាល ចាត់ទុកបញ្ហាគ្រាប់បែកដែលនៅសេសសល់ក្នុងទឹកដីកម្ពុជានេះថា ជាកំហុសរបស់អាមេរិក ដែលត្រូវទទួលខុសត្រូវផ្ដល់ជំនួយមកកម្ពុជា ដើម្បីបោសសម្អាតគ្រាប់មិនទាន់ផ្ទុះ ក្នុងការធានាសុវត្ថិភាពប្រជាពលរដ្ឋខ្មែរ។
សូមស្ដាប់ប្រសាសន៍សម្ដេច ហ៊ុន សែន៖
ឯកសារព័ត៌មានរបស់អង្គការជនពិការអន្តរជាតិ ស្តីពីគ្រាប់បែកចង្កោមនៅកម្ពុជា បង្ហាញថា គ្រាប់ប្រភេទ(ប៊ុមប៊ី)នេះ ត្រូវបានសហរដ្ឋអាមេរិក ទម្លាក់មកលើប្រទេសខ្មែរចំនួន ៨ ម៉ឺនគ្រាប់ធំៗ ដែលមានចំនួនគ្រាប់តូចៗ សរុបជាង ២៦លានគ្រាប់ នៅតំបន់ភាគខាងកើតនិងភាគឥ្ឍសាន។ គ្រាប់បែកចង្កោមទាំងនោះ បានទម្លាក់ក្នុងចន្លោះទសវត្សរ៍ឆ្នាំ១៩៦០ និង១៩៧០ ហើយគ្រាប់ដែលនៅសេសសល់ក្នុងផ្ទៃដីប្រទេសកម្ពុជាប្រហែល២២០គីឡូម៉ែត្រការ៉េ គឺបង្កការគំរាមកំហែងធ្ងន់ធ្ងរដល់ជីវភាពរស់នៅរបស់ពលរដ្ឋ ។ បើតាមឯកសារព័ត៌មានរបស់អង្គការជនពិការអន្តរជាតិដដែល ចាប់តាំងពីឆ្នាំ១៩៩៨ គឺមានប្រជាពលរដ្ឋរងគ្រោះដោយសារគ្រាប់បែកចង្កោម ១៩៤នាក់។
អង្គការជនពិការអន្តរជាតិ (Handicap Intertional) ជំរុញឲ្យរដ្ឋាភិបាលកម្ពុជាចុះអនុសញ្ញាស្តីពីគ្រាប់បែកចង្កោម ដើម្បីទប់ស្កាត់ការប្រើប្រាស់ ដែលបង្កអសន្តិសុខក្នុងតំបន់។ រដ្ឋាភិបាល កំពុងពិចារណាលើការចុះហត្ថលេខាអនុសញ្ញាស្តីពីគ្រាប់បែកចង្កោមនេះ។
អនុសញ្ញាស្ដីពីគ្រាប់បែកចង្កោម ត្រូវបានចុះហត្ថលេខា នៅទីក្រុងអូស្លូ ប្រទេសន័រវ៉េស ក្នុងឆ្នាំ២០០៨ ដោយមានប្រទេសចំនួន៣០ ផ្ដល់សច្ចាប័ន និងមានប្រទេស១០៨ បានចុះហត្ថលេខាទទួលស្គាល់ ដោយបញ្ឈប់ការផលិតការប្រើប្រាស់ និងដឹកជញ្ចូនគ្រាប់បែកចង្កោម។ ដោយឡែកនៅបណ្ដាប្រទេសក្នុងអាស៊ានមានតែប្រទេសឡាវមួយប៉ុណ្ណោះដែលចុះហត្ថលេខាជារដ្ឋភាគី នៃអនុសញ្ញាសមាជិកក្នុងអនុសញ្ញានេះ ប៉ុន្តែមិនទាន់ផ្ដល់សច្ចាប័ននៅឡើយ ៕
Tag:
ហ៊ុន សែន
អាមេរិក
គ្រាប់បែកចង្កោម
© រក្សាសិទ្ធិដោយ thmeythmey.com