ជាតិ
នយោបាយជាតិ
ឯកឧត្តម សម រង្ស៊ី ថា សម្ដេច ហ៊ុន សែន មិនហ៊ានប្រដាល់លើសង្វៀនជាមួយខ្លួន
×
ប្រធានគណបក្សសង្គ្រោះជាតិឯកឧត្តម សម រង្ស៊ី លើកឡើងថា បេក្ខជនជានាយករដ្ឋមន្ត្រីនៅកម្ពុជា មានតែពីរនាក់ប៉ុណ្ណោះ ដែលអាចតទល់គ្នាបាននោះគឺរូបលោក និងសម្ដេច ហ៊ុន សែន។ លោក សម រង្ស៊ី ដែលកំពុងគេចខ្លួននៅក្រៅប្រទេសនោះ បានរិះគន់សម្ដេច ហ៊ុន សែន ថា ជាអ្នកប្រដាល់ដែលមិនហ៊ានឲ្យគូប្រកួតឡើងលើសង្វៀន ដែលលោក សម រង្ស៊ី ចាត់ទុក សម្ដេច ហ៊ុន សែន ជាអ្នកនយោបាយ ដែលខ្លាចគូប្រកួត ហើយយកប្រព័ន្ធតុលាការកៀបសង្កត់រូបលោក មិនឲ្យមានឱកាសប្រជែងគ្នាបាន។ អ្នកនាំពាក្យគណបក្សប្រជាជន ឆ្លើយតបលោក សម រង្ស៊ី វិញថា គណបក្សលោក មិនដែលខ្លាចឯកឧត្តម សម រង្ស៊ី ឡើយ តែមកពីមេបក្សប្រឆាំងរូបនេះ ជាប់ឈ្មោះជាទណ្ឌិត គ្មានសិទ្ធិប្រជែងនយោបាយដោយខ្លួនឯង។
តាមរយៈសំឡេងក្នុងវីដេអូឃ្លីបជាង១នាទី ឯកឧត្តម សម រង្ស៊ី បញ្ជាក់ថា ការប្រជែងគ្នាក្នុងឆាកនយោបាយ លុះត្រាតែប្រកួតមានគូប្រកួតពីរ ទើបអាចប្រជែងគ្នាបាន។ ត្រង់ចំណុចនេះ ប្រមុខបក្សប្រឆាំងរូបនេះ អះអាងថា សម្ដេចនាយករដ្ឋមន្ត្រី ហ៊ុន សែន កំពុងកៀបសង្កត់ រករឿងទាំងរូបលោក ទាំងឯកឧត្តម កឹម សុខា ព្រោះតែសម្ដេច មិនហ៊ានប្រកួតជាមួយមេបក្សប្រឆាំង។
ថ្លែងតាមរយៈវីដេអូ ដែលបង្ហោះលើហ្វេសប៊ុករបស់ខ្លួន ឯកឧត្តម សម រង្ស៊ី បានអត្ថាធិប្បាយយ៉ាងដូច្នេះថា៖«លោក ហ៊ុន សែន ប្រធានគណបក្សប្រជាជនកម្ពុជា ,គាត់ជាបេក្ខជននាយករដ្ឋមន្ត្រី ។ ខ្ញុំ សម រង្ស៊ី ជាប្រធានគណបក្សសង្គ្រោះជាតិ ខ្ញុំជាបេក្ខជននាយករដ្ឋមន្ត្រី ដូច្នេះបេក្ខជននាយករដ្ឋមន្ត្រីមានតែពីរនេះទេ។ តែលោក ហ៊ុន សែន ជាមនុស្សកំសាក គាត់ខ្លាច សម រង្ស៊ី ដូចគូប្រដាល់ គូប្រដាល់ត្រូវដាល់ វាយតតាំងគ្នានៅលើសង្វៀង ប៉ុន្ដែគាត់ញ៉ាក គាត់មិនហ៊ានឲ្យ សម រង្ស៊ី ឡើងលើសង្វៀនទេ។ គាត់នៅលើសង្វៀនម្នាក់ឯង គាត់ដាល់ម្នាក់ឯង គាត់ដាល់ជាមួយខ្យល់។ ដូចនេះបានន័យថាគាត់ឈ្នះ… ដូច្នេះអត់មានអ្នកណាទទួលស្គាល់ទេ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការលើកឡើងរបស់ឯកឧត្តម សម រង្ស៊ី នេះ គ្រាន់តែជាពាក្យសម្ដីនយោបាយប្រជាភិថុត លើប្រជាពលរដ្ឋប៉ុណ្ណោះ ដោយលោក អះអាងថា គណបក្សមិនដែលខ្លាចឯកឧត្តម សម រង្ស៊ី និងគណបក្សប្រឆាំងឡើយ ។ លោក សុខ ឥសាន ថ្លែងបែបចំអកវិញថា គណបក្សលោកប្រកួតជាមួយតែពលរដ្ឋស្របច្បាប់ប៉ុណ្ណោះ តែមិនប្រកួតជាមួយឯកឧត្តម សម រង្ស៊ី ដែលជាទណ្ឌិតទេ។« លោក សម រង្ស៊ី គាត់បង្កើតបញ្ហាដោយខ្លួនឯង គាត់ត្រូវទទួលទោសមុខច្បាប់ដោយខ្លួនឯង។ ហើយគាត់មានឈ្មោះជាទណ្ឌិត ដូចនេះគាត់គ្មានសិទ្ធិធ្វើនយោបាយ គ្មានចុះឈ្មោះបោះឆ្នោត គ្មានសិទ្ធិឈឈ្មោះបោះឆ្នោត ដែលមិនអាចប្រកួតប្រជែងជាមួយគ្នាបាន។ គណបក្សប្រជាជន ប្រកួតតែជាមួយពលរដ្ឋស្របច្បាប់ទេ»។
កន្លងមកសម្ដេចនាយករដ្ឋមន្ត្រី ហ៊ុន សែន ធ្លាប់បានប្រកាសថា លោកមិនខ្លាចដៃគូប្រកួតប្រជែងនយោបាយណាឡើយ ដោយសម្ដេច អំពាវនាវឲ្យអ្នកចង់ប្រកួតនយោបាយ ចុះឈ្មោះគណបក្សឲ្យបានច្រើន ដើម្បីប្រជែងគ្នាផងដែរ។ ដោយឡែកងាកមកបញ្ហាឯកឧត្តម សម រង្ស៊ី និងឯកឧត្តម កឹម សុខា វិញ លោកនាយករដ្ឋមន្ត្រី ហ៊ុន សែន ចាត់ទុកករណីមេដឹកនាំបក្សប្រឆាំងនេះ គឺជារឿងបុគ្គល ដែលមិនពាក់ព័ន្ធនឹងរឿងនយោបាយឡើយ ហើយក៏មិនអាចចរចាគ្នាដោះស្រាយបានដែរ ព្រោះវាប៉ះពាល់ដល់សិទ្ធិអំណាច និងនីតិវិធីតុលាការ។
តែចំពោះករណីឯកឧត្តម កឹម សុខា ដែលកំពុងរងបទចោទប្រកាន់ពីបទ«បដិសេធក្នុងការចូលខ្លួន» នោះ ប្រមុខរដ្ឋាភិបាល ធ្លាប់និយាយប្រយោលដោយមិនចំឈ្មោះថា លោកគ្មានសិទ្ធិអំណាចបញ្ជាលើប្រព័ន្ធតុលាការ ដែលកំពុងបន្តនីតិវិធីទេ លុះត្រាតែតុលាការសម្រេចសាលក្រមស្ថាពរ ទើបលោកនាយករដ្ឋមន្ត្រី អាចមានសិទ្ធិស្នើទៅព្រះមហាក្សត្រ សុំឡាយព្រះហស្ថលេខាលើកលែងទោសឲ្យបាន។ ងាកមកករណីឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេស ដោយសាររងបទចោទផ្ទួនៗ និងមានឈ្មោះជាទណ្ឌិតនេះវិញ ត្រូវបានសម្ដេច ហ៊ុន សែន ប្រកាសថា លោកនឹងកាត់ដៃស្ដាំចោលភ្លាម ប្រសិនជាសម្ដេច លើកដៃចុះហត្ថលេខា ស្នើសុំព្រះមហាក្សត្រលើកលែងទោសនោះ៕
© រក្សាសិទ្ធិដោយ thmeythmey.com