ជាតិ
Smart ចំណាយជាង៥០ម៉ឺនដុល្លារ ផ្តល់អាហារូបករណ៍ឲ្យសិស្សនិទ្ទេសAនិងBចំនួន៣០នាក់
×![]()
ក្រសួងអប់រំ យុវជន និងកីឡា និងក្រុមហ៊ុនស្មាតអាហ្សាតា ខូអិលធីឌី បានចុះ ហត្ថលេខាលើអនុស្សារណៈយោគយល់ (MOU) ស្តីពីកិច្ចសហប្រតិបត្តិការផ្តល់ អាហារូបករណ៍ថ្នាក់ បរិញ្ញាបត្រក្នុងប្រទេស នៅព្រឹកថ្ងៃទី២៥ ខែសីហា នៅទីស្តីការក្រសួងអប់រំ។ ពិធីនេះ ត្រូវបានចុះហត្ថលេខា ដោយលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និង លោក Thomas Hundt នាយកប្រតិបត្តិក្រុមហ៊ុនsmart។
លោក Thomas Hundt នាយកប្រតិបត្តិក្រុមហ៊ុន Smart បានថ្លែងថា លោករីករាយ ដែលបានសហការជាមួយក្រសួងអប់រំ ក្នុងការលើកកម្ពស់វិស័យអប់រំ និងជួយដល់យុវជនកម្ពុជា ដែលមានសមត្ថភាព តែគ្មានលទ្ធភាពអាចបន្តការសិក្សាថ្នាក់ឧត្ដមសិក្សានេះ។
បើតាមសេចក្តីប្រកាសព័ត៌មានរបស់ក្រុមហ៊ុនស្មាតនេះ អាហារូបករណ៍នេះ មានចំនួន៣០កន្លែង និងមានរយៈពេល៣ឆ្នាំ ដែលនឹងផ្ដល់ជូនសិស្ស និទ្ទេស A និង B ចំនួន១០នាក់ក្នុងមួយឆ្នាំៗ គិតចាប់ពីឆ្នាំ ២០១៦ឆ្នាំនេះទៅ។
បើផ្អែកតាមគោលការណ៍នៃការផ្តល់អាហារូបករណ៍នេះ ក្រុមហ៊ុនទូរសព្ទមួយនេះ ត្រូវចំណាយទឹកប្រាក់ចំនួន ៥១០,០០០ដុល្លារ សម្រាប់ចំណាយលើការសិក្សារបស់ពួកគេ ដែលក្នុងនោះ មានថ្លៃសិក្សាចំនួន៥០០ដុល្លារក្នុងមួយឆ្នាំ និងប្រាក់ឧបត្ថម្ភសម្រាប់រយៈពេល៤ឆ្នាំនៃសិក្សាថ្នាក់បរិញ្ញាបត្រសម្រាប់និស្សិតម្នាក់ៗ ចំនួន ១៥,០០០ដុល្លារ។
អាហារូបករណ៍សរុបចំនួន ៣០នាក់នេះ គឺត្រូវផ្ដល់ជូនគ្រប់គ្រឹះស្ថានអប់រំកម្រិតឧត្ដមសិក្សារបស់រដ្ឋទាំងអស់ លើកលែងតែសកលវិទ្យាល័យវិទ្យាសាស្ត្រសុខាភិបាលមួយតែប៉ុណ្ណោះ។ ក្រសួង និងក្រុមហ៊ុន ស្មាតនឹងបង្កើតគណៈកម្មការមួយ ដើម្បីជ្រើសរើសសិស្សសម្រាប់អាហារូបករណ៍ ដែលគ្រោងបើកឲ្យដំណើរការនៅពាក់កណ្ដាលខែកញ្ញា ខាងមុខនេះ ពោលគឺក្រោយការប្រកាសលទ្ធផលប្រឡងបាក់ឌុប៕
Tag:
អប់រំ
អាហារូបករណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
