ការបង្កើតរដ្ឋឥស្លាមនិងសាខាថ្មីរបស់ក្រុមភេរវជនរដ្ឋឥស្លាមឬក្រុមដែស្ហនៅតំបន់អាស៊ីអាគ្នេយ៍ បានក្លាយជាកង្វល់ដ៏ធំមួយ។ ពាក់ព័ន្ធបញ្ហានេះ មន្ត្រីអាមេរិក ទទួលបន្ទុក«ប្រឆាំងភេរវកម្ម» អះអាងថា រដ្ឋបាលក្រុងវ៉ាស៊ីនតោនបន្តសហការជាមួយបណ្តារដ្ឋាភិបាលក្រុងតំបន់ដើម្បីដាក់ចេញវិធានការតាមដៃលអាចធ្វើបានដើម្បីទប់ស្កាត់ បង្កើតសាខាថ្មីរបស់ក្រុមភេរវជនរដ្ឋឥស្លាមនៅអាស៊ីអាគ្នេយ៍។
អ្នកសម្របសម្រួលស្តីទីនៃការិយាល័យប្រឆាំងភេរវកម្មនៃក្រសួងការបរទេសអាមេរិក លោក Justin Siberell បានអះអាងថា រដ្ឋបាលក្រុងវ៉ាស៊ីនតោន កំពុងបន្តសហការជាមួយរដ្ឋាភិបាលក្នុងតំបន់ដើម្បីទប់ស្កាត់ ការបង្កើតសាខាថ្មីរបស់ក្រុមភេរវជនរដ្ឋឥស្លាមឬក្រុមដែស្ហ (Daesh) នៅអាស៊ីអាគ្នេយ៍បាន ។ រដ្ឋាភិបាលក្រុងតំបន់ហាក់ប្រឹងប្រែងខ្លាំងហើយ ដើម្បីធានាថា ក្រុមភេរវជននឹងមិនអាចបង្កើតរដ្ឋឥស្លាមនៅអាស៊ីអាគ្នេយ៍ឡើយ។
លោកបានលើកឡើងបែបនេះក្នុងសន្និសីទសារព័ត៌មានព្រឹកថ្ងៃសុក្រស្តីពីដំណើរទស្សនកិច្ចរបស់លោកមកកាន់ប្រទេសសិង្ហបុរី ឥណ្ឌូនេស៊ី និងម៉ាឡេស៊ីកន្លងដើម្បីពិភាក្សាពីវិធានការប្រឆាំងភេរវកម្ម។
ពាក់ព័ន្ធសំណួរអ្នកសារព័ត៌មានពាក់ព័ន្ធការប៉ុនប៉ងបង្កើតរដ្ឋឥស្លាមនិងបង្កើតសាខាថ្មីនៅអាស៊ីអាគ្នេយ៍របស់ក្រុមដែស្ហ លោក Justin Siberell បានលើកឡើងថា៖«យើងពិតជាព្រួយបារម្ភខ្លាំងចំពោះការកើនឡើងនៃសាខារបស់ក្រុមដែស្ហមាននៅ នីហ្សេរីយ៉ា, លីប៊ី និងតំបន់ Sinai អេហ្ស៊ីប។ តែបច្ចុប្បន្នយើងកំពុងសហការជាមួយរដ្ឋាភិបាលក្នុងតំបន់ដោយធ្វើអ្វីគ្រប់យ៉ាងតាមដែលអាចធ្វើបានដើម្បីទប់ស្កាត់កុំឲ្យមានការបង្កើតសាខាក្រុមភេរវជននេះនៅអាស៊ីអាគ្នេយ៍»។
ប៉ុន្តែ ក្នុងនាមជាអ្នកជំនាញ លោកមើលឃើញថា រដ្ឋាភិបាលក្នុងតំបន់បន្តរងសម្ពាធ ដែលចាំបាច់ត្រូវប្រឹងប្រែងខ្លាំងក្នុងការអនុវត្តគោលនយោបាយនិងវិធានការថ្មីៗដើម្បីធានាថា ក្រុមភេរវជនរដ្ឋឥស្លាមនេះមិនអាចបង្កើតសាខានៅអាស៊ីអាគ្នេយ៍។
«អ្វីដែលយើងឃើញគឺសម្ពាធដែលតម្រូវឲ្យរដ្ឋាភិបាលនីមួយៗដាក់ចេញនូវវិធានការប្រឆាំងភេរវកម្មដើម្បីទប់ការស្កាត់កុំឲ្យបញ្ហានេះកើតឡើង«។ នេះជាការលើកឡើងរបស់លោក Justin Siberell។
មកទល់ពេលនេះមានការបារម្ភខ្លាំងដែរ ពីការពង្រីកបណ្តាញ និងបង្កើតរដ្ឋឥស្លាមមួយទៀតនៅតំបន់អាស៊ីអាគ្នេយ៍ដោយក្រុមភេរវជនរដ្ឋឥស្លាម។ តំបន់អាស៊ីអាគ្នេយ៍សម្បូរដោយក្រុមប្រដាប់អាវុធនិងក្រុមឧទ្ទាមច្រើនផងដូចជាក្រុម Abu Sayaff និង Jemaah Islamiyah ដែលបន្តអុកឡុក ហើយមានក្រុមខ្លះបានប្រកាសបង្ហាញភក្តីភាពចំពោះក្រុមភេរវជនដែស្ហថែមទៀត។ ដូច្នេះ ការបង្កើតបណ្តាញថ្មីរឹតតែងាយស្រួល។
ម្យ៉ាង អ្វីដែលដែលក្លាយជាបញ្ហាធំនោះ គឺ បច្ចុប្បន្ននេះទៀត ក្រុមថ្មីដែលបង្កើតឡើងដោយក្រុមសកម្មប្រយុទ្ធឥណ្ឌូនេស៊ីបីនាក់« Katibah Nusantara» នោះ ទទួលបានការគាំទ្រច្រើនពីក្រុមសកម្មប្រយុទ្ធដែលនិយាយភាសាម៉ាឡេស៊ី។ វាជាតំណាងឲ្យក្រុមរដ្ឋឥស្លាម និងផ្សព្វផ្សាយមនោគមន៍វិជ្ជាក្រុមនេះផ្ទាល់ដើម្បី ទាក់ទាញក្រុមប្រជាជនពីអាស៊ីអាគ្នេយ៍ដេលលួចឆ្លងដែនទៅច្បាំងក្នុងសង្គ្រាមជីហាតនៅស៊ីរី និងអ៊ីរ៉ាក់ផងដែរ។
ថ្វីបើមានការព្រួយបារម្ភខ្លាំងក៏ពិតមែន តែដូចដែលបានលើកឡើងស្រាប់ហើយ បណ្តាប្រទេសក្នុងតំបន់អាស៊ីអាគ្នេយ៍បានបន្តពង្រឹងកិច្ចសហប្រតិបត្តិការប្រឆាំងភេរវកម្ម និងហិង្សាជ្រុលនិយម។ ក្នុងនោះមានទាំងការឈានទៅ បញ្ឈប់ការផ្សព្វផ្សាយមនោគមន៍វិជ្ជាសាសនាជ្រុលនិយម និងការបន្តជ្រើសរើសក្រុមសកម្មប្រយុទ្ធថ្មីៗពីក្នុងតំបន់ឲ្យទៅច្បាំងនៅមជ្ឈិមបូព៌ា។
បើតាមការពិភាក្សាផ្លាស់ប្តូរយោបល់គ្នាកន្លងមកដែលរៀបចំឡើងនៅឥណ្ឌូនេស៊ី បណ្តាមន្ត្រីជាន់ខ្ពស់ នៅក្នុងតំបន់អាស៊ីអាគ្នេយ៍ បានឯកភាពគ្នាពង្រឹងកិច្ចសហប្រតិបត្តិការដើម្បីទប់ស្កាត់ការផ្សព្វផ្សាយមនោគមន៍វិជ្ជា ជ្រុលនិយម និងទប់ស្កាត់ការបន្តជ្រើសរើសក្រុមសកម្មប្រយុទ្ធថ្មីទៀត។ ការពង្រឹងការអនុវត្តច្បាប់ដែលអាចដាក់ទោសទណ្ឌលើអ្នកដែលត្រៀមនិងលួចឆ្លងដែនទៅច្បាំងជាមួយក្រុមភេរវជន, ការគ្រប់គ្រងព្រំដែនឲ្យបានម៉ត់ចត់ និងការពង្រឹងការចែករំលែករបាយការណ៍ចារកម្មជារឿងចាំបាច់និងមានប្រសិទ្ធិភាពផងដែរក្នុងការដោះស្រាយបញ្ហានេះ៕