ជាតិ
យុវជនវ័យក្មេងមួយក្រុម រៀបចំសិក្ខាសាលាដើម្បីបង្កើនការយល់ដឹងពី កីឡា ស្នេហា និងការអប់រំ
× នាថ្ងៃទី១៨ ខែកញ្ញា ឆ្នាំ២០១៦ ខាងមុខនេះ ក្រុមយុវជនស្ម័គ្រចិត្តដើម្បីការអភិវឌ្ឍសង្គម (YVSD) នឹងរៀបចំសិក្ខាសាលាស្ដីអំពី «កីឡា ស្នេហា និងការអប់រំនៅសតវត្សទី២១»។ សិក្ខាសាលានេះ នឹងលើកឡើងពីការកំណត់គោលដៅជីវិត, ការអប់រំសតវត្សទី២១, ការគិតវិជ្ជមាននិងការអភិវឌ្ឍខ្លួន, ការជ្រើសរើសដៃគូជីវិតដ៏ត្រឹមត្រូវ និងតម្លៃនៃការលេងកីឡា។ សិក្ខាសាលានេះ រៀបចំនៅសាកលវិទ្យាល័យបញ្ញាសាស្ត្រកម្ពុជា (សាខាវិមានឯករាជ្យ) ចាប់ពីម៉ោង៧:០០ព្រឹក ដល់១២:០០ថ្ងៃត្រង់។
សិក្ខាសាលានេះ រៀបចំឡើងក្នុងគោលបំណងពង្រឹងសមត្ថភាពយុវជន ដើម្បីឲ្យពួកគេមានទំនុកចិត្តលើខ្លួនឯងកាន់តែច្បាស់ ធ្វើការស្វែងយល់ពីរបៀបជ្រើសរើសដៃគូស្នេហា ភាពជាអ្នកដឹកនាំ និងតួនាទីយុវជននៅក្នុងសង្គម។ ទន្ទឹមនឹងនេះ សិស្សនិស្សិតចូលរួមសិក្ខាសាលានេះ នឹងបានជួបជាមួយវាគ្មិនដែលមានបទពិសសោធន៍ជាច្រើន និងផ្ដល់ការប្រឹក្សាយោបល់ទាក់ទងទៅនឹងការសិក្សា កីឡា និងស្នេហា។
វាគ្មិនសំខាន់ៗនៅក្នុងសិក្ខាសាលារួមមាន លោកស្រី ប៉ែន បុប្ផា គ្រូបណ្ដុះបណ្ដាល OPERACY, លោក ហឿន សំនៀង នាយករងខុទ្ទកាល័យលោកទេសរដ្ឋមន្ត្រី ស៊ុន ចាន់ថុល, លោក កុលផេង វឌ្ឍនា អ្នកនិពន្ធ, កញ្ញា នាង សុវ៉ាតនា ឌីជេវិទ្យុក្នុងកម្មវិធីដោះស្រាយវិបត្តិស្នេហា និងកីឡាករបាល់ទាត់ជម្រើសជាតិកម្ពុជាផងដែរ។
ក្រោយពីបញ្ចប់សិក្ខាសាលា ក្រុមយុវជនស្ម័គ្រចិត្តដើម្បីអភិវឌ្ឍសង្គម ក៏បានរំពឹងទុកថា យុវជនដែលបានចូលរួមសិក្ខាសាលានេះ និងយល់ពីការកសាងទំនុកចិត្តលើខ្លួនឯង ការកំណត់គោលដៅជីវិត ការជ្រើសរើសដៃគូស្នេហា ភាពជាអ្នកដឹកនាំ និងតួនាទីយុវជននៅក្នុងសង្គម។ ជាពិសេស លើកទឹកចិត្ត និងជំរុញឲ្យយុវជនចូលរួមយ៉ាងសកម្មនៅក្នុងការសិក្សាកីឡាការងារស្ម័គ្រ និងការងារជួយសង្គមផ្សេងៗ ដើម្បីរួមចំណែកអភិវឌ្ឍសង្គមជាតិឲ្យរីកចម្រើន។
សូមបញ្ជាក់ថា សំបុត្រនៃការចូលរួមមានតម្លៃ ៤០០០រៀល សិស្សនិស្សិត និងយុវជន អាចរកទិញសំបុត្របានតាមសាកលវិទ្យាល័យមួយចំនួនដូចជា សកលវិទ្យាល័យភូមិន្ទភ្នំពេញ សាកលវិទ្យាល័យកម្ពុជា សាកលវិទ្យាល័យបញ្ញាសាស្ត្រកម្ពុជា សាកលវិទ្យាល័យជាតិគ្រប់គ្រង និងតាមអនឡាញ។ ព័ត៌មានបន្ថែម ០១៦ ៧៨ ១៩ ៦៧ / ០៩៦ ៩៤ ៩៩ ០០៩៕
© រក្សាសិទ្ធិដោយ thmeythmey.com