អចិន្ត្រៃយ៍ព្រឹទ្ធសភាកោះប្រជុំរឿងដកអភ័យឯកសិទ្ធិលោកស្រីថាក់ ឡានី ដែលរងបណ្តឹងពីនាយករដ្ឋមន្ត្រី

ជាតិ

អចិន្ត្រៃយ៍ព្រឹទ្ធសភាកោះប្រជុំរឿងដកអភ័យឯកសិទ្ធិលោកស្រីថាក់ ឡានី ដែលរងបណ្តឹងពីនាយករដ្ឋមន្ត្រី

30, Aug 2016 , 9:59 pm

រូបភាព

ដោយ: ម៉ៅ សុផា

ភ្នំពេញ៖ គណៈកម្មាធិការអចិន្ត្រៃយ៍ព្រឹទ្ធសភា នឹងបើកកិច្ចប្រជុំមួយ នៅថ្ងៃទី៣១ ខែសីហា ឆ្នាំ២០១៦ ។ របៀបវារៈនៃកិច្ចប្រជុំនេះ គឺដើម្បីពិនិត្យលើសេចក្តីស្នើសុំលើកអភ័យឯកសិទ្ធិរបស់លោកស្រី ឡាក់នី សមាជិកាព្រឹទ្ធសភាពីគណបក្ស សម រង្ស៊ី ដែលកំពុងរងបណ្តឹងពីនាយករដ្ឋមន្ត្រីកម្ពុជា។

ការបើកកិច្ចប្រជុំដើម្បីពិភាក្សារបស់គណៈកម្មាធិការអចិន្ត្រៃយ៍នៃព្រឹទ្ធសភា ក្នុងការលើកអភ័យឯកសិទ្ធិរបស់លោកស្រី ថាក់ ឡានី នៅថ្ងៃពុធថ្ងៃទី ៣១ ខែសីហា គឺធ្វើឡើងតាមការស្នើសុំរបស់អគ្គព្រះរាជអាជ្ញាអមសាលាឧទ្ធរណ៍ ដែលបានដាក់លិខិតទៅកាន់ព្រឹទ្ធសភា កាលពីថ្ងៃទី២៦ សីហា ឆ្នាំ២០១៦ កន្លងទៅ។ នេះបើយោងតាមសេចក្តីជូនដំណឹងរបស់អគ្គលេខាធិការដ្ឋាននៃព្រឹទ្ធសភា។

សំណុំរឿងរបស់លោកស្រី ថាក់ ឡានី នេះ សាលាដំបូងរាជធានីភ្នំពេញ បានកោះហៅលោកស្រីចំនួនពីរលើកមកហើយ ដើម្បីឲ្យចូលបំភ្លឺ ចំពោះពាក្យបណ្តឹងរបស់សម្តេចនាយករដ្ឋមន្ត្រីកម្ពុជា។ ប៉ុន្តែ លោកស្រី បានបដិសេធក្នុងការចូលខ្លួននៅតុលាការទាំងពីរលើក។

សារព័ត៌មានថ្មីៗ មិនអាចទាក់ទងលោកស្រី ថាក់ ឡានី ដើម្បីសុំអត្ថាធិប្បាយបានទេ នៅថ្ងៃអង្គារនេះ។

លោក សំ សុគង់ មេធាវីរបស់លោកស្រី ធ្លាប់ស្នើឲ្យតុលាការរាជធានីភ្នំពេញ បង្អង់ការអនុវត្តនីតិវិធីលើកកូនក្តីរបស់ខ្លួន។ លោកមេធាវី សំអាងថា លោកស្រីថាក់ ឡានី គឺជាសមាជិកព្រឹទ្ធសភា ដែលកំពុងមានអភ័យឯកសិទ្ធិជាប់ខ្លួន ដូច្នេះបើតុលាការ ចង់ចាត់ការលើលោកស្រី លុះត្រាតែរង់ចាំឲ្យព្រឹទ្ធសភា ដកអភ័យឯកសិទ្ធិជាមុនសិន។

មាត្រា១០៤ នៃរដ្ឋធម្មនុញ្ញនុញ្ញ បានចែងថា៖«សមាជិកព្រឹទ្ធសភា មានអភ័យឯកសិទ្ធិសភា។ សមាជិកព្រឹទ្ធសភារូបណាក៏ដោយ មិនអាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុពីបានសម្តែងយោបល់ ឬបញ្ចេញមតិក្នុងការបំពេញមុខងាររបស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកព្រឹទ្ធសភាណាមួយ នឹងអាចធ្វើទៅកើត លុះត្រាតែមានការយល់ព្រមពីព្រឹទ្ធសភា ឬពីគណៈកម្មាធិការអចិន្ត្រៃយ៍របស់ព្រឹទ្ធសភា ក្នុងចន្លោះសម័យប្រជុំនៃព្រឹទ្ធសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង។ ក្នុងករណីចុងក្រោយនេះ ក្រសួងមានសមត្ថកិច្ចត្រូវធ្វើសេចក្ដីរាយការណ៍ជូនព្រឹទ្ធសភា ឬជូនគណៈកម្មាធិការអចិន្ត្រៃយ៍របស់ព្រឹទ្ធសភាជាបន្ទាន់ ដើម្បីសម្រេច។ [……..] »។

លោក គី តិច មេធាវីការពារក្តីឲ្យសម្តេច ហ៊ុន សែន ធ្លាប់អះអាងកន្លងមកថា លោកបានទទួលសិទ្ធិក្នុងនាមជាមេធាវី ដើម្បីប្តឹង លោកស្រី ថាក់ ឡានី ដែលចោទកូនក្តីរបស់លោក ថា ជាអ្នកសម្លាប់លោក កែម ឡី។ តែមេធាវីរូបនេះ មិនបានបញ្ជាក់ពីបទចោទអ្វីឲ្យច្បាស់លើ លោកស្រី ថាក់ ឡានី នោះទេ ព្រោះលោក ទុកឲ្យតុលាការជាអ្នកចោទប្រកាន់។

ក្រៅពីប្ដឹងលោកស្រី ថាក់ ឡានី លោក គី តិច ក៏បានប្តឹងឯកឧត្តម សម រង្ស៊ី ដែលសរសេរនៅលើទំព័រហ្វេសប៊ុក ដោយចោទរដ្ឋាភិបាលថា ជាអ្នករៀបចំអំពើភេរវកម្មសម្លាប់លោកបណ្ឌិត កែម ឡី ផងដែរ។ លោក គី តិច ចាត់ទុកពាក្យសម្ដីរបស់ឯកឧត្តម សម រង្ស៊ី និងលោកស្រី ថាក់ ឡានី ថា ជាការរៀបចំគម្រោងទុកជាមុន ដើម្បីចោទសម្តេច ហ៊ុន សែន ថាជាអ្នកសម្លាប់លោក កែម ឡី។ សម្តេច ហ៊ុន សែន ទាមទារសំណងជំងឺចិត្តពីឯកឧត្តម សម រង្ស៊ី និងលោកស្រី ថាក់ ឡានី តែម្នាក់ ១០០ រៀលប៉ុណ្ណោះ ព្រោះសម្តេចមិនចង់បានប្រាក់អ្វីនោះឡើយ។ តែប្រធានបក្សកាន់អំណាចរូបនេះ ចង់បានតែការបញ្ជាក់ពីភាពស្អាតស្អំសម្រាប់លោក ។ នេះជាការបញ្ជាក់របស់លោក គី តិច ដដែល៕