ជាតិ
នយោបាយជាតិ
កម្ពុជា-វៀតណាម ខ្វែងគំនិតគ្នាលើការប្រើប្រាស់ផែនទី ដែលត្រូវស្នើសុំជំនួយបច្ចេកទេសពីបារាំង
× ភ្នំពេញ៖ កម្ពុជា-វៀតណាម មិនអាចចេញសេចក្ដីថ្លែងការណ៍រួមលើបញ្ហាព្រំដែន រវាងប្រទេសទាំងពីរបានឡើយ ។ មូលហេតុដែលមិនអាចរកដំណោះស្រាយបាន ដោយសារតែភាគីទាំងពីរនៅមានការខ្វែងគំនិតគ្នា លើការប្រើប្រាស់ផែនទីរវាងប្រទេសទាំងពីរ។
ស្តាប់សំឡេង
ថ្លែងក្រោយបញ្ចប់កិច្ចប្រជុំពិនិត្យមើលកំណត់ហេតុនោះ ប្រធានគណៈកម្មាធិការព្រំដែនកម្ពុជា-វៀតណាម លោក វ៉ា គីមហុង បានប្រាប់អ្នកកាសែតថា កម្ពុជាទាមទារប្រើប្រាស់ផែនទី ស្តីពី ព្រំដែនមិនកែប្រែ ឆ្នាំ១៩៥៣ ដែលបារាំងបានបន្សល់ទុកឲ្យកម្ពុជា ក្រោយពីកម្ពុជាទទួលបានឯករាជ្យ ក្នុងការកំណត់ព្រំដែនខ្លួន។ ប៉ុន្តែការទាមទារបស់កម្ពុជានេះ មិនត្រូវបានវៀតណាមយល់ព្រមឡើយ។
បើតាមលោក វ៉ា គីមហុង ភាគីវៀតណាមទាមទាឲ្យកម្ពុជា ប្រើប្រាស់ផែនទីផ្អែកលើសន្ធិសញ្ញាឆ្នាំ១៩៨៥ សន្ធិសញ្ញាបំពេញបន្ថែម ឆ្នាំ ២០០៥ និងអនុស្សារណយោគយល់គ្នា (MOU) ឆ្នាំ២០១១ រវាងប្រទេសទាំងពីរ។ ត្រង់ចំណុចនេះលោក វ៉ា គីមហុង អះអាងថា កម្ពុជា មិនព្រមតាមសំណើរបស់វៀតណាមឡើយ ហើយលោក នឹងបន្តព្យាយាមដោះស្រាយដោយសន្តិវិធីជាមួយវៀតណាម ដើម្បីឈានដល់ការសម្រេចរួមមួយ ក្នុងការដាក់លិខិតទៅកាន់ប្រទេសបារាំង ស្នើសុំអ្នកបច្ចេកទេស មកជួយវាស់វែងកំណត់ព្រំដែនកម្ពុជា-វៀតណាម។
គួរបញ្ជាក់ថា គណៈកម្មការចម្រុះព្រំដែនកម្ពុជា-វៀតណាម ដែលបានបើកកិច្ចប្រជុំចង្អៀតពីរថ្ងៃនេះ គឺកម្ពុជានិងវៀតណាម ផ្ដោតទៅលើការត្រួតពិនិត្យលើឯកសារស្នើសុំជំនួយបច្ចេកទេសពីប្រទេសបារាំង ដើម្បីដោះស្រាយលើចំណុចខ្វែងគំនិតគ្នា នៃបញ្ហាព្រំដែនប្រទេសទាំងពីរ ។
គួររំឮកថា កម្ពុជា-វៀតណាម បានព្រមព្រៀងគ្នាបោះបង្គោលព្រំដែន កាលពីឆ្នាំ២០០៦មក ក្នុងបណ្តោយព្រំដែនរវាងប្រទេសទាំងពីរប្រវែង១២៧០គីឡូម៉ែត្រ ដោយកំណត់បោះបង្គោលព្រំដែនចំនួន៣៧៥បង្គោល។ បើតាមរបាយការណ៍គណៈកម្មាធិការព្រំដែនកម្ពុជា កាលឆ្នាំ២០១៥ កម្ពុជា-វៀតណាម បានបោះបង្គោលព្រំដែនបានចំនួន៨៣ភាគរយ ពោលគឺបញ្ហាព្រំដែនរវាងប្រទេសទាំងពីរ នៅសល់១៧ភាគរយទៀតប៉ុណ្ណោះ៕
Tag:
ព្រំដែន
កម្ពុជា
វៀតណាម
© រក្សាសិទ្ធិដោយ thmeythmey.com