អាជ្ញាធរអប្សរា៖ ទឹកឡើងខៀវនៅខ្លោងទន្លេអុំពុំមានប្រើសារធាតុគីមីនោះទេ

ជាតិ

អាជ្ញាធរអប្សរា៖ ទឹកឡើងខៀវនៅខ្លោងទន្លេអុំពុំមានប្រើសារធាតុគីមីនោះទេ

31, Aug 2016 , 8:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ទឹកក្នុងកសិណនៅខ្លោងទ្វារទន្លេអុំ បានឡើងពណ៌ខុសពីធម្មតា។ ការណ៍នេះ ធ្វើឲ្យមានការងឿងឆ្ងល់របស់សាធារណជន ថាអាចមានការបំពុលទឹក ដោយការប្រើប្រាស់សារធាតុគីមីម្យ៉ាង ដែលធ្វើឲ្យទឹកប្រែពណ៌ខៀវខុសប្រក្រតី។ អាជ្ញាធរជាតិអប្សរា ដែលមានតួនាទីអភិរក្សរមណីយដ្ឋានអង្គរ បានចេញមុខពន្យល់ និងបកស្រាយចំពោះការប្រែប្រួលទឹកក្នុងកសិណអង្គរធំ។

អាជ្ញាធរជាតិអប្សរា បានបង្ហោះវីឌីអូក្នុងបណ្តាញសង្គមហ្វេសប៊ុក ដែលបានសម្ភាសមន្ត្រីជំនាញទឹកក្នុងនាយកដ្ឋានរបស់ខ្លួន។ ក្នុងវីឌីអូ ដែលលោក ភឿន សុឃីម អនុប្រធាននាយកដ្ឋានធនធានទឹកនៃអាជ្ញាធរជាតិអប្សរា បានបដិសេធចំពោះព័ត៌មាន ដែលថាអាចមានការបំពុលបរិស្ថានក្នុងកសិណខ្លោងទ្វារទន្លេអុំ ក្រុងអង្គរធំ។

តាមរយៈវីឌីអូនោះ លោក ភឿន សុឃីម បានពន្យល់ថា មូលហេតុដែលធ្វើឲ្យទឹកឡើងពណ៌ខៀវ ក៏ដោយសារបរិមាណទឹកតិច និងស្រកជិតដល់កម្រិតទាប ហើយវាបណ្តាលឲ្យទឹកឡើងក្តៅ ទើបធ្វើឲ្យលេចចេញវត្តមានប្លង់តុង។ ប្លង់តុងទាំងនោះ បានងាប់ និងអណ្តែតពាសពេញផ្ទៃទឹក។ នេះជាការបញ្ជាក់បន្ថែមរបស់លោក សុឃីម មុននឹងលោកបន្ថែមថា ដោយសារផ្ទៃកសិណធំ ហើយទឹកនៅផ្នែកខាងលើស្រកខ្លាំង ទើបធ្វើឲ្យប្លង់តុងអណ្តែតមកទីទាប តាមរយៈខ្យល់ផាត់ពីទិសខាងកើត។

«តាមពិត វាមានតិចៗទេ វាគ្មានបញ្ហាអ្វីទេ តែដោយសារផ្ទៃទឹកវាធំ វារសាត់តិចៗមក វាមកចាល់នៅខ្លោងទ្វារ ធ្វើឲ្យឃើញកកនៅកន្លែងនេះច្រើន ហើយណាមួយទឹកហ្នឹងវាអត់មានធ្វើចលនា ចឹងវាធ្វើឲ្យប្លង់តុងនឹងវាងាប់ វាអត់មានបំលាស់ទឹក...»។ លោក សុឃីម បន្តទៀតថា រហូតមកដល់ថ្ងៃនេះ ពុំទាន់មានករណីងាប់ត្រីក្នុងកសិណនៅឡើយទេ ហើយវាតែងកើតមានជារៀងរាល់ឆ្នាំ ដោយគ្មានអ្វីខុសប្រក្រតីដែរ។

ក្នុងករណីនេះដែរ លោក សុឃីម បានបញ្ជាក់ថា ក្រុមការងារនាយកដ្ឋានធនធានទឹក គ្រោងនឹងបញ្ចូលទឹកក្នុងកសិណអង្គរធំឲ្យបានឆាប់ៗ ហើយលោកទទួលស្គាល់ថា ការបញ្ចូលទឹកនៅឆ្នាំនេះ មានភាពយឺតយ៉ាវបន្តិចដែរ។ មូលហេតុ បើតាមការលើកឡើងរបស់មន្ត្រីជំនាញទឹក គឺដោយសារ ទឹកនៅខាងលើមានបរិមាណតិច ហើយមួយផ្នែកទៀតត្រូវបញ្ចូលទៅក្នុងទឹកស្ទឹងសៀមរាប ក្នុងបំណងដើម្បីលាងសម្អាតស្ទឹង។

អ្នកជំនាញទឹករបស់អាជ្ញាធរជាតិអប្សរា លោក សុឃីម បានឲ្យដឹងទៀតថា ក្នុងរដូវប្រាំងកន្លងទៅ បញ្ហាកង្វះទឹកបានកើតឡើងស្ទើរទូទាំងប្រទេស ការណ៍នេះធ្វើឲ្យមានតម្រូវការទឹកក្រោមដីច្រើន ជាពិសេសនៅតាមអូរ ស្ទឹង។ល។ លោក សុឃីម បញ្ជាក់ថា ទោះរដូវវស្សានៅឆ្នាំនេះ មានភ្លៀងធ្លាក់ច្រើនជាងឆ្នាំទៅក៏ពិតមែន តែវាត្រូវការបំពេញផ្ទៃក្រោមដីច្រើន ទើបបណ្តាលឲ្យទឹកនៅផ្នែកខាងលើមានបរិមាណតិច។

ចំពោះការបញ្ចូលទឹកក្នុងកសិណខ្លោងទ្វារទន្លេអុំវិញ លោក សុឃីម ថាគ្រោងប្រើពេលចាប់ពីមួយសប្តាហ៍ទៅកន្លះខែ ដោយប្រើប្រាស់ប្រព័ន្ធបង្ហូរទឹកបែបធម្មជាតិ តែលោកថា វាអាស្រ័យលើបរិមាណទឹកពីលើភ្នំគូលេនមកដែរ៕