ជាតិ
សេដ្ឋកិច្ច
ក្រសួងសេដ្ឋកិច្ច អល់អែកព្យាករកំណើនសេដ្ឋកិច្ចកម្ពុជា៧ភាគរយ
× ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ កាលពីថថ្ងៃទី៣០ខែសីហា បានចេញរបាយការណ៍តាមដានម៉ាក្រូសេដ្ឋកិច្ចកម្ពុជា ជាលើកដំបូងរបស់ខ្លួន ជាមួយនឹងការព្យាករថា កម្ពុជានឹងមានកំណើនសេដ្ឋកិច្ច ៧ភាគរយក្នុងឆ្នាំ២០១៦ និងឆ្នាំ២០១៧។ ការព្យាករនេះ ហាក់នៅអល់អែក ខណៈដែលស្ថានភាពសេដ្ឋកិច្ចសកលកំពុងស្ថិតក្នុងភាពស្រពិចស្រពិល។
របាយការណ៍របស់ក្រសួងសេដ្ឋកិច្ច និងហិរញ្ញវត្ថុឲ្យដឹងថា វិស័យកសិកម្មអាចនឹងមានកំណើនល្អជាងឆ្នាំមុនបន្តិចគឺ ០,៥ ភាគរយក្នុងឆ្នាំ២០១៦ នេះ ខណៈកំណើនក្នុងវិស័យឧស្សាហកម្មថយខ្លះគឺ ១១,៤ភាគរយ។ ដោយឡែកវិស័យសេវាកម្មមានកំណើន ៦,៧ភាគរយ គឺយឺតជាងឆ្នាំមុន។
ការនាំចេញផលិតផលកាត់ដេរក្នុងឆមាសទី១ឆ្នាំនេះ មានតម្លៃ ៣,៤៩ ពាន់លានដុល្លារ កើនឡើង ១០,៨ភាគរយ បើធៀប ៣,១៥ពាន់លានដុល្លារក្នុងរយៈពេលដូចគ្នាកាលពីឆ្នាំ២០១៥ ។ ការនាំចេញផលិតផលប្រភេទនេះក្នុងឆ្នាំ២០១៦ នឹងនៅតែរក្សាកំណើនខ្លាំង និងខ្ពស់ជាងឆ្នាំមុន។ ប៉ុន្តែការវិនិយោគផ្ទាល់ពីបរទេស(FDI) និងទេសចរណ៍អាចនឹងមានការថមថយខ្លះ។ នេះបើតាមរបាយការណ៍ខាងលើ។
លទ្ធផលព្យាករណ៍របស់ក្រសួងសេដ្ឋកិច្ច និងហិរញ្ញវត្ថុ នៅពេលនេះ ស្ថិតក្នុងភាពស្ទាក់ស្ទើរនៅឡើយ គឺដោយសារស្ថានភាពសេដ្ឋកិច្ចអន្តរជាតិ។ របាយការណ៍បញ្ជាក់យ៉ាងដូច្នេះថា៖«ទស្សនវិស័យសេដ្ឋកិច្ចកម្ពុជាសម្រាប់ឆ្នាំ២០១៦ និងឆ្នាំ២០១៧ អាចនឹងមិនសម្រេចបានតាមការព្យាករ ប្រសិនបើសេដ្ឋកិច្ចរបស់ប្រទេសចិនធ្លាក់ចុះយ៉ាងកំហុក ឬអស្ថិរភាពទីផ្សារហិរញ្ញវត្ថុអន្តរជាតិកាន់តែមានស្ថានភាពធ្ងន់ធ្ងរភ្លាមៗ បន្ទាប់ពីការសម្រេចដកខ្លួនរបស់ចក្រភពអង់គ្លេសពីសហភាពអឺរ៉ុប(Brexit)»។
សេដ្ឋកិច្ចកម្ពុជាមានទំនាក់ទំនងយ៉ាងខ្លាំងនឹងសេដ្ឋកិច្ចប្រទេសចិន តាមរយៈជំនួយអភិវឌ្ឍន៍ លំហូរវិនិយោគ និងភ្ញៀវទេសចរ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត ថ្លែងថា សេដ្ឋកិច្ចកម្ពុជានៅតែរក្សាបានកំណើនរឹងមាំ ស្របពេលដែលសេដ្ឋកិច្ចពិភលោកនៅមានភាពមិនប្រាកដប្រជានៅឡើយ តែលោកជំរុញឲ្យស្ថាប័នពាក់ព័ន្ធត្រូវយកចិត្តទុកដាក់បន្ថែមទៀតពីការវិវត្តន៍សេដ្ឋកិច្ចនេះ។ លោកអះអាងយ៉ាងដូចនេះថា៖«យន្តហោះរបស់យើងនៅតែហោះស្រួលដដែល តែគ្រាន់តែពេលខ្លះយើងអាចឆ្លងកាត់តំបន់មានអាកាសធាតុមិនល្អ អ៊ីចឹងត្រូវរឹតខ្សែក្រវ៉ាត់ឲ្យបានល្អ»។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយមានប្រសាសន៍ថា របាយការណ៍ម៉ាក្រូសេដ្ឋកិច្ចនេះ មានភាពអាចទទួលយកបានច្រើន តែលោកបញ្ជាក់ថា តួរលេខម៉ាក្រូសេដ្ឋកិច្ចនេះ បានពីការគិតរកមធ្យមភាគ ដូច្នេះគេតែងតែឃើញមានគម្លាតរវាងអ្នកទទួលផលប្រយោជន៍ពីកំណើនសេដ្ឋកិច្ច៕
Tag:
GDP
កំណើនសេដ្ឋកិច្ច
វង្សី វិស្សុត
ច័ន្ទ សុផល
© រក្សាសិទ្ធិដោយ thmeythmey.com