ជាតិ
រយៈពេលពីរថ្ងៃ មានពលរដ្ឋចុះឈ្មោះបោះឆ្នោតជិត ៣ សែននាក់
×
គណៈកម្មការជាតិរៀបចំការបោះឆ្នោត បានចេញបង្ហាញទិន្នន័យនៃចំនួនប្រជាពលរដ្ឋដែលបានទៅចុះឈ្មោះបោះឆ្នោតក្នុងរយៈពេល ២ ថ្ងៃមកនេះ មានចំនួន ២៩០,៧២០ នាក់ នៅទូទាំងប្រទេសកម្ពុជា។
សេចក្តីជូនដំណឹងរបស់គណៈកម្មាធិជាតិរៀបចំការបោះឆ្នោត បញ្ជាក់ថា ក្នុងចំណោមរាជធានី-ខេត្តទាំង ២៥ មានរាជធានី- ខេត្ត ចំនួន ១៣ ដែលមានអ្នកចុះឈ្មោះបោះឆ្នោតលើសពី ១ ម៉ឺននាក់។ រាជធានីខេត្តទាំងនោះ មានជាអាទិ៍ នៅរាជធានីភ្នំពេញ មានពលរដ្ឋទៅចុះឈ្មោះបោះឆ្នោតចំនួន ៣១,៩០១ នាក់ ខេត្តព្រៃវែង ២១,២០០នាក់ ខេត្តកណ្តាល ២០,៧៤៩ នាក់ ខេត្តកំពង់ចាមមានចំនួន ១៨,២២០ នាក់ ខេត្តសៀមរាបមានចំនួន ១៨,៩៨៧ នាក់ និងខេត្តតាកែវ ១៨,០៥១ នាក់។
គណៈកម្មាធិការជាតិរៀបចំការបោះឆ្នោត បានវាយតម្លៃថា ការចុះឈ្មោះបោះឆ្នោតកន្លងមកនេះ ប្រពឹត្តទៅដោយរលូនល្អ តែមានបញ្ហាបច្ចេកទេសមួយចំនួនដែរ ដែលត្រូវដោះស្រាយ។ យ៉ាងណាគ.ជ.ប អះអាងថា បញ្ហាបច្ចេកទេសទាំងនោះ មិនប៉ះពាល់ដល់ដំណើរការនៃការចុះឈ្មោះបោះឆ្នោតឡើយ។
សូមបញ្ជាក់ថា បើតាមគ.ជ.ប មានប្រជាពលរដ្ឋខ្មែរចំនូន ៨,៩ លាននាក់ ដែលគ្រប់អាយុចុះឈ្មោះបោះឆ្នោត។ យុទ្ធនាការនៃការចុះឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ ចាប់ផ្តើមពីថ្ងៃទី ០១ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ ២០១៦ ហើយស្ថាប័នរៀបចំការបោះឆ្នោតនេះ ត្រៀមថវិកាចំនួន ២៨ លានដុល្លារសម្រាប់ប្រើប្រាស់ក្នុងពេលយុទ្ធនាការនេះ៕
Tag:
គ.ជ.ប
ចុះឈ្មោះបោះឆ្នោត
© រក្សាសិទ្ធិដោយ thmeythmey.com