ក្រសួងការបរទេសជប៉ុនមានមន្ត្រីដែលចេះភាសាខ្មែរស្ទាត់ជំនាញ១៤នាក់

ជាតិ

ក្រសួងការបរទេសជប៉ុនមានមន្ត្រីដែលចេះភាសាខ្មែរស្ទាត់ជំនាញ១៤នាក់

09, Sep 2016 , 4:04 pm

រូបភាព

ដោយ: អុឹង ចំរើន (Ung Chamroeun)

កម្ពុជា និងជប៉ុន មានទំនាក់ទំនងគ្នាតាំងពីដើមសតវត្សរ៍ទី១៧មកម្ល៉េះ។ ទំនាក់ទំនងការទូតរវាងប្រទេសទាំងពីរ បានចាប់ផ្តើមផ្លូវការនៅថ្ងៃទី៩ ខែមករា ឆ្នាំ១៩៥៣ ហើយតភ្ជាប់ឡើងវិញនៅឆ្នាំ១៩៩២ បន្ទាប់ពីកម្ពុជារួចផុតពីរបបខ្មែរក្រហម។ បច្ចុប្បន្នជប៉ុន-កម្ពុជា កាន់តែខិតជិតរកគ្នាតាមរយៈវិស័យការទូត ពាណិជ្ជកម្ម និងទេសចរណ៍។

សូមស្ដាប់សំឡេង៖

នៅក្រសួងការបរទេសជប៉ុន មន្ត្រីចំនួន១៤ដែលបម្រើការទាក់ទងនឹងកម្ពុជា សុទ្ធតែចេះភាសាខ្មែរយ៉ាងស្ទាត់ជំនាញ។ កាលពីសប្តាហ៍មុន អ្នកកាសែត៥រូប ត្រូវបានអញ្ជើញឲ្យទៅទស្សនកិច្ចរយៈពេល៤ថ្ងៃនៅក្នុងទីក្រុងតូក្យូ ហើយនៅពេលនោះ អ្នកស្រី Ai Onishi មន្ត្រីការិយាល័យអាស៊ី-អាគ្នេយ៍ទី១ និងជាអ្នកទទួលបន្ទុកផ្នែកទំនាក់ទំនងជាមួយកម្ពុជា បានអះអាងថា ក្រសួងការបរទេសជប៉ុនមានអ្នកចេះភាសាខ្មែរដ៏ស្ទាត់ជំនាញ១៤នាក់ ក្នុងនោះមានស្រី៣នាក់។

អ្នកស្រី Ai Onishi ដែលធ្លាប់បម្រើការនៅស្ថានទូតជប៉ុននៅកម្ពុជា និងធ្លាប់បានសិក្សាភាសាខ្មែររយៈពេល២ឆ្នាំនៅសាកលវិទ្យាល័យភូមិន្ទភ្នំពេញ បានបញ្ជាក់ប្រាប់អ្នកកាសែតខ្មែរថា មន្ត្រីជប៉ុនទាំង១៤ដែលចេះភាសាខ្មែរ មានមួយចំនួនបម្រើការនៅក្រសួងការបរទេសផ្នែកទំនាក់ទំនងជាមួយកម្ពុជា មួយចំនួនបម្រើការនៅស្ថានទូតជប៉ុននៅរាជធានី ក្នុងនោះមានលេខាទី២ទូត គឺអ្នកស្រី Kaori Tanabe ហៅ គន្ធា ហើយបុគ្គលិកមួយចំនួនទៀតបម្រើការនៅប្រទេសទីបីដែលពាក់ព័ន្ធនឹងកម្ពុជា។

អ្នកស្រី Ai Onishi បានរៀបរាប់ពីប្រវត្តិនៃទំនាក់ទំនងរវាងជប៉ុន-កម្ពុជាដែលចាប់ផ្តើមឡើងតាំងពីដើមសតវត្សរ៍ទី១៧ រហូតដល់មានការសិក្សាឃើញថា មានភូមិជប៉ុនមួយនៅឃុំពញ្ញាឮ ក្បែរឧត្តុង្គ។ ប្រទេសទាំងពីរភ្ជាប់ទំនាក់ទំនងការទូតផ្លូវការនៅថ្ងៃទី៩ ខែមករា ឆ្នាំ១៩៥៣ ហើយនៅឆ្នាំ១៩៥៤ កម្ពុជាបានលះបង់សិទ្ធិទាមទារសំណងដែលកងទ័ពជប៉ុនបង្កការខូចខាតកាលពីសង្គ្រាមលោកលើកទីពីរ។

នៅឆ្នាំ១៩៥៥ ព្រះករុណា ព្រះបាទសម្តេច ព្រះនរោត្តម សីហនុ បានបំពេញព្រះរាជទស្សនកិច្ចនៅជប៉ុន ហើយនៅពេលនោះ ប្រទេសទាំងពីរបានចុះសន្ធិសញ្ញាមិត្តភាពរវាងគ្នា។

ស្ថានទូតជប៉ុននៅកម្ពុជាត្រូវបានបិទនាសម័យខ្មែរក្រហម ហើយត្រូវបានបើកដំណើរការឡើងវិញនៅឆ្នាំ១៩៩២ ក្រោយកិច្ចព្រមព្រៀងសន្តិភាពក្រុងប៉ារីស។ បន្តបន្ទាប់មកទៀត ជប៉ុនបានដើរតួនាទីយ៉ាងសំខាន់ក្នុងការដំណើររៀបចំសន្តិភាពនៅកម្ពុជា តាមរយៈការបញ្ជូនកម្លាំង និងអ្នកសង្កេតការណ៍នាការបោះឆ្នោតសកលជាលើកដំបូង។

ថ្នាក់ដឹកនាំនៃប្រទេសទាំងពីរបានធ្វើការផ្លាស់ប្តូរទស្សនកិច្ចផ្លូវរដ្ឋជាបន្តបន្ទាប់។ ក្រៅពីទំនាក់ទំនងផ្នែកសេដ្ឋកិច្ច ប្រទេសទាំងពីររៀបចំពិធីផ្លាស់ប្តូរផ្នែកវប្បធម៌ និងរវាងប្រជាជន និងប្រជាជន ញឹកញាប់ផងដែរ។ អ្វីដែលគួរឲ្យកត់សម្គាល់នោះ ជប៉ុនគឺជាសហប្រធានជាមួយបារាំងនៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC) ដែលធ្វើការលើគម្រោងជុសជុលប្រាសាទបាយ័ន អង្គរវត្ត បន្ទាយក្តី និងសំបូរព្រៃគុក ជាដើម៕