ជាតិ
បទវិភាគ
ហេតុអ្វីកសិករខ្មែរបោះបង់សន្ទូង មកធ្វើស្រូវពង្រោះវិញ?
× ភ្នំពេញ៖ មួយរយៈពេលចុងក្រោយនេះ គេសង្កេតឃើញកសិករខ្មែរ ផ្លាស់ប្តូរទម្លាប់ ពីការធ្វើស្រែតាមរយៈការដកស្ទូង មកធ្វើស្រូវពង្រោះវិញ។ ការប្រែប្រួលរបៀបធ្វើស្រែនេះ គឺបណ្តាលមកពី កង្វះកម្លាំងពលកម្ម និងតម្លៃឈ្នួលឡើងថ្លៃ។
កន្លងមក ការធ្វើស្រែពង្រោះ គេឃើញមានតែនៅតំបន់ជាប់មាត់ទន្លេ បឹង ព្រែក ស្ទឹង ដែលជាតំបន់ដីមានជីជាតិ និងមានទឹកគ្រប់គ្រាន់ ប៉ុន្តែ បួនប្រាំឆ្នាំចុងក្រោយនេះ គេសង្កេតឃើញថា កសិករខ្មែរ រស់នៅតំបន់ខ្ពង់រាប និងតំបន់ភ្នំ ដែលជាកន្លែងខ្វះប្រភពទឹក ហើយធ្លាប់ធ្វើស្រែតាមរយៈការដកស្ទូងនោះ បែរមកធ្វើស្រូវពង្រោះវិញ បើទោះបីពួកគេទទួលបានទិន្នផលទាបក៏ដោយ។
តើមូលហេតុអ្វីបានជាកសិករខ្មែរចង់ធ្វើស្រូវពង្រោះ?
កសិករ ដែលធ្វើស្រែតាមរយៈការដកស្ទូង គឺជាកសិករ ដែលរស់នៅតំបន់ខ្ពស់រាប និងភ្នំ គ្មានទឹកគ្រប់គ្រាន់ ដីមិនសូវមានជីជាតិ ព្រមទាំងធ្វើស្រែពឹងលើទឹកភ្លៀង។ ពួកគេធ្វើស្រែរបៀបនេះ តាំងដូនតាមក ពីព្រោះ សន្ទូង គឺមានភាពស៊ាំនិងអាកាសធាតុ និងកង្វះទឹកបានយូរជាងសំណាប និងទទួលបានទិន្នផលខ្ពស់ជាង ការធ្វើស្រូវពង្រោះ។ ប៉ុន្តែ បច្ចុប្បន្ន កសិករជាច្រើន ងាកមកធ្វើស្រែពង្រោះវិញ ដោយសារ កង្វះកម្លាំងពលកម្មរបស់យុវជន។ ការរីកចម្រើននូវរោងចក្រកាត់ដេរទាំងនៅទីក្រុង និងតាមបណ្តាខេត្ត បានអូសទាញយុវជនខ្មែរ ឲ្យបោះបង់ដីស្រែ មកធ្វើកម្មករកម្មការនីរោងចក្រ។ មួយវិញទៀត កង្វះកម្លាំងយុវជននោះហើយ ទើបធ្វើឲ្យតម្លៃឈ្នួលដកស្ទូងមានការកើនឡើង ដែលជាបន្ទុកបន្ថែមដល់កសិករ ខណៈផលស្រូវពឹងផ្អែកលើទឹកភ្លៀង។ យ៉ាងណាក៏ដោយ ការធ្វើស្រូវពង្រោះ ដ្បិតទទួលបានទិន្នផលទាប តែកសិករចំណេញវេលា ដើម្បីធ្វើការងារទីពីរទៀត។
យ៉ាងក៏ដោយ ការផ្លាស់ប្តូរទម្លាប់នេះ ក៏មិនមែនជារឿងល្អទាំងអស់នោះទេ។ ការធ្វើស្រែជាលក្ខណៈគ្រួសារដែលទទួលបានទិន្នផលទាបបែបនេះ កសិករនឹងប្រឈមកង្វះស្បៀងអាហារ និង រង់ចាំទិញអង្ករ និងផលិតផលកសិកម្មដទៃទៀតពីប្រទេសជិតខាង។ បន្ថែមពីនេះ ចរន្តនេះ នឹងជំរុញឲ្យផលិតកសិកម្មឡើងថ្លៃ ដែលធ្វើឲ្យចំណូលពលរដ្ឋ និងទំនិញនៅលើទីផ្សារ មិនមានតុល្យភាព ពោល គឺរកចំណូលបានតិច តែទំនិញទីផ្សារមានតម្លៃខ្ពស់។ ម្យ៉ាងវិញទៀត ការបោះបង់ការធ្វើស្រែចម្ការកាន់តែច្រើនរបស់យុវជន បានធ្វើមានលំហូរចំណាកស្រុកទៅទីប្រជុំជន និងក្រៅប្រទេសកាន់តែច្រើន ដែលធ្វើទីជនបទ ដែលធ្លាប់មានភាពមមាញឹក ក្លាយជាជនបទសោះកក្រោះស្ងាត់ជ្រងំទៅវិញ។
ដូច្នេះ ការហាមឃាត់ពលរដ្ឋមិនឲ្យផ្លាស់ប្តូរទម្លាប់ធ្វើស្រែ មិនមែនជាដំណោះស្រាយឡើយ តែការពង្រីកប្រព័ន្ធធារាស្ត្រ និងថែរក្សាទំនប់ប្រឡាយដែលមានស្រាប់ គឺជាវិធីដ៏ល្អបំផុតដើម្បីទាក់ទាញកម្លាំងយុវជនខ្មែរឲ្យចាប់អារម្មណ៍លើវិស័យកសិកម្ម។ លើសពីនេះ ក្រសួងកសិកម្ម រុក្ខាប្រមាញ់ និងនេសាទ គួរពន្លឿនការចុះផ្តល់បច្ចេកទេស ដើមទុន រកទីផ្សារ និងលើកគម្រោងផ្សេងៗក្នុងការជួយកសិករ ដើម្បីលើកទឹកចិត្តកសិករកុំឲ្យបោះបង់ដីស្រែ និងជំរុញយុវជនឲ្យមានការងារនៅថ្នាក់មូលដ្ឋាន ដែលអាចប្រែក្លាយជនបទស្ងប់ស្ងាត់ ទៅជាជនបទ ដែលមានផលដំណាំគ្រប់ប្រភេទ និងធម្មជាតិស្រស់បំព្រង ព្រមទាំងអាចបង្កើតសុខុមរមនាក្នុងគ្រួសារខ្មែរទាំងពេលបច្ចុប្បន្ន និងទៅថ្ងៃអនាគតទៀតផង៕
Tag:
កសិករ
ស្រូងពង្រោះ
© រក្សាសិទ្ធិដោយ thmeythmey.com