ជាតិ
នយោបាយជាតិ
សម្តេច ហ៊ុន សែន បញ្ជាឲ្យកំចាត់ចោលរាល់សកម្មភាពដែលបំផ្លាញសន្តិសុខជាតិ
× សម្តេចនាយករដ្ឋមន្ត្រី ហ៊ុន សែន តាមរយៈហ្វេសប៊ុករបស់ខ្លួននៅថ្ងៃនេះ បានសរសេរថា សម្តេចបានបញ្ជាដល់គ្រប់កម្លាំងមានសមត្ថកិច្ចត្រៀមខ្លួនកំចាត់ចោលនូវរាល់សកម្មភាពខុសច្បាប់ទាំងអស់ដើម្បីការពារនូវភាពសុខសាន្តរបស់ប្រជាជន។ សាររបស់ប្រមុខរដ្ឋាភិបាលកម្ពុជា កើតឡើងតែប្រមាណ២ម៉ោងប៉ុណ្ណោះ ក្រោយគណបក្សប្រឆាំងចេញសេចក្តីប្រកាសសម្រេចរៀបចំផែនការធ្វើមហាបាតុកម្មអហិង្សា។
ជាមួយនឹងការបង្ហោះរូបថតក្នុងឯកសណ្ឋានយោធា សម្តេច ហ៊ុន សែន បានកត់សម្គាល់ថា ពីរថ្ងៃជាប់គ្នារួចមកហើយ ដែលមេដឹកនាំបក្សប្រឆាំងបានគំរាមរៀបចំធ្វើមហាបាតុកម្មដើម្បីទាមទាររបស់ដែលហៅថាដំណោះស្រាយនយោបាយ។
សម្តេចបានវាយបកថា៖ «មិនមានដំណោះស្រាយនយោបាយណាដែលអាចរកឃើញតាមរយៈបក្សនយោបាយនោះឡើយ ព្រោះវាជាសមត្ថកិច្ចរបស់តុលាការ។ បុគ្គលដែលធ្វើខុស កុំយកប្រទេសជាតិធ្វើជាចំណាប់ខ្មាំង កុំយកបក្សនយោបាយ ធ្វើជាជម្រកបិទបាំងនូវកំហុសរបស់ខ្លួន»។
សម្តេចបានសង្កត់ធ្ងន់ថា៖ «ខ្ញុំបញ្ជាដល់គ្រប់កម្លាំងមានសមត្ថកិច្ចត្រៀមខ្លួនកំចាត់ចោលនូវរាល់សកម្មភាពខុសច្បាប់ទាំងអស់ដើម្បីការពារនូវភាពសុខសាន្តរបស់ប្រជាជន។ ដោយតម្លៃណាក៏ដោយ គឺត្រូវការពារស្ថេរភាពនយោបាយសន្តិសុខសណ្តាប់ធ្នាប់សង្គមឱ្យខានតែបាន ព្រោះវាជាតម្រូវការរបស់ជាតិនិងប្រជាជន»។
ជាមួយនឹងការលើកឡើងថា វាយពស់ត្រូវវាយក្បាលមុន សម្តេច ហ៊ុន សែន បញ្ជាក់ថា៖ «នេះមិនមែនជាការគំរាមទេ តែវាធ្ងន់ជាងគំរាមទៅទៀត ព្រោះជាប្រភេទនៃបទបញ្ជាដល់កម្លាំងរបស់រាជរដ្ឋាភិបាលទាំងអស់ត្រៀមខ្លួនកំចាត់ចោលរាល់កម្លាំងដែលធ្វើសកម្មភាពបំផ្លាញសន្តិសុខជាតិ ហើយខ្ញុំមានសិទ្ឋិ និងនិយាយរបៀបនេះព្រោះវាជាសិទ្ធិអំណាចនាយករដ្ឋមន្ត្រី»។
សូមបញ្ជាក់ថា នៅថ្ងៃចន្ទ ទី១២ ខែកញ្ញា នេះ គណៈកម្មាធិការអចិន្ត្រៃយ៍គណបក្សសង្គ្រោះជាតិក្រោមដឹកនាំកិច្ចប្រជុំរបស់ឯកឧត្តម កឹម សុខា ដែលជាប្រធានស្តីទី បានសម្រេចជាផ្លូវការ រៀបចំផែនការធ្វើមហាបាតុកម្មអហិង្សា ទាមទារឲ្យបរិយាកាសនយោបាយវិលមករកភាពប្រតីភាពឡើងវិញ។
បើតាមសេចក្តីប្រកាសព័ត៌មានរបស់បក្សប្រឆាំង មហាបាតុកម្មអហិង្សា គឺដើម្បីទាមទារឲ្យបរិយាកាសនយោបាយ មានភាពប្រក្រតីឡើងវិញ ដើម្បីធានាការបោះឆ្នោតនៅពេលខាងមុខនេះ មានភាពសេរី ត្រឹមត្រូវ យុត្តិធម៌ និងស្មើភាព តាមរយៈដំណោះស្រាយនយោបាយរួមគ្នា។
យ៉ាងណាក៏ដោយ គម្រោងធ្វើមហាបាតុកម្មអហិង្សានេះ គណបក្សសង្គ្រោះជាតិ មិនទាន់បានប្រកាសពីកាលបរិច្ឆេទច្បាស់លាស់នៅឡើយទេ៕
សេចក្តីប្រកាសព័ត៌មានរបស់គណបក្សសង្គ្រោះជាតិ
Tag:
សម្តេច ហ៊ុន សែន
មហាបាតុកម្ម
© រក្សាសិទ្ធិដោយ thmeythmey.com