កីឡាជាតិ
ជាតិ
AFF U19 Championship៖ យុវជនកម្ពុជា ប៉ះ ឡាវ នៅហាណូយនាម៉ោង៤រសៀលនេះ
×
ក្រុមយុវជនជម្រើសជាតិ U19 កម្ពុជា ត្រូវតទល់ជាមួយក្រុមយុវជនជម្រើសជាតិ U19 ឡាវ នៅកីឡដ្ឋាន Sân van dong Hàng Ðay ក្នុងព្រឹត្តិការណ៍ដណ្តើមពានរង្វាន់ AFF U19 Championship 2016 នៅទីក្រុងហាណូយវេលាម៉ោង៤រសៀលនេះ។ វាជាការប្រកួតលើកទី២ក្នុងពូល B របស់ក្រុម U19 កម្ពុជា បន្ទាប់ពីបានចាញ់ក្រុមជម្រើសជាតិ U19 អូស្ត្រាលី ២-០ ក្នុងថ្ងៃបើកឆាក។
ក្រុមជម្រើសជាតិ U19 កម្ពុជាដែលឈរក្នុងពូល B នឹងធ្វើការប្រជែងជាមួយក្រុមជម្រើសជាតិ U19 ឡាវ ដើម្បីស្វែងរកពិន្ទុសម្រាប់ឡើងទៅកាន់វគ្គបន្ត។ វាជាការប្រកួតលើកទី២ហើយសម្រាប់ក្រុម U19 កម្ពុជាក៏ដូចជា U19 ឡាវ ក្នុងពានរង្វាន់សហព័ន្ធបាល់ទាត់អាស៊ីប្រចាំឆ្នាំ២០១៦នេះ។ ប៉ុន្តែក្រុមទាំងពីរសុទ្ធតែបរាជ័យសម្រាប់ការប្រកួតលើកទី១ ដោយ U19 កម្ពុជាចាញ់ U19 អូស្ត្រាលី ២-០ ខណៈ U19 ឡាវចាញ់ U19 ថៃ ២-១។
ការប្រកួតលើកទី២ដែលធ្វើឡើងនៅកីឡដ្ឋាន Sân van dong Hàng Ðay នាវេលាម៉ោង៤ល្ងាចនេះ ប្រហែលជាមិនបង្ករភាពលំបាកដូចលើកទី១សម្រាប់កម្ពុជានោះឡើយ ព្រោះក្រុមយុវជន U19 ឡាវ មានមាឌ និងកម្ពស់ព្រមទាំងបច្ចេកទេស សមត្ថភាពប្រហាក់ប្រហែលនឹងក្រុមយុវជន U19 កម្ពុជា។
បើមើលពីប្រវត្តិនៃការជួបគ្នារវាងក្រុមទាំងពីរនៅឆ្នាំ២០១៥ ដែលឡាវធ្វើជាម្ចាស់ផ្ទះក្រុម U19 កម្ពុជាបានស្មើ ០-០ ជាមួយក្រុមម្ចាស់ផ្ទះមួយនេះ។ ប៉ុន្តែនៅឆ្នាំ២០១៣ ក្រុម U19 កម្ពុជា បានចាញ់ក្រុម U19 ឡាវ ក្នុងលទ្ធផល ៣-១ នៅលើទឹកដីប្រទេសឥណ្ឌូនេស៊ី។
ដោយឡែក បើគិតចាប់ពីឆ្នាំ២០០៩ រហូតដល់ឆ្នាំ២០១៥ ក្រុម U19 កម្ពុជាមិនដែលទទួលបានចំណាត់ថ្នាក់ល្អនោះទេ ពោលគឺមិនដែលឆ្លងផុតវគ្គជម្រុះតាមពូលនោះឡើយ។ ប៉ុន្តែក្រុមយុវជនជម្រើសជាតិ U19 ឡាវធ្លាប់ទទួលបានចំណាត់លេខ៣កាលពីឆ្នាំ២០១៥ ដែលខ្លួនធ្វើជាម្ចាស់ផ្ទះ និងឡើងដល់វគ្គពាក់កណ្តាលផ្តាច់ព្រ័ត្រនៅឆ្នាំ២០១៣ ដែលឥណ្ឌូនេស៊ីធ្វើជាម្ចាស់ផ្ទះ ដោយក្រុមនេះបានចាញ់វៀតណាមក្នុងលទ្ធផល ១-០។
ពូល B នេះដែរក៏មានការប្រកួតពីរគូទៀតផងដែរ ដោយក្រុមយុវជន U19 មីយ៉ាន់ម៉ា ជួបជាមួយក្រុមយុវជន U19 អូស្ត្រាលីវេលាម៉ោង៣:៣០នាទីនៅកីឡដ្ឋាន Vietnam Youth Training Centre។ ចំណែកក្រុមយុវជន U19 ឥណ្ឌូនេស៊ី ត្រូវតទល់ជាមួយក្រុមយុវជន U19 ថៃ នាវេលាម៉ោង៧យប់នៅកីឡដ្ឋាន Sân van dong Hàng Ðay។
គួរបញ្ជាក់ថា ក្នុងពូល B ដែលមាន៦ក្រុម ក្នុងនោះក្រុមយុវជន U19 អូស្ត្រាលី, ក្រុមយុវជន U19 ថៃ និង U19 មីយ៉ាន់ម៉ា មានម្នាក់៣ពិន្ទុដូចគ្នា។ ចំណែក U19 កម្ពុជា, U19 ឡាវ និង U19 ឥណ្ឌូនេស៊ី មិនទាន់មានមួយពិន្ទុក្នុងដៃនោះទេ។ គួរបញ្ជាក់ផងដែរថា សម្រាប់ការប្រកួតក្នុងពូល A កាលពីម្សិលមិញ ក្រុម U19 ម៉ាឡេស៊ី លត់ក្រុម U19 ហ្វីលីពីន ៥-០ និងក្រុម U19 វៀតណាមយកឈ្នះលើក្រុម U19 ទីម័រខាងកើត ៤-១៕
Tag:
បាល់ទាត់
U19
AFF U19 Championship 2016
© រក្សាសិទ្ធិដោយ thmeythmey.com