កីឡាជាតិ
ជាតិ
AFF U19៖ កម្ពុជា ប៉ះជើងខ្លាំងថៃ ដែលខ្លួនមិនធ្លាប់ឈ្នះ និងមិនដែលទាត់ចូល
× ក្រុមកីឡាករបាល់ទាត់ជម្រើសជាតិយុវជនអាយុក្រោម១៩ឆ្នាំកម្ពុជា ត្រូវជួបថៃ ម្ចាស់ជើងឯក៤សម័យកាល និងជាម្ចាស់ការពារតំណែងជើងឯកនាវេលាម៉ោង៤ល្ងាចនេះ ក្នុងព្រឹត្តិការណ៍ AFF U19 Championship នៅទីក្រុងហាណូយ ប្រទេសវៀតណាម។
បន្ទាប់ពីការប្រកួតពីលើកកន្លងមកនៅក្នុងពូល B នៃព្រឹត្តិការណ៍ AFF U19 Championship កម្ពុជា រកបាន៣ពិន្ទុ ក្រោយចាញ់អូស្ត្រាលី ២-០ និងឈ្នះឡាវ ខណៈថៃ ឈ្នះឡាវ ២-១ ហើយវាយបកយកឈ្នះ ឥណ្ឌូនេស៊ី ៣-២ នាការប្រកួតកាលពីថ្ងៃពុធកន្លងមក។
គ្រូបង្វឹកជនជាតិជប៉ុន លោក Ohara Kazunori បានផ្លាស់ប្តូរកីឡាកររហូតដល់ទៅ១០នាក់រវាងការប្រកួតជាមួយអូស្ត្រាលី និងការប្រកួតជាមួយឡាវ ដោយអ្នកចាំទី កែវ សុខសិលា គឺជាកីឡាករតែម្នាក់គត់ដែលលេងបានទាំងពីរប្រកួត។
ថៃ ដែលបានឈ្នះតំណែងជើងឯក៤លើក និងជាម្ចាស់ការពារតំណែងជើងឯក បានយកឈ្នះកម្ពុជារហូតនាជំនួប៤លើកកន្លងមក ដោយសម្រេចបានលទ្ធផល ៧-០ នៅឆ្នាំ២០០៧, ៣-0 នៅឆ្នាំ២០០៩, ៥-០ នៅឆ្នាំ២០១១ និង ៦-០ នៅឆ្នាំ២០១៥ ។
នៅក្នុងពូល B អូស្ត្រាលី និងថៃ កំពុងនាំមុខគេក្នុងតារាង ដោយមាន៦ពិន្ទុដូចគ្នា ពីការប្រកួតពីរលើក ខណៈកម្ពុជា និងមីយ៉ាន់ម៉ា មាន៣ពិន្ទុ រីឯឥណ្ឌូនេស៊ី និងឡាវ ចាញ់ទាំងពីរប្រកួត។
កម្មវិធីប្រកួតនៅថ្ងៃនេះ៖
-១៥:៣០៖ ឥណ្ឌូនេស៊ី ជួប អូស្ត្រាលី
-១៦:០០៖ ថៃ ជួប កម្ពុជា
-១៩:០០៖ ឡាវ ជួប មីយ៉ាន់ម៉ា
Tag:
បាល់ទាត់
U19
AFF U19 Championship
© រក្សាសិទ្ធិដោយ thmeythmey.com