ប្រធានបក្សប្រឆាំង ប្រកាសរៀបចំមហាបាតុកម្មឲ្យខាងតែបាន ក្រោយពីរដ្ឋាភិបាលព្រមានបង្ក្រាប

ជាតិ

នយោបាយជាតិ

ប្រធានបក្សប្រឆាំង ប្រកាសរៀបចំមហាបាតុកម្មឲ្យខាងតែបាន ក្រោយពីរដ្ឋាភិបាលព្រមានបង្ក្រាប

16, Sep 2016 , 11:04 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ប្រធានគណបក្សសង្គ្រោះជាតិ ឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេសនោះ បានប្រកាសជំហថា គណបក្សលោកនឹងរៀបចំមហាបាតុកម្មអហិង្សាឲ្យខាងតែបាននៅពេលឆាប់ៗខាងមុខនេះ ដើម្បីប្រឆាំងនឹងរដ្ឋាភិបាល។ ការប្រកាសរបស់ឯកឧត្តម សម រង្ស៊ី បែបនេះស្របពេលដែលរដ្ឋាភិបាលព្រមានបង្ក្រាបដោយគ្មានការលើកលែង។

ថ្លែងចំពោះមុខប្រជាពលរដ្ឋខ្មែរនៅប្រទេសបារាំង ឯកឧត្តម សម រង្ស៊ី បានអះអាងថា គណបក្សលោកនៅតែប្រើប្រាស់នយោបាយអហិង្សាដោយរង់ចាំការដោះស្រាយគ្នាដោយសន្តិវិធីដដែល ។ ប៉ុន្តែបើមិនមានដំណោះស្រាយទេនោះ គណបក្សលោកក៏មិនអាចនៅស្ងៀមដែរ ពោលមានន័យថា បាតុកម្មប្រឆាំងរដ្ឋាភិបាលនឹងផ្ទុះឡើង។ «តែបើយើងហ៊ានងើបទាំងអស់គ្នា ងើបគ្រប់ខេត្ត បាតុកម្មគ្រប់សាលាឃុំ បាតុកម្មគ្រប់សាលាស្រុក បាតុកម្មគ្រប់សាលាខេត្ត បាតុកម្មរាជធានីភ្នំពេញទន្ទឹមគ្នា តើពួកនេះមានកម្លាំងមកពីណាទៅបង្ក្រាបប្រជាពលរាស្ត្រ បើប្រជារាស្ត្រងើបទូទាំងប្រទេសដោយសន្តិវិធី។ យើងត្រូវតែរៀបចំគម្រោងនេះឲ្យទាល់តែបាន ក្នុងពេលឆាប់ៗខាងមុខនេះ»។ នេះជាការប្រកាសតាមរយៈវីដេអូឃ្លីបជាង៤នាទីនៅទីក្រុងប៉ារីស ដែលឯកឧត្តម សម រង្ស៊ី លើកឡើងថា បាតុកម្មនឹងកើតមានឡើង ព្រោះលោកបានស្ទង់មតិពីក្រុមយុវជនជាច្រើននាក់កន្លងមក ដែលហ៊ានចូលរួមបាតុកម្មជាមួយគណបក្សសង្គ្រោះជាតិ។ តែប្រធានបក្សប្រឆាំងរូបនេះ មិនបានបញ្ជាក់ពីពេលវេលាឲ្យបានច្បាស់លាស់ឡើយ។

ជុំវិញការប្រកាសធ្វើមហាបាតុកម្មរបស់គណបក្សសង្គ្រោះជាតិនេះ ប្រមុខរដ្ឋាភិបាលបានព្រមានកាលពីថ្ងៃទី១២ កញ្ញាថា លោកនឹងមិនអត់ឱនឡើយ រាល់បាតុកម្មខុសច្បាប់ដែលប្រឆាំងរដ្ឋាភិបាល។ សម្តេចនាយករដ្ឋមន្ត្រី ហ៊ុន សែន បានបញ្ជាដល់គ្រប់កម្លាំងមានសមត្ថកិច្ចត្រៀមខ្លួនកំចាត់ចោលនូវរាល់សកម្មភាពខុសច្បាប់ទាំងអស់ដើម្បីការពារនូវភាពសុខសាន្តរបស់ប្រជាជន។ សម្តេចបានសង្កត់ធ្ងន់ថា៖ «ខ្ញុំបញ្ជាដល់គ្រប់កម្លាំងមានសមត្ថកិច្ចត្រៀមខ្លួនកំចាត់ចោលនូវរាល់សកម្មភាពខុសច្បាប់ទាំងអស់ដើម្បីការពារនូវភាពសុខសាន្តរបស់ប្រជាជន។ ដោយតម្លៃណាក៏ដោយ គឺត្រូវការពារស្ថេរភាពនយោបាយសន្តិសុខសណ្តាប់ធ្នាប់សង្គមឱ្យខានតែបាន ព្រោះវាជាតម្រូវការរបស់ជាតិនិងប្រជាជន»។

សាររបស់ប្រមុខរដ្ឋាភិបាលកម្ពុជា កើតឡើងតែប្រមាណ២ម៉ោងប៉ុណ្ណោះ ក្រោយគណបក្សប្រឆាំងចេញសេចក្តីប្រកាសសម្រេចរៀបចំផែនការធ្វើមហាបាតុកម្មអហិង្សា មុននឹងសម្តេចបានវាយបកថា៖ «មិនមានដំណោះស្រាយនយោបាយណាដែលអាចរកឃើញតាមរយៈបក្សនយោបាយនោះឡើយ ព្រោះវាជាសមត្ថកិច្ចរបស់តុលាការ។ បុគ្គលដែលធ្វើខុស កុំយកប្រទេសជាតិធ្វើជាចំណាប់ខ្មាំង កុំយកបក្សនយោបាយ ធ្វើជាជម្រកបិទបាំងនូវកំហុសរបស់ខ្លួន»។

ក្រោយសម្ដេច ហ៊ុន សែន ប្រកាសបង្ក្រាបនោះ គេសង្កេតឃើញមានរថយន្តដឹកកងទ័ពជាច្រើនបានបើកចល័តពីមុខទីស្នាក់ការគណបក្សសង្គ្រោះជាតិទាំងយប់។ ចំណែកមេបញ្ជាការកងអង្គរក្ស និងមេបញ្ជាការកងទ័ពគ្រប់លំដាប់ថ្នាក់ បានចេញសេចក្ដីថ្លែងការណ៍ជាបន្តបន្ទាប់ ដោយបញ្ជាក់ពីគោលជំហគោរពនិងអនុវត្តតាមការបញ្ជារបស់សម្ដេចនាយករដ្ឋមន្ត្រី ហ៊ុន សែន ។

គណបក្សសង្គ្រោះជាតិ ចាត់ទុកការប្រើប្រាស់កងកម្លាំងប្រដាប់អាវុធនេះ ជាការបំភិតបភំភ័យដល់មេដឹកនាំ តំណាងរាស្ត្រគណបក្ស និងប្រជាពលរដ្ឋ ដែលអាចឲ្យប៉ះពាល់ដល់ដំណើរការបោះឆ្នោត និងលទ្ធិប្រជាធិបតេយ្យកម្ពុជា។ តែយ៉ាងណាសម្រាប់អ្នកវិភាគឯណោះវិញ យល់ថា គណបក្សមានអាសនៈក្នុងរដ្ឋសភាទាំងពីរ កំពុងយកកម្ពុជាធ្វើជាល្បែង ដើម្បីកេងចំណេញរៀងៗខ្លួន ដែលវាគ្មានអ្វីចំណេញដល់ប្រទេសជាតិឡើយ៕