ជាតិ
បទយកការណ៍ / បទសម្ភាសន៍
បណ្តាញសង្គម ធ្វើឲ្យយុវជនចូលគេងយប់ជ្រៅ
× ភ្នំពេញ៖ ការរីកចម្រើននៃបច្ចេកវិទ្យា និងបណ្តាញសង្គម បានធ្វើឲ្យយុវជនខ្មែរបច្ចុប្បន្ន ចូលដំណេកយប់ជ្រៅ។ បើតាមយុវជន ដែលសារព័ត៌មានថ្មីៗ បានសាកសួរ ពួកគេបានចំណាយពេលជាច្រើនម៉ោង ពិសេសនៅពេលយប់តែម្តង ប្រើប្រាស់ហ្វេសប៊ុក ឬបណ្តាញសង្គមផ្សេងទៀត ដើម្បីកម្សាន្តអារម្មណ៍ តាមដានព័ត៌មាន និងទំនាក់ទំនាក់ជាមួយមិត្តភក្តិ។ ក្រៅពីបណ្តាញសង្គម ពួកគេក៏ចំណាយពេលដើម្បីមើលមេរៀនដែរ។ អ្នកជំនាញបានបញ្ជាក់ថា ការគេងមិនគ្រប់គ្រាន់ អាចបង្កប៉ះពាល់ដល់សុខភាពយ៉ាងខ្លាំង។
ខុសពីប្លែកពីសម័យមិនទាន់រីកចម្រើនផ្នែកបច្ចេកវិទ្យា និងបណ្តាញសង្គម កាលនោះយុវជន បានចូលដំណេកតាំងពីក្បាលព្រលប់ ប៉ុន្តែបច្ចុប្បន្ននេះ យុវជនជាច្រើន បានអះអាងដូចៗគ្នាថា ពួកគេខ្លះចូលគេងម៉ោង១០យប់ និងខ្លះទៀត រហូតដល់ម៉ោង១២យប់។ តើហេតុអ្វី បានជាពួកគេចូលគេងយប់ជ្រៅ?
កញ្ញា ឡូត ភក្តី និស្សិតឆ្នាំទី១ នៅរាជធានីភ្នំពេញ បានឲ្យដឹងថា ជាញឹកញាប់ កញ្ញា ចូលគេងនៅម៉ោង១០យប់ តែជួលកាលក៏ជ្រុលដល់ម៉ោង១២ ឬម៉ោង២យប់ក៏មានដែរ។ បើតាម កញ្ញា ភក្តី ក្រោយញ៉ាំបាយពេលល្ងាច នាងបានចំណាយពេល២ម៉ោង សម្រាប់មើលហ្វេសប៊ុក ខណៈពេលវេលាខ្លះទៀត គឺសម្រាប់អានសៀវភៅ និងនិយាយទូរសព្ទជាមួយមិត្តភក្តិ។ «ខ្ញុំលេងហ្វេសប៊ុកច្រើន ពីព្រោះខ្ញុំចង់តាមដានព័ត៌មានសង្គម និងនយោបាយនៅកម្ពុជា»។ នេះជាបញ្ជាក់របស់ភក្តី មុននឹងបញ្ជាក់បន្ថែមថា ក្រៅពីមើលព័ត៌មាន នាងចំណាយពេលជជែក(Chat) ជាមួយមិត្តភក្តិផងដែរ។ មានវ័យ១៨ឆ្នាំ កញ្ញាមានសម្បុរសណ្តែកបាយរូបនេះ បន្តថា ការគេងបានតិចនេះ បានធ្វើកញ្ញាធ្លាក់ខ្លួនឈឺម្តងម្កាលទៀតផង។
ការចូលគេងយប់ជ្រៅ ក៏ក្លាយទៅជាទម្លាប់របស់ កញ្ញា គុល ចំរើន បុគ្គលិកផ្នែករដ្ឋបាល នៅរោងចក្រកាត់ដេរមួយនៅឯខេត្តកំពង់ឆ្នាំង។ កញ្ញា ចំរើន បានប្រាប់ថា នាងផ្តើមប្រើប្រាស់ហ្វេសប៊ុកនៅឆ្នាំ២០១៣ និងបានចំណាយប្រមាណ៣ម៉ោង ក្នុងមួយថ្ងៃ ប្រើប្រាស់បណ្តាញសង្គមមួយនេះ ហើយភាគច្រើនគឺនៅពេលមុនចូលដំណេកតែម្តង។ «ជាញឹកញាប់ ខ្ញុំគេងនៅម៉ោង១០ ប៉ុន្តែពេលខ្លះក៏នៅរហូតដល់ម៉ោង១២អធ្រាត្រ។ ខ្ញុំចំណាយពេលសម្រាប់មើលព័ត៌មានតាមហ្វេសប៊ុក និងChat ជាមួយមិត្តភក្តិ»។ នេះជាការបញ្ជាក់របស់ចំរើន ដោយបន្ថែមថា ដោយសារការលេងហ្វេសប៊ុក នៅពេលយប់ដោយមិនបានបើកភ្លើង និងអង្គុយធ្វើការនៅមុខកុំព្យូរមួយថ្ងៃប្រមាណ១០ម៉ោងទៀតនោះ បានធ្វើឲ្យនាង មានភ្នែកម្ញូម (១៥០ដឺក្រេ) មកដល់បច្ចុប្បន្ន។ ខុសពីកាលពី៥ឆ្នាំមុន ដែលចំរើនតែងតែចូលគេងនៅម៉ោងជាង៨យប់នោះ តែបច្ចុប្បន្ន នាងមានទម្លាប់គេងយប់ជ្រៅ និងពេលខ្លះ នាងមាន ជំងឺគេងមិនលក់ទៀតផង។ កញ្ញាបញ្ជាក់មូលហេតុយ៉ាងដូច្នេះថា៖«រាល់ថ្ងៃ បើអត់បើកហ្វេសប៊ុក គឺពិតជាលំបាក ពីព្រោះ ពេលលេងហ្វេសប៊ុក ធ្វើឲ្យខ្ញុំមានមិត្តភក្តិច្រើន។ ម្យ៉ាងទៀត ខ្ញុំដេកមិនលក់ ព្រោះគិតច្រើន ដូច្នេះបើមើលហ្វេសប៊ុក គ្រាន់កែអផ្សុកបានខ្លះ»។
ដោយឡែក លោក ចាន់ ភារុន និស្សិតនៅសាកលវិទ្យាល័យភូមិន្ទភ្នំពេញវិញ ក៏ចូលគេងយប់ជ្រៅផងដែរ គឺម៉ោង១១ ឬ១២យប់ ស្ទើររៀងរាល់ថ្ងៃ។ ខុសពីអ្នកខាងលើដែលចំណាយពេលមើលសៀវភៅ និងលេងហ្វេសប៊ុក ភារុនចូលគេងយប់ ក៏ព្រោះតែការងារជាអ្នករត់តុនៅភោជនីយដ្ឋានមួយនៅភ្នំពេញ។ ចេញម៉ោង១១យប់ ស្ទើររាល់ថ្ងៃ ធ្វើឲ្យយុវជនវ័យ២០ឆ្នាំរូបនេះ ត្រូវចូលគេងយប់ជ្រៅ ដែលធ្វើឲ្យលោកឈឺក្បាល និងអស់កម្លាំងម្តងម្កាលដែរ។ យ៉ាងណាក៏ដោយ បន្ទាប់ពីមកដល់ផ្ទះ ភារុនក៏ឆ្លៀតមើលហ្វេសប៊ុកកន្លះម៉ោង មុននឹងរូបគេចូលគេង។ អ្នកខេត្តកណ្តាលរូបនេះបញ្ជាក់យ៉ាងដូច្នេះ៖ «ឥឡូវទម្លាប់ហើយ ពេលថ្ងៃឈប់សម្រាក ក៏នៅលេងហ្វេសប៊ុករហូតដល់ម៉ោង១២យប់ដែរ ទើបចូលដេក»។
ដូចគ្នាដែរ កញ្ញា ឈឺន រតនា ក៏ពើបប្រទះនឹងបញ្ហានេះដែរ។ បើតាមរតនា ជារៀងរាល់ថ្ងៃ កញ្ញា ចូលគេងនៅម៉ោង១០ទៅម៉ោង១១យប់។ «ខ្ញុំលេងហ្វេសប៊ុកខ្លះ តែពេលវេលាភាគច្រើន គឺខ្ញុំរៀនត្រៀមប្រឡងគ្រូឧត្តមសិក្សា»។ នេះជាការបញ្ជាក់របស់រតនា ដោយបន្ថែមទៀតថា ក្រៅពីលេងហ្វេសប៊ុក និងអានសៀវភៅ កញ្ញាក៏ចំណាយពេលមើលព័ត៌មានផងដែរ។ ទម្លាប់គេងយប់ជ្រៅនេះ ថ្ងៃខ្លះ បានធ្វើឲ្យនិស្សិតវ័យ២២ឆ្នាំរូបនេះ មានត្របកភ្នែកខ្មៅ និងឈឺក្បាល បន្តិចបន្តួចទៀតផង។
ជុំវិញបញ្ហានេះ លោក វេជ្ជបណ្ឌិត និន សុខរង្សី នាយកវេជ្ជសាស្ត្រ Mengly J. Quach Student health Center ប្រចាំនៅសាលារៀនអន្តរទ្វីបអាមេរិកាំង(AIS) បានថ្លែងថា ការគេងមិនគ្រប់គ្រាន់ អាចបង្កប៉ះពាល់ដល់សុខភាពយ៉ាងខ្លាំង។ «ដំណេកមិនគ្រប់គ្រាន់ ធ្វើឲ្យប៉ះពាល់ដល់ផ្នែកអារម្មណ៍ ភ្លេចភ្លាំង តានតឹង ឡើងសម្ពាធឈាម និងបណ្តាលឲ្យប៉ះទង្គិចដល់ប្រព័ន្ធប្រសាទ និងប្រដាប់រម្លាយអាហារ»។ នេះការបញ្ជាក់របស់ លោក និន សុខរង្សី។ វេជ្ជបណ្ឌិតផ្នែកជំងឺទូទៅរូបនេះ បានបន្ថែមទៀតថា ការគេងគ្រប់គ្រាន់(៨ម៉ោង) និងការញ៉ាំចំណីឲ្យបានត្រឹមត្រូវ គឺជាកត្តាសំខាន់ ដែលយុវជនគួរស្វែងយល់ ដើម្បីថែរក្សាសុខភាពរបស់ខ្លួន។ លោកបន្តថា យុវជន គួរគេងឲ្យបានទៀតទាត់ ពីព្រោះការគេងយប់ជ្រៅពេក នឹងធ្វើឲ្យសុខភាពមានភាពខុសប្រក្រតី។ ទន្ទឹមគ្នានេះ លោកផ្តល់អនុសាសន៍ថា យុវជនគួរញ៉ាំម្ហូបអាហារណា ដែលបង្កលក្ខណៈងាយស្រួលដល់ដំណេក ដូចជា បន្លែសាឡាត់ ផ្លែឈើចម្រុះ ព្រមទាំងផឹកទឹកក្តៅឧណ្ហៗ ដោយចៀសវាងផឹកកាហ្វេ តែចត់ពេក ទឹកក្រូចមានជាតិហ្កាស់ និងស្រា ព្រមទាំងតបចំណីដែលមានជាតិជូរពេក ឬប្រៃពេក ព្រោះវាជាចំណីរំខានដល់ដំណេក។
ការរីកចម្រើនប្រព័ន្ធបច្ចេកវិទ្យា បណ្តាញសង្គម និងការអភវិឌ្ឍប្រទេស បានក្លាយជាមូលហេតុ ដែលអ្នកជំនាញអះអាងថា ធ្វើឲ្យមនុស្សចូលគេងយប់ជ្រៅ និងចំណាយពេលវេលាច្រើនជាមួយបណ្តាលសង្គម ដែលជាឧបករណ៍កម្សាន្ត ទទួលព័ត៌មាន និងភ្ជាប់មិត្តភក្តិនៅទូទាំងពិភពលោក៕
Tag:
ហ្វេសប៊ុក
យុវជន
© រក្សាសិទ្ធិដោយ thmeythmey.com