ជាតិ
នយោបាយជាតិ
លោក ទៀ បាញ់ នៅខាងស្តាំ រដ្ឋមន្រ្តីការពារជាតិឡាវនៅខាងឆ្វេង
×![]()
រដ្ឋមន្ត្រីក្រសួងការពារជាតិ លោក ទៀ បាញ់ បានបង្ហាញការរីករាយប្រសិនបើគណៈកម្មការនៃរដ្ឋសភាកោះហៅរូបលោកឲ្យចូលទៅបំភ្លឺពាក់ព័ន្ធនឹងសកម្មភាពរបស់យោធាកន្លងមក។
លោក ទៀ បាញ់ មិនខ្លាចរអានោះទេ បើសិនជាគណៈកម្មការនៃរដ្ឋសភាកោះហៅរូបលោកទៅបំភ្លឺទាក់ទងនឹងបញ្ហាយោធានោះ តែផ្ទុយទៅវិញលោកមានតែស្វាគមន៍ថែមទៀតផង។ ក្រោយពីជួបពិភាក្សាជាមួយរដ្ឋមន្ត្រីក្រសួងការពារជាតិឡាវ លោកចាន់សាម៉ន ចាន់ញ៉ាឡាត នៅទីស្តីការក្រសួងការពារជាតិ នៅរសៀលថ្ងៃទី ២២ ខែកញ្ញា លោក ទៀ បាញ់ បានបញ្ជាក់ប្រាប់អ្នកកាសែតបែបនេះថា៖« បើមានការកោះហៅ ខ្ញុំរីករាយបំផុត ដែលខ្ញុំមានឱកាសជម្រាបដល់អ្នកផងទាំងឡាយឲ្យបានដឹងថា តើកិច្ចការងារនោះយ៉ាងណាពាក់ព័ន្ធយោធា?ខ្ញុំរីករាយណាស់»។
ការឆ្លើយតបរបស់លោក ទៀ បាញ់ បែបនេះ ធ្វើឡើង បន្ទាប់ពីមន្ត្រីជាន់ខ្ពស់ និងជាតំណាងរាស្ត្រគណបក្សសង្គ្រោះជាតិ លោក សុន ឆ័យ បានប្រកាសពីបំណងចូលធ្វើការនៅរដ្ឋសភាវិញ ហើយរូបលោកកំពុងតែរៀបចំឯកសារដើម្បីកោះហៅរដ្ឋមន្ត្រីមួយចំនួនមកបំភ្លឺនៅរដ្ឋសភា។ លោក សុន ឆ័យ បានថ្លែងប្រាប់អ្នកកាសែតនៅពេលដែលលោកទៅសួរសុខទុក្ខមន្ត្រី និងសកម្មជនរបស់គណបក្សសង្គ្រោះជាតិ ដែលកំពុងជាប់ពន្ធនាគារព្រៃសថា ក្នុងចំណោមរដ្ឋមន្ត្រីដែលលោកគ្រោងកោះហៅ ក៏មានលោក ទៀ បាញ់ រដ្ឋមន្ត្រីក្រសួងការពារជាតិផងដែរ។ បញ្ហាដែលលោក សុន ឆ័យ ចង់សួរលោក ទៀ បាញ់ នោះ គឺពាក់ព័ន្ធនឹងសកម្មភាពរបស់យោធាដែលចេញសេចក្តីថ្លែងការណ៍ ឬបង្ហាញនិន្នាការគាំទ្រគណបក្សកាន់អំណាច។
និយាយដល់ចំណុចយោធាមាននិន្នាការគាំទ្របក្សកាន់អំណាចនេះលោក ទៀ បាញ់ បានឆ្លើយយ៉ាងខ្លីប្រាប់អ្នកកាសែតដូច្នេះថា៖«រឿងគេថា គេថាម៉េចក៏បានដែរ។ ព្រោះថា រឿងស ក៏គេថា ខ្មៅកើតដែរ។ រឿងមិនមាន គេថាមានកើតដែរ តែរឿងជាក់ស្តែង គឺជាក់ស្តែងផ្សេង»។
Tag:
ទៀ បាញ់
សុន ឆ័យ
© រក្សាសិទ្ធិដោយ thmeythmey.com
