អន្តរជាតិ
ប្រតិកម្មនឹងការព្រមានសេដ្ឋកិច្ច លោក Duterte តបវិញថា «ខ្ញុំមិនខ្វល់ ! ខ្ញុំអាចទៅចិនក៏បាន ឬរុស្ស៊ីក៏បាន»
× លោកប្រធានាធិបតី រ៉ូឌ្រីហ្គូ ឌើទើតេ បានប្រាប់ឲ្យអ្នកវិនិយោគបរទេសឲ្យចាកចេញពីហ្វីលីពីនចុះ ប្រសិនពួកគេ មិនចូលចិត្តគោលនយោបាយរបស់លោក ជាពិសេសនោះ គោលនយោបាយបោសសម្អាតបទល្មើស និងគ្រឿងញៀនដែលកំពុងតែរងការរិះគន់ខ្លាំងពីអង្គការសហប្រជាជាតិ និងស្ថាប័នសិទ្ធិមនុស្សពាក់ព័ន្ធផ្សេងទៀត។
«ចេញពីប្រទេសរបស់យើងទៅ។ បន្ទាប់មក យើងអាចចាប់ផ្តើមធ្វើអ្វីដោយខ្លួនឯងម្តង។ ខ្ញុំ អាចទៅចិន។ ខ្ញុំ អាចទៅរុស្ស៊ី។ ខ្ញុំនឹងជជែកជាមួយនឹងពួកគេ។ ពួកគេ កំពុងតែរង់ចាំខ្ញុំ ...?» នេះ គឺសេចក្តីថ្លែងការណ៍របស់លោកប្រធានាធិបតី ឌើទើតេ នៅថ្ងៃទី២២ ខែកញ្ញាម្សិលមិញ ប្រតិកម្មទៅនឹងការព្រមានស្ថានភាពសេដ្ឋកិច្ចរបស់ហ្វីលីពីនពីភ្នាក់ងារមួយ ដែលបានចុះផ្សាយដោយសារព័ត៌មាន inquirer.net ។
លោកប្រធានាធិបតីរូបនោះ ក៏បានអះអាងថា កុំបន្ទោសមាត់របស់លោក ព្រោះ មាត់របស់លោក មិនមែនជាបញ្ហានោះទេ។
ប្រតិកម្មខ្លាំងៗក្នុងក្របខណ្ឌសេដ្ឋកិច្ចរបស់លោកប្រធានាធិបតីហ្វីលីពីនបែបនេះ បន្ទាប់ពី ភ្នាក់ងារវាយតម្លៃ «Standard and Poor’s» បាន អះអាង ថា អ្នកវិនិយោគមួយចំនួន កំពុងតែព្រួយបារម្ភពីគោលនយោបាយរបស់ប្រធានាធិបតីហ្វីលីពីន ប្រឆាំងទៅប្រធានាធិបតីអាមេរិក លោក បារ៉ាក់ អូបាម៉ា និងអគ្គលេខាធិការអង្គការសហប្រជាជាតិលោក បាន គីមូន។ ហើយអ្វីដែលធ្វើឲ្យប្រធានាធិបតីដែលគេហៅក្រៅថាជា«អ្នកដាក់ទណ្ឌកម្ម»ខឹងខ្លាំងនោះគឺ ភា្នក់ងារនោះ ក៏បានលើកឡើងពីបញ្ហាដែលប៉ះពាល់តាមរយៈប្រតិបត្តិការបស់លោកនោះឯង។
សូមបញ្ជាក់ផងដែរថា លោកប្រធានាធិបតីរ៉ូឌ្រីហ្គូ ឌើទើតេ បានឡើងកាន់តំណែងជាប្រធានាធិបតីហ្វីលីពីនទី១៦ជាផ្លូវការនៅថ្ងៃទី៣០ ខែមិថុនាកន្លងទៅ។ គិតចាប់ពីការឡើងកាន់អំណាច មកមានជនសង្ស័យពាក់ព័ន្ធនឹងបញ្ហាគ្រឿងញៀនប្រមាណជិត៣០០០នាក់ហើយ ត្រូវបានសម្លាប់ក្រោមប្រតិបត្តិការបោសសម្អាតគ្រឿងញៀនដែលជាគោលនយោបាយអាទិភាពរបស់លោកប្រធានាធិបតី៕
© រក្សាសិទ្ធិដោយ thmeythmey.com