អន្តរជាតិ
ឱសថស្ថាននៅក្រុងប៉ារីស ក្លាយជាទីតាំងទាក់ទាញភ្ញៀវទេសចរខ្លាំង
× បាងកកប៉ុស្តិ៍
រដ្ឋធានីប៉ារីស ត្រូវគេទទួលស្គាល់ថា ជាទីក្រុងទេសចរណ៍ដ៏មានប្រជាប្រិយនៅអឺរ៉ុប ដោយអាចទាក់ទាញភ្ញៀវទេសចរមកពីគ្រប់ទិសទីរាប់លាននាក់ក្នុងមួយឆ្នាំៗ។ ប៉ម Eiffel សារមន្ទីរ The Louvre គឺជាចំណុចទាក់ទាញបំផុតសម្រាប់អ្នកទេសចរ ដែលគេឯងតែងតែទៅទស្សនាមិនដែលខាន។ មកទល់ពេលនេះ ទីតាំងដែលទាក់ទាញមួយទៀតនោះ គឺឱសថស្ថាននានា ដែលតាំងលក់គ្រឿងសម្អាងម៉ាកល្បីៗ ជាពិសេសទេសចរកូរ៉េខាងត្បូង។
ក្រៅពីទីតាំងសំខាន់ៗទីក្រុងប៉ារីស ឱសថស្ថាននៅសង្កាត់ទី៥ គឺជាចំណុចទាក់ទាញខ្លាំងបំផុតសម្រាប់អ្នកទេសចរមកពីកូរ៉េខាងត្បូង។ ពួកអ្នកទេសចរទាំងនោះ តែងចំណាយពេលពេញមួយព្រឹកទិញគ្រឿងសម្អាងយ៉ាងច្រើន។ មិនតែប៉ុណ្ណោះ ពួកគេក៏ប្រើទូរសព្ទដើម្បីស្វែងរកទំនិញផ្សេងទៀត មុនទៅប្រទេសវិញ។
ដោយសារតែអ្នកទេសចរណ៍កូរ៉េខាងត្បូងច្រើនបែបនេះ លោក Alexandre Freyburger ដែលជាម្ចាស់ឱសថស្ថាន Pharmacie Monge ក៏រៀបចំដាក់សៀវភៅណែនាំជាភាសាកូរ៉េ ដើម្បីសម្រួលដល់អតិថិជនរបស់ខ្លួន។ លើសពីនេះ ឱសថស្ថាននោះ ក៏មានបុគ្គលិកចេះនិយាយភាសាកូរ៉េ ដើម្បីបម្រើសេវាកម្ម ព្រមទាំងមានខិតបណ្ណជាភាសាកូរ៉េដែរ។
តាមពិតទៅ មិនមែនមានតែឱសថស្ថាននៅសង្កាត់ទី៥នេះទេ ដែលអាចទាក់ទាញភ្ញៀវទេសចរនោះ ឱសថស្ថានផ្សេងទៀតនៅក្នុងក្រុងប៉ារីស ក៏មានអ្នកទេសចរចូលទិញទំនិញច្រើនដែរ។ នេះក៏ដោយសារតែឱសថស្ថានទាំងនោះ លក់ទំនិញមានតម្លៃថោក មានច្រើនជម្រើស ជាពិសេសនោះ បុគ្គលិកអាចនិយាយច្រើនភាសាងាយស្រួលទំនាក់ទំនង។
ក្រៅពីទេសចរមកពីកូរ៉េខាងត្បូង ឱសថស្ថានទាំងឡាយក្នុងក្រុងប៉ារីស ក៏មានអតិថិជនមកពីចិន បណ្ដាប្រទេសអាស៊ីខាងកើត ក៏ដូចជាទេសចរមកពីអាមេរិកឡាទីនដែរ។ ប៉ុន្តែលោកFreyburger និយាយថា ៧០ភាគរយនៃភ្ញៀវបរទេសជាជនជាតិកូរ៉េខាងត្បូង។
មូលហេតុដែលភ្ញៀវទេសចរសម្រុកទិញគ្រឿងសម្អាងពីបារាំង អាចបណ្ដាលមកពីតម្លៃនៃទំនិញទាំងនោះដែលតាំងលក់នៅប្រទេសរបស់ខ្លួន មានតម្លៃខ្ពស់កប់ពពក។ ផលិតផលសម្អាងម៉ាកល្បីៗដូចជា Caudalie, Avène និង Nuxe មានតម្លៃថ្លៃណាស់ក្នុងទីផ្សារអាស៊ី។ ម្យ៉ាងទៀតនោះ អ្នកទេសចរទាំងនោះ ទិញទំនិញនានា ដើម្បីផ្ញើគ្រួសារសាច់ញាតិរបស់ខ្លួនដែរ៕
Tag:
បារាំង
កូរ៉េខាងត្បូង
© រក្សាសិទ្ធិដោយ thmeythmey.com