កម្ពុជាទទួលហុងកុងសម្រាប់ជំនួបមិត្តភាពលើកទី២នាល្ងាចនេះដើម្បីត្រៀម Suzuki Cup

កីឡាជាតិ

ជាតិ

កម្ពុជាទទួលហុងកុងសម្រាប់ជំនួបមិត្តភាពលើកទី២នាល្ងាចនេះដើម្បីត្រៀម Suzuki Cup

06, Oct 2016 , 7:39 am

រូបភាព

ដោយ:

គ្រូបង្វឹកក្រុមជម្រើសជាតិកម្ពុជារំពឹងថា កម្ពុជានឹងទទួលបានបទពិសោធន៍ល្អៗ ដើម្បីត្រៀមការប្រកួតវគ្គជម្រុះពានរង្វាន់ AFF Suzuki Cup 2016 ពីការប្រកួតមិត្តភាពអន្តរជាតិរវាងក្រុមជម្រើសជាតិកម្ពុជា ជាមួយក្រុមជម្រើសជាតិហុងកុងដែលធ្វើនៅក្នុងពហុកីឡដ្ឋានជាតិនាវេលាម៉ោង៦ និង៣០នាទី ថ្ងៃទី៦ ខែតុលា នេះ។

លោក Lee Tae Hoon គ្រូបង្វឹកក្រុមជម្រើសជាតិកម្ពុជាបានចាត់ទុកការប្រកួតមិត្តភាពអន្តរជាតិជាមួយហុងកុងដែលធ្វើឡើងនៅក្នុងពហុកីឡដ្ឋានជាតិនាថ្ងៃទី៦ ខែតុលា នេះ ជាការប្រកួតមួយដ៏សំខាន់សម្រាប់កម្ពុជាក្នុងការដកស្រង់បទពិសោធន៍ ក៏ដូចជាបច្ចេកទេសល្អៗ ដើម្បីត្រៀមធ្វើជាម្ចាស់ផ្ទះការប្រកួតជម្រុះពានរង្វាន់ AFF Suzuki Cup ប្រចាំឆ្នាំ២០១៦។

លោក Lee Tae Hoon ក្នុងសន្និសីទសារព័ត៌មាននៅសណ្ឋាគារណាហ្គាវើលកាលពីព្រឹកមិញបានបញ្ជាក់យ៉ាងដូច្នេះថា៖«ខ្ញុំរំពឹងថាកម្ពុជានឹងទទួលបានបទពិសោធន៍ច្រើនពីការប្រកួតមិត្តភាពអន្តរជាតិជាមួយហុងកុងនៅល្ងាចនេះ។ ហើយខ្ញុំយល់ថា វាជាការប្រកួតមួយដ៏សំខាន់សម្រាប់កម្ពុជាក្នុងការត្រៀមធ្វើជាម្ចាស់ផ្ទះវគ្គជម្រុះពានរង្វាន់ Suzuki Cup ប្រចាំឆ្នាំ២០១៦»។

លោកគ្រូបង្វឹកក្រុមជម្រើសជាតិកម្ពុជារូបនេះរំពឹងថា កម្ពុជានឹងធ្វើបានល្អក្នុងជំនួបមិត្តភាពអន្តរជាតិជាមួយក្រុមហុងកុងនាថ្ងៃនេះ ព្រោះកម្ពុជាបានត្រៀមខ្លួនយ៉ាងល្អ បន្ទាប់ពីឆ្លងកាត់ការប្រកួតមិត្តភាព៣លើក និងហ្វឹកហាត់ពង្រឹងសមត្ថភាព និងបច្ចេកទេសនៅសិង្ហបុរីអស់រយៈ១០ថ្ងៃកន្លងមក។ ហើយលោករំពឹងថា ក្រោយចប់ការប្រកួតមិត្តភាពអន្តរជាតិនេះ សមត្ថភាពរបស់កម្ពុជានឹងមានការវិវត្តមួយកម្រិតថែមទៀត។

ទោះបីកម្ពុជាបច្ចុប្បន្នមានការរីកចម្រើនគួរឲ្យភ្ញាក់ផ្អើលក៏ដោយ ប៉ុន្តែក្នុងជំនួបមិត្តភាពអន្តរជាតិនៅថ្ងៃនេះលោក Kim Pan Gon គ្រូបង្វឹករបស់ក្រុមជម្រើសជាតិហុងកុងបានប្តេជា្ញថា នឹងខិតខំប្រឹងប្រែងព្យាយាមធ្វើឲ្យល្អបំផុត ដោយលោកនឹងដាក់កីឡាករល្អៗឲ្យលេងក្នុងជំនួបមិត្តភាពអន្តរជាតិជាមួយក្រុមជម្រើសជាតិកម្ពុជា។

ទន្ទឹមនឹងនេះ លោកគ្រូបង្វឹកក្រុមជម្រើសជាតិហុងកុងរូបនេះបានចាត់ទុកថា ចំនួនអ្នកគាំទ្រច្រើនក្នុងជំនួបនៅថ្ងៃវាការដាក់សម្ពាធមួយមកលើក្រុមរបស់លោកក្នុងការយកឈ្នះលើក្រុមកម្ពុជា។ ម្យ៉ាងវិញទៀតការចេញទៅហ្វឹកហាត់ពង្រឹងបច្ចេកទេសនៅសិង្ហបុរីរយៈពេល១០ថ្ងៃ វាជាសម្ពាធមួយយ៉ាងខ្លាំងមកលើក្រុមលោកផងដែរ។

ដោយឡែក កីឡាករ ប្រាក់ មុន្នីឧត្តម ខ្សែប្រយុទ្ធរបស់ក្លិបព្រះខ័នរាជស្វាយរៀងបានកត់សម្គាល់ឃើញថា ក្រោយពីឆ្លងការហ្វឹកហាត់ និងប្រកួតនៅប្រទេសសិង្ហបុរីក្រុមជម្រើសជាតិកម្ពុជាមានការសហការគ្នាបានយ៉ាងល្អ ទាំងការហ្វឹកហាត់ និងការប្រកួត។ កីឡាកររូបនេះរំពឹងថា ក្នុងជំនួបជាមួយហុងកុងនៅលើទឹកកម្ពុជាលើកនេះនឹងមានភាពល្អប្រសើរជាងជំនួបកាលពីខែមុននៅលើទឹកដីហុងកុង ដែលនៅពេលនោះ ម្ចាស់ផ្ទះឈ្នះក្នុងលទ្ធផល ៤-២។

ជាមួយគ្នានេះ ខ្សែប្រយុទ្ធរបស់ក្លិបស្វាយរៀងរូបនេះក៏បានកត់សម្គាល់ផងដែរថា ក្រុមកម្ពុជាបច្ចុប្បមានទម្រង់លេងល្អក្រោយពីហ្វឹកហាត់អស់រយៈពេលជាច្រើនថ្ងៃមកនេះ។ ហើយរូបគេក៏បានចាត់ទុកផងដែរថា ការប្រកួតមិត្តភាពអន្តរជាតិនៅល្ងាចនេះជាការប្រកួតមួយដ៏សំខាន់សម្រាប់រូបគេ ក៏ដូចជាក្រុមកម្ពុជាទាំងមូលក្នុងការដកស្រង់បទពិសោធន៍ និងបច្ចេកទេស ដើម្បីត្រៀមប្រកួតវគ្គពានរង្វាន់ AFF Suzuki Cup ដែលកម្ពុជាធ្វើជាម្ចាស់ផ្ទះ។

គួរបញ្ជាក់ថា ការប្រកួតវគ្គជម្រុះកីឡាបាល់ទាត់ដណ្តើមជើងឯកអាស៊ាន AFF Suzuki Cup 2016 នឹងប្រព្រឹត្តទៅនៅរាជធានីភ្នំពេញពីថ្ងៃទី១៥ ដល់ថ្ងៃទី២១ខែតុលា ខាងមុខ ដោយក្រុមដែលមានចំណាត់ថ្នាក់ទាប កម្ពុជា ព្រុយណេ ទីម័រខាងកើត និងឡាវ ត្រូវប្រជែងគ្នាដើម្បីបំពេញមួយកៅអីក្នុងពូល B នៅជុំចុងក្រោយ។ ប្រសិនបើក្រុមណាមានពិន្ទុខ្ពស់នឹងឡើងទៅជួបជាមួយម្ចាស់ផ្ទះមីយ៉ាន់ម៉ា វៀតណាម និងម៉ាឡេស៊ី នៅជុំបន្ទាប់ក្នុងពូលB៕