ខ្លួនឯងក្រ តែលោក ម៉ៃ ទិត្យថារ៉ា សុខចិត្តដកប្រាក់ខែខ្លួនឯង ៧០០$/ខែ ដើម្បីជួយកុមារ៥០០នាក់

បទយកការណ៍ / បទសម្ភាសន៍

ខ្លួនឯងក្រ តែលោក ម៉ៃ ទិត្យថារ៉ា សុខចិត្តដកប្រាក់ខែខ្លួនឯង ៧០០$/ខែ ដើម្បីជួយកុមារ៥០០នាក់

07, Oct 2016 , 11:43 am

រូបភាព

ដោយ: គី សុខលីម (Ky Soklim)

ភ្នំពេញ៖ ខ្លួនឯងក្រ តែលោក ម៉ៃ ទិត្យថារ៉ា សុខចិត្តដកប្រាក់ខែខ្លួនឯង ៧០០$ ដើម្បីជួយកុមារក្រីក្រ៥០០នាក់រៀងរាល់ខែ។ លោកបានបង្កើតសាលាបណ្តុះបណ្តាលភាសាអង់គ្លេស និងកុំព្យូទ័រមួយកន្លែងនៅក្នុងខេត្តស្វាយរៀងដើម្បីជួយកុមារក្រីក្រដោយមិនយកកម្រៃ។ ក្នុងន័យចង់ឲ្យសុបិនក្លាយទៅជាការពិត លោកត្រូវប្រឈមបញ្ហាជាមួយភរិយា និងប្រឈមនឹងការលំបាកក្នុងការរកថវិកាដើម្បីចិញ្ចឹមជីវិតប្រចាំថ្ងៃ។ តើហេតុអ្វីបានជាលោក ទិត្យថារ៉ា ខ្លួនឯងក្រសោះ តែបែរជាចង់ជួយគេខ្លាំងដូច្នេះ?

ដើម្បីជ្រាបព័ត៌មានលម្អិត សូមអញ្ជើញស្តាប់បទសម្ភាសន៍រវាងលោក គី សុខលីម អគ្គនាយកសារព័ត៌មានអេឡិចត្រូនិកថ្មីៗ និងលោក ម៉ៃ ទិត្យថារ៉ា ម្ចាស់សាលាបណ្តុះបណ្តាលកុមារក្រីក្រនៅក្នុងខេត្តស្វាយរៀងដូចតទៅ៖

លេខទូរសព្ទទំនាក់ទំនងលោក ម៉ៃ ទិត្យថារ៉ា៖ ០១៧ ៥០០ ៥០៣

លោក ម៉ៃ ទិត្យថារ៉ា អ្នកកាសែត KhmerTimes គឺជាអ្នកកាសែតសាមញ្ញម្នាក់ក្នុងចំណោមអ្នកកាសែតដទៃទៀតនៅក្នុងប្រទេសកម្ពុជាដែលមានទឹកចិត្តចង់ជួយសង្គមតាមរយៈសំណេររបស់ខ្លួន និងតាមរយៈការបង្កើតសាលារៀនបណ្តុះបណ្តាលកុមារក្រីក្រនៅក្នុងខេត្តស្វាយរៀងដែលជាទីកំណើតរបស់លោក។ ធ្វើការជាអ្នកកាសែតនៅក្នុងស្ថាប័នអន្តរជាតិ លោក ទិត្យថារ៉ា ទទួលបានប្រាក់ខែច្រើនគួរសម។

តែអ្វីដែលគេពិបាកជឿ គឺនៅត្រង់ថា លោកសុខចិត្តដកប្រាក់ប្រមាណជា៧០០ដុល្លារក្នុងមួយខែពីប្រាក់ខែរបស់ខ្លួនដើម្បីជួយសាលាដែលលោកបានបង្កើតអស់រយៈពេលជាងមួយឆ្នាំមកហើយនោះ។ សាលាបណ្តុះបណ្តាលភាសាអង់គ្លេស និងកុំព្យូទ័ររបស់លោកបានបង្កើតឡើងដើម្បីជួយកុមារក្រីក្រ។ ការសិក្សានៅទីនេះ មិនតម្រូវឲ្យកុមារបង់ប្រាក់ឡើយ ហើយបច្ចុប្បន្ន សាលាមានកូនសិស្សប្រមាណជា៥០០នាក់។

ដោយសារបន្ទុកធ្ងន់ពេក លោកចាប់ផ្តើមមានគំនិតបើកលក់កាហ្វេនៅទីក្រុងភ្នំពេញដើម្បីរកប្រាក់ចំណូលបន្ថែមដើម្បីជួយសាលា។ ហាងកាហ្វេឈ្មោះ «កាហ្វេ តាគិន» បើកបានជាង១ខែហើយ តែប្រាក់ចំណេញទំនងជាត្រូវការពេលវេលាវែងឆ្ងាយជាងនេះ។ សម្រាប់លោក ម៉ៃ ទិត្យថារ៉ា នាពេលបច្ចុប្បន្ននេះ ជំនួញកាហ្វេក៏មិនទាន់ទទួលបានប្រាក់ចំណេញ រីឯសាលាបណ្តុះបណ្តាលក៏ប្រឈមនឹងកង្វះថវិកាដើម្បីដំណើរការតទៅមុខ។

សំណួរជាច្រើនបានលើកឡើងថា លោក ម៉ៃ ទិត្យថារ៉ា ខ្លួនឯងមិនទាន់មានជីវភាពប្រសើរនៅឡើយទេ តើហេតុអ្វីបានជាលោកចង់ជួយគេខ្លាំងម្ល៉េះ? តើភរិយាលោកគាំទ្រគំនិតរបស់លោកឬទេ? លោក ទិត្យថារ៉ា បានឆ្លើយដោយស្មោះត្រង់មកវិញថា សូម្បីតែផ្ទះក៏លោកមិនទាន់មានខ្លួនឯងផង លោកបន្តរស់នៅជាមួយម្តាយក្មេកនៅឡើយទេ។ តែលោកមានគំនិតចង់ជួយកុមារដែលមានជីវភាពក្រីក្រលំបាកជាងលោកទៅទៀត។ ផ្អែកលើសកម្មភាពជាក់ស្តែងប្រចាំថ្ងៃ គេសង្កេតឃើញថា លោក ទិត្យថារ៉ា ប្រឹងប្រែងខ្លាំងណាស់ដើម្បីជួយកុមារទាំងជាង៥០០នាក់នោះ។ លោកធ្វើការខ្លួនឯងជាអ្នកកាសែតរកប្រាក់កម្រៃផង លក់កាហ្វេខ្លួនឯងផង និងប្រឹងរកកម្រៃពីកន្លែងផ្សេងផងដើម្បីទ្រទ្រង់សាលាកុំឲ្យបិទទ្វារ។

ឆ្លើយតបទៅសំណួរសួរថា តើភរិយារបស់លោកគាំទ្រឬទេ? លោក ម៉ៃ ទិត្យថារ៉ា បានឆ្លើយថា ដំបូងឡើយប្រពន្ធគាត់មិនគាំទ្រទេ ពេលខ្លះ ប្រពន្ធគាត់ឈប់និយាយរកលោកទៀតផង។ ពេលខ្លះទៀត ប្រពន្ធរបស់លោកនិយាយថា លោក(ទិត្យថារ៉ា)គួរទៅរស់នៅជាមួយក្មេងទាំងអស់នោះហើយ។ ទោះជាយ៉ាងណា ក្រោយការពន្យល់របស់លោក ទិត្យថារ៉ា, ឥឡូវនេះ ភរិយារបស់លោកទន់ចិត្ត ហើយអនុញ្ញាតឲ្យលោកបំពេញបំណងរបស់លោក។ សម្រាប់លោក ទិត្យថារ៉ា ក្នុងសង្គមគ្រួសារ បញ្ហាលែងមានទៀតហើយ។ តែបញ្ហាប្រឈមរបស់លោកនៅមានដដែល។ ទី១ ជំនួញកាហ្វេមិនទាន់ដំណើរការល្អ និងទី២ សាលាបណ្តុះ បណ្តាលខ្វះថវិកា។ តើក្តីសុបិនរបស់លោក ម៉ៃ ទិត្យថារ៉ា ដែលចង់ជួយកុមារក្រីក្រ ឲ្យងើបចេញពីរណ្តៅអវិជ្ជានោះ អាចក្លាយទៅជាការពិតបានដែរឬទេ ប្រសិនបើគ្មានការគាំទ្រពីមហាជន និងពីអ្នកពាក់ព័ន្ធនោះ? នេះ គឺជាសំណួរដែលសកម្មភាពជាក់ស្តែង នឹងផ្តល់ចម្លើយនាពេលអនាគត៕