ពីនេះ ពីនោះ
តើពេលណាត្រូវប្រើ«អនុវត្ត, អនុវត្តន៍ និង អនុវត្តិ» នៅក្នុងអត្ថបទសំណេរ?
×
ភ្នំពេញ៖ ពាក្យថា «អនុវត្ត, អនុវត្តន៍ និង អនុវត្តិ» សាធារណជនមួយចំនួន នៅមានភាពមិនច្បាស់លាស់ នៅក្នុងការសរសេរ ថាពេលណាត្រូវសរសេរ«អនុវត្ត, អនុវត្តន៍ និង អនុវត្តិ»ឡើយ។ មូលហេតុ គឺមិនសូវបានយល់ពីក្បួន វេយ្យាករណ៍ នៃកិរិយាសព្ទ គុណសព្ទ នាមសព្ទ បាលី និងសំស្ក្រឹតនៅក្នុងភាសាខ្មែរ។ ពាក្យថា «អនុវត្ត, អនុវត្តន៍ និង អនុវត្តិ» មានលក្ខខណ្ឌសរសេរដូចខាងក្រោម៖
នៅក្នុងការសរសេរអត្ថបទ សាធារណជនត្រូវចំណាំក្នុងក្បួនវេយ្យាករណ៍ខ្មែរថា បើសរសេរថា«អនុវត្ត» នោះគឺមានន័យថាពាក្យនេះជាកិរិយាសព្ទ ដែលមានន័យថា ប្រព្រឹត្តតាម, ធ្វើតាម, យល់ព្រមតាម, អនុលោមតាម។ ប៉ុន្តែ ប្រើជានាមសព្ទ គឺចាំបាច់ត្រូវសរសេរ«អនុវត្តន៍ ឬ អនុវត្តិ» ដែលមានន័យថា ការប្រព្រឹត្តតាម, ការធ្វើតាម, ការបណ្ដោយតាម, អនុរោធ ជាដើម។
ប៉ុន្តែក្នុងករណី សាធារណជន សរសេរពាក្យនេះ ផ្សំជាមួយពាក្យថា «ការ, ក្ដី, សេចក្ដី និងដំណើរ» គឺមិនត្រូវសរសរជាមួយពាក្យ «អនុវត្តន៍ ឬ អនុវត្តិ»ឡើយ ព្រោះការសរសេរបែបនេះ មិនត្រឹមត្រូវតាមក្បួនវេយ្យាករណ៍ខ្មែរ នោះទេ។ មូលហេតុគឺដោយសារពាក្យថា «ការ, ក្ដី, សេចក្ដី និងដំណើរ» ជានាមសព្ទ មិនអាចយកមកផ្សំជាមួយពាក្យថា «អនុវត្តន៍ ឬ អនុវត្តិ»ទេ ព្រោះជានាមសព្ទដូចគ្នា។
ដោយឡែក ចំពោះពាក្យថា «ការ, ក្ដី, សេចក្ដី និងដំណើរ»នេះ ត្រូវផ្សំជាមួយពាក្យថា «អនុវត្ត» ទើបត្រឹមត្រូវ។ ឧទាហរណ៍៖ «ការអនុវត្ត, ក្ដីអនុវត្ត, សេចក្ដីអនុវត្ត និងដំណើរអនុវត្ត»៕
ដកស្រង់ពីវចនានុក្រមខ្មែររបស់សម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com