ជាតិ
សាលារាជធានីភ្នំពេញ ប្រកាសដាក់ភ្លើងបំភ្លឺគ្រប់ដងផ្លូវទូទាំងរាជធានី នៅឆ្នាំ២០១៧
×![]()
ភ្នំពេញ៖ សាលារាជធានីភ្នំពេញ នឹងដាក់ភ្លើងបំភ្លឺគ្រប់បណ្ដាផ្លូវទាំងអស់នៅឆ្នាំ២០១៧ខាងមុខនេះ ដើម្បីបង្កលក្ខណៈងាយស្រួលដល់ប្រជាពលរដ្ឋ បានធ្វើចរាចរនៅពេលយប់ប្រកបដោយសុវត្ថិភាព។គិតមកដល់ពេលនេះ អាជ្ញាធររាជធានីភ្នំពេញបានដាក់ ភ្លើងបំភ្លឺតាមដងផ្លូវ នៅទូទាំងរាជធានី បានចំនួន៥០ភាគរយហើយ។ នេះបើតាមទីភា្នក់ងារសារព័ត៌មានជាតិ AKP។
អភិបាលរាជធានីភ្នំពេញ លោក ប៉ា សុជាតិវង្ស បានបញ្ជាក់ថា បង្គោលភ្លើងដែលនៅសល់ជាង៥០ភាគរយទៀត ពោលគឺបង្គោលភ្លើងជាង១២០០០ដើម នឹងត្រូវសម្រុកដាក់នៅតាមផ្លូវទូទាំងរាជធានីភ្នំពេញ ឲ្យបានរួចរាល់មុនពិធីបុណ្យចូលឆ្នាំខ្មែរខាងមុខនេះ ។ បើតាមលោក ប៉ា សុជាតិវង្ស ការបំភ្លឺភ្លើងសាធារណៈនៅតាមដងផ្លូវនាពេលយប់នេះ មានសារៈសំខាន់ណាស់ សម្រាប់ប្រជាពលរដ្ឋធ្វើដំណើរ និងអាចជួយឲ្យសមត្ថកិច្ចបង្ក្រាប់បទល្មើសឧក្រិដ្ឋផ្សេងៗ បានទាន់ពេលវេលាផងដែរ។
អភិបាលរាជធានីភ្នំពេញរូបនេះបានបញ្ជាក់ដូច្នេះថា៖« យ៉ាងយូរបំផុតចាប់ ពីឆ្នាំក្រោយនេះតទៅផ្លូវទាំងអស់ នៅទូទាំងរាជធានីភ្នំពេញនឹងមាន ភ្លើងបំភ្លឺផ្លូវក្នុងពេលរាត្រីដើម្បីលើក កម្ពស់សោភណភាពទីក្រុងឱ្យកាន់តែស្រស់ស្អាត»។
សូមបញ្ជាក់ថា នៅទូទាំងរាជធានីភ្នំពេញមានផ្លូវសរុបប្រមាណ៥០០ផ្លូវ ក្នុងនោះមន្ត្រីជំនាញបានបំពាក់ប្រព័ន្ធអំពូលភ្លើងថ្មីបានចំនួន១៣៣ផ្លូវ ។ ចំណែកច្រកផ្លូវតូចៗចូលទៅក្នុងភូមិ នឹងត្រូវអនុវត្តន៍ក្រោយបញ្ចប់គម្រោងនេះ៕
Tag:
បង្គោលភ្លើង
ប៉ា សុជាតិវង្ស
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 9 ម៉ោង
