កីឡាជាតិ
ជាតិ
លោក Lee៖ កម្ពុជាបង្កើនទម្រង់លេងកាន់តែរីកចម្រើន តែការគ្រប់គ្រងបាល់នៅមិនទាន់ល្អ
×
ភ្នំពេញ៖ បើទោះជាកម្ពុជា បានយកឈ្នះក្រុមស្រីលង្កា កាលពីម្សិលមិញ ដោយលទ្ធផល៤ទល់ ០ ក្តី តែគ្រូបង្វឹកកម្ពុជា មិនទាន់ពេញចិត្តនឹងទម្រង់លេងវាយបកទៅលើគូប្រកួតរបស់ក្រុមកម្ពុជាឡើយ។ គ្រូបង្វឹកថា កីឡាករភាគច្រើននៅមានចំណុចខ្វះខាត ចំពោះគ្រប់គ្រងបាល់និងការផ្លាស់ប្ដូរល្បឿនវាយសម្រុក។
ក្រោយពីប្រកួតយកឈ្នះក្រុមស្រីលង្កាដោយលទ្ធផល៤ទល់០នោះ គ្រូបង្វឹកក្រុមបាល់ទាត់ជម្រើសជាតិកម្ពុជាលោក Lee Tae Hoon ទទួលស្គាល់ថា កីឡាករកម្ពុជាបានបង្កើនតុល្យភាពនៃទម្រង់លេងកាន់តែរីកចម្រើនជាលំដាប់ពីមួយប្រកួតទៅមួយប្រកួត។ តែសម្រាប់លោក Lee កីឡាករកម្ពុជានៅមានចំណុចខ្វះខាតជាច្រើនទៀត ដែលត្រូវពង្រឹងបន្ថែមនោះ គឺការលេងរបៀបគ្រប់គ្រងបាល់ និងការប្រើល្បឿនវាយសម្រុកនិងការពារ។
ថ្លែងក្នុងសន្និសីទកាសែត ក្រោយការប្រកួតមិត្តភាពអន្តរជាតិជាមួយក្រុមស្រីលង្កាកាលពីម្សិលមិញ គ្រូបង្វឹកកម្ពុជារូបនេះ បានបញ្ជាក់ពីចំណុខ្វះខាតរបស់កីឡាករខ្លួនដូច្នេះថា៖«ថ្ងៃនេះកីឡាករយើងធ្វើការងារខ្លាំង ធ្វើបានល្អ ដូច្នេះយើងទទួលបានជ័យជម្នះ។ ប៉ុន្តែវាមិនមែនជាប្រកួតដែលល្អបំផុតរបស់ក្រុមជម្រើសជាតិកម្ពុជាយើងនោះទេ ។ យើងបានបង្កើនបញ្ហាដោយខ្លួនឯងជាច្រើន ។ កីឡាករយើងភាគច្រើន គឺការផ្លាស់ប្ដូរល្បឿននៅពេលដែលគ្រប់គ្រងបាល់ មិនទាន់បានល្អ ដោយតែងតែគ្រប់គ្រងបាល់ទៅដល់ជើងគូប្រកួតដែលធ្វើឲ្យយើងបាត់បង់បាល់ជាច្រើន»។
លោក Lee Tae Hoon ចាត់ទុកចំណុចទាំងនេះ ជាបញ្ហារបស់ក្រុមជម្រើសជាតិកម្ពុជា ដែលត្រូវការយកចិត្តទុកដាក់ក្នុងការហ្វឹកហាត់ពីចំណុចខ្វះខាតរបស់ពួកគេ ដើម្បីឆ្លងផុតវគ្គជម្រុះ AFF Suzuki Cup ។ នៅថ្ងៃទី១៥ ខែតុលា ខាងមុខ កម្ពុជានឹងស្វាគមន៍ឡាវ សម្រាប់ជំនួបវគ្គជម្រុះ AFF Suzuki Cup មុនប៉ះជាបន្តបន្ទាប់ជាមួយព្រុយណេ និងទីម័រខាងកើត។ ក្រុមដែលមានពិន្ទុខ្ពស់ជាងគេនឹងឈានទៅកាន់វគ្គបន្ត៕
Tag:
កម្ពុជា
ស្រីលង្កា
មិត្តភាពអន្តរជាតិ
© រក្សាសិទ្ធិដោយ thmeythmey.com