ជាតិ
ចៅអធិការវត្តចាស់ មិនផ្តល់ទីតាំងវត្ត សម្រាប់បុណ្យ១០០ថ្ងៃលោក កែម ឡី ឡើយ
× ភ្នំពេញ៖ បន្ទាប់ពីសាលារាជធានីភ្នំពេញ បានចេញសេចក្តីជូនដំណឹងដល់សាធារណជន ពុំអនុញ្ញាតឲ្យមានការរៀបចំពិធីបុណ្យ១០០ថ្ងៃរបស់លោកបណ្ឌិតកែម ឡី រួចមក នៅថ្ងៃទី១០ តុលានេះ ចៅអធិការវត្តពោធិយ៉ារ៉ាម ហៅវត្តចាស់ ក៏ឯកភាពនឹងសេចក្តីជូនដំណឹងនេះដែរ ដោយមិនផ្តល់ទីតាំងវត្តចាស់ ដល់គណៈកម្មការរៀបចំបុណ្យ១០០ថ្ងៃរបស់លោក កែម ឡី ឡើយ។
ចៅអធិការវត្តពោធិយ៉ារ៉ាម ហៅវត្តចាស់ ព្រះនាម មាស សាខន បានប្រកាសមិនផ្តល់ទីតាំងវត្តចំពោះការរៀបចំបុណ្យ១០០ថ្ងៃរបស់ លោក កែម ឡី នោះទេ។ ការប្រកាសរបស់ចៅអធិការវត្តចាស់នៅពេលនេះ គឺធ្វើឡើងតែ៣ថ្ងៃប៉ុណ្ណោះ បន្ទាប់ពីសាលារាជធានីភ្នំពេញ បានចេញសេចក្តីជូនដំណឹងមិនអនុញ្ញាតឲ្យមានការរៀបចំពិធីបុណ្យ១០០ថ្ងៃរបស់ លោក កែម ឡី ដែលត្រូវឃាតករបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦។ នេះបើតាមការសេចក្តីប្រកាសរបស់ព្រះអង្គ មាស សាខន ចៅអធិការវត្តចាស់។
សេចក្តីប្រកាសដដែលបានសរសេរថា៖«អាត្មាភាព និងគណៈកម្មការវត្តពោធិយ៉ារ៉ាម សូមឯកភាពចំពោះសេចក្តីជូនដំណឹងរបស់សាលារាជធានីភ្នំពេញ ដោយពុំអនុញ្ញាតយកទីតាំងវត្តធ្វើពិធីខាងលើឡើយ។ ក្នុងករណីមានការរៀបចំបុណ្យ១០០ថ្ងៃនោះ អាត្មាភាព គណៈកម្មការវត្តមិនទទួលខុសត្រួវនោះទេ និងសូមឲ្យអាជ្ញាធរមានសមត្ថកិច្ចចាត់ចែងទៅតាមវិធានការរដ្ឋបាល»។
សូមបញ្ជាក់ថា កាលថ្ងៃទី០៧ តុលា ឆ្នាំ២០១៦ កន្លងមក សាលារាជធានីភ្នំពេញ បានចេញសេចក្តីជូនដំណឹង មិនអនុញ្ញាតឲ្យមានការរៀបចំពិធីបុណ្យ១០០ថ្ងៃរបស់ លោកបណ្ឌិត កែម ឡី នៅរាជធានីភ្នំពេញនោះឡើយ ដោយណែនាំឲ្យគ្រួសារសព្វរៀបចំបុណ្យ១០០ថ្ងៃ នៅគេហដ្ឋានរបស់លោក កែម ឡី នាស្រុកកំណើត ក្នុងខេត្តតាកែវវិញ៕
Tag:
ចៅអធិការវត្តចាស់
កែម ឡី
បុណ្យ១០០ថ្ងៃ
© រក្សាសិទ្ធិដោយ thmeythmey.com