ម្ចាស់ក្សត្រិយ៍ អេលីហ្សាបែតទី២ ក្លាយជាស្តេចនៅមានព្រះជន្មដែលសោយរាជ្យយូរជាងគេ

អន្តរជាតិ

ម្ចាស់ក្សត្រិយ៍ អេលីហ្សាបែតទី២ ក្លាយជាស្តេចនៅមានព្រះជន្មដែលសោយរាជ្យយូរជាងគេ

14, Oct 2016 , 11:10 am

រូបភាព

ព្រះមហាក្សត្រិយ៍អេលីហ្សាបែតទី២ និងស្តេចភូមិបុលអាប់ឌុលយ៉ាដេត នាព្រះរាជពិធីមួយនៅបាងកក កាលពីឆ្នាំ១៩៩៦។ រូបថត PA Wire

ដោយ: រួបរួម

បន្ទាប់ពីការសោយទិវង្គតរបស់ព្រះមហាក្សត្សថៃ ភូមិបុល អាប់ឌុលយ៉ាដេត (Bhumibol Adulyadej) កាលពីរសៀលថ្ងៃទី១៣ ខែតុលា ម្ចាស់ក្សត្រិយ៍ អេលីហ្សាបែតទី២ (Elizabeth II) នៃចក្រភពអង់គ្លេស និងប្រជាជាតិកុម្ម៉ង់វែល (Commonwealth realms) បានក្លាយជាស្តេចដែលនៅមានព្រះជន្ម ហើយសោយរាជ្យយូរជាងគេនៅលើពិភពលោក។

ព្រះមហាក្សត្សថៃ ភូមិបុល អាប់ឌុលយ៉ាដេត បានជាប់ព្រះនាមជាស្តេចដែលសោយរាជ្យយូរជាងគេលើពិភពលោក ដោយមានរយៈពេល៧០ឆ្នាំ និង៤ខែ នៅមុនពេលដែលព្រះអង្គ បានយាងចូលទិវង្គតក្នុងព្រះជន្ម ៨៩ព្រះវស្សា។ នៅពេលនេះ ព្រះមហាក្សត្រិយ៍ អេលីហ្សាបែតទី២ បានឡើងលេខមួយម្តងក្នុងនាមជាស្តេចដែលសោយរាជ្យយូរជាងគេ ដោយមានរយៈពេលជាង៦៤ឆ្នាំ និង៨ខែ។

ព្រះមហាក្សត្រិយ៍ អេលីហ្សាបែតទី២ បច្ចុប្បន្នមានព្រះជន្ម៩០ព្រះវស្សា ដោយព្រះអង្គបានឡើងគ្រងរាជ្យតាំងពីថ្ងៃទី២ ខែមិថុនា ឆ្នាំ១៩៥៣មក។ ព្រះអង្គជាស្តេចនៃចក្រភពអង់គ្លេស កាណាដា អូស្ត្រាលី នូវេលសេឡង់ និងជាព្រះប្រមុខនៃរដ្ឋកុម្ម៉ង់វែល។ បន្ថែមពីលើនេះ ព្រះអង្គក៏ជាក្សត្ររបស់រដ្ឋដែលធ្លាប់ស្ថិតក្រោមអាណានិគមចក្រភពអង់គ្លេសចំនួន១២ផ្សេងទៀតផងដែរ ក្នុងនោះ មាន ហ្សាម៉ៃអ៊ីក បាបាដូស បាហាម៉ា ហ្គ្រេណាដា ប៉ាពូអាស៊ីនូវែលហ្គីណេ កោះសូឡូម៉ុន ទូវ៉ាលូ Saint Lucia, Saint Vincent and the Grenadines, បេលីស, Antigua and Barbuda និង Saint Kitts and Nevis ប៉ុន្តែពេលវេលានៃការសោយរាជ្យខុសៗគ្នា បន្ទាប់ពីប្រទេសទាំងនោះទទួលបានឯករាជ្យ។

ស្តេចបន្តបន្ទាប់ដែលនៅមានព្រះជន្ម និងកំពុងគ្រងរាជ្យរួមមាន ស្តេចស៊ុលតង់ព្រុយណេ Hassanal Bolkiah (ជាង៤៩ឆ្នាំ) ស្តេចស៊ុលតង់អូម៉ង់ Qaboos bin Said al-Said (ជាង៤៦ឆ្នាំ) ម្ចាស់ក្សត្រិយ៍ដាណឺម៉ាក Margrethe II (ជាង៤៤ឆ្នាំ) ស្តេចស៊ុយអែត Carl Gusfaf XVI (ជាង៤៣ឆ្នាំ)។

ស្តេចដែលសោយរាជ្យយូរជាងគេលើពិភពលោក គឺស្តេច Sobhuza II នៃប្រទេសស្វាស៊ីឡែន ដែលបានគ្រងរាជ្យអស់រយៈពេលជាង៨២ឆ្នាំ ពីឆ្នាំ១៨៩៩ ដល់ឆ្នាំ១៩៨២ ៕