កម្ពុជា ស្នើសុំទិដ្ឋាការពីអូស្ត្រាលី សម្រាប់បញ្ជូនពលករខ្មែរបម្រើការងារ

ជាតិ

កម្ពុជា ស្នើសុំទិដ្ឋាការពីអូស្ត្រាលី សម្រាប់បញ្ជូនពលករខ្មែរបម្រើការងារ

20, Oct 2016 , 7:39 pm

រូបភាព

ដោយ: ថ្មីៗ

ភ្នំពេញ៖ លោក ហ៊ុន ម៉ាណែត បានឲ្យដឹងថា រដ្ឋាភិបាលអូស្ត្រាលី កំពុងពិចារណាលើសំណើរកម្ពុជា ដែលស្នើសុំទិដ្ឋាការរយៈពេល១ឆ្នាំ សម្រាប់បញ្ជូនពលករខ្មែរទៅបម្រើការងារនៅប្រទេសអូស្ត្រាលី។ លោក ហ៊ុន ម៉ាណែត បានដឹកនាំប្រតិភូយុវជននៃគណបក្សប្រជាជនកម្ពុជាត្រឡប់ពីបេសកកម្មក្នុងប្រទេសអូស្ត្រាលី និងណូវ៉ែលសេឡង់កាលពីថ្ងៃទី១៩ តុលា។

ថ្លែងចំពោះមុខអ្នកកាសែតលោក ហ៊ុន ម៉ាណេត បានបញ្ជាក់ថា ៖«យើងកំពុងតែចរចាសុំសិទ្ធិសុំឱកាសឲ្យអូស្ត្រាលីផ្ដល់ទិដ្ឋការ ឲ្យពលករយើងទៅធ្វើការនៅទីនោះរយៈពេលខ្លី១ឆ្នាំ។ បើសិនជាយើងបានត្រឹម៥០នាក់ ១០០នាក់ក្នុងឆ្នាំ បានន័យថា ១០០នាក់នៃពលករខ្មែរយើងមានឱកាសទៅរកទទួលទានខាងក្រៅបានចំណូលរកជួយជីវភាពគ្រួសាររបស់គាត់ ហើយបានជំនាញ។ ហើយប្រជាជនខ្មែរមានចំណូលហើយ ជាតិខ្មែរក៏ចំណូល»។

បើតាមលោក ហ៊ុន ម៉ាណែត ក្រៅពីពិភាក្សាលើកសំណើរសុំទិដ្ឋការសម្រាប់ពលករខ្មែរនេះ លោកក៏បានជួបជាមួយអ្នកជំនួញមួយចំនួន ដើម្បីពិភាក្សាពីយន្តការនានា របស់កម្ពុជាក្នុងការលើកទឹកចិត្ត និងផ្ដល់ទំនុកចិត្តពួកគេ ឲ្យងាកមកវិនិយោគនៅក្នុងប្រទេសកម្ពុជាផងដែរ៕