ជាតិ
អ្នករាយការណ៍ UN ថា ការអនុវត្តច្បាប់នៅកម្ពុជាមានការរើសអើង
× ភ្នំពេញ៖ លោកស្រី រ៉ូណា ស្មីត (Rhona Smith) បានលើកឡើងថា ការអនុវត្តច្បាប់នៅកម្ពុជា កំពុងមានភាពរើសអើង ក្រោមហេតុផលនយោបាយ ទោះបីជាកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញបញ្ជាក់ច្បាស់ ពីការអនុវត្តច្បាប់ដោយឯករាជ្យក្នុងប្រព័ន្ធតុលាការក្តី។
អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត បានលើកឧទាហរណ៍ដែលច្បាប់រើសអើងនោះ ពាក់ព័ន្ធនឹងសំណុំរឿងមន្ត្រី អង្គការអាដហុកចំនួន៤រូប ត្រូវបានឃុំខ្លួន កន្លងទៅ។
«ខ្ញុំបានលើកឡើងនៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិថា ការចោទប្រកាន់ ប្រឆាំងនឹងពួកគាត់ (មន្ត្រីអាដហុក) ត្រូវតែមានការបង្ហាញភស្តុតាង ឬក៏ពួកគាត់គួរត្រូវបានដោះលែងភ្លាម ដោយត្រូវបិទសំណុំរឿង»។ នេះជាការលើកឡើងរបស់អតីតសាស្ត្រាចារ្យច្បាប់ លោកស្រី រ៉ូណា ស្មីត ដែលស្នើឲ្យក្រសួងយុត្តិធម៌ ធានាការគោរពច្បាប់ដោយគ្មានការរើសអើង និងលុបបំបាត់ការយកកម្រៃក្រៅសេវាតុលាការ ស្របតាមច្បាប់អន្តរជាតិ កាលពីថ្ងៃទី១៩ ខែតុលា។
លើសពីនេះទៀត លោកស្រីសង្កេតឃើញថា ចៅក្រមបានអនុវត្តខុសៗគ្នាពីការបង្ហាញភស្តុតាង ចំពោះការចោទប្រកាន់ជនរងគ្រោះ។ ហេតុនេះលោកស្រីបានជំរុញយ៉ាងមុតមាំឲ្យក្រសួងយុត្តិធម៌ ពិចារណាក្នុងការតាក់តែងគោលការណ៍ណែនាំស្តីពី លក្ខខណ្ឌតម្រូវនៃការបង្ហាញភស្តុតាង ដើម្បីធានាការអនុវត្តច្បាប់ដោយតម្លាភាព។
ជាងនេះទៀត លោកស្រី រ៉ូណា ស្មីត បានផ្តល់អនុសាសន៍ឲ្យក្រសួងយុត្តិធម៌បង្កើនការបណ្តុះបណ្តាល និងផ្សព្វផ្សាយសំអាងហេតុផ្នែកច្បាប់ក្នុងសំណុំរឿងក្តីនានា ដល់ចៅក្រមថែមទៀត។ «ចៅក្រមទាំងអស់ទទួលបាននូវការបណ្តុះបណ្តាលអំពីបញ្ហានេះ ដើម្បីជួយសម្រួលឲ្យមានការយល់ដឹងកាន់តែច្បាស់អំពី សេចក្តីសម្រេច របស់តុលាការ»។ អ្នករាយការណ៍ពិសស UN បញ្ជាក់ពេលបញ្ចប់ទស្សនកិច្ច ជាលើកទី៣ រយៈពេល ១០ថ្ងៃ។
លោកស្រី រ៉ូណា ស្មីត បានសង្កត់ធ្ងន់ជាថ្មីដូច្នេះថា៖«ក្រសួងយុត្តិធម៌ត្រូវធានាថា តុលាការនី មួយៗ គួរដាក់បង្ហាញតារាងតម្លៃរឿងក្តីផ្លូវការ ព្រមទាំងតម្លៃស្របច្បាប់កំណត់»។ លោកស្រី រ៉ូណា ស្មីត សង្កត់ធ្ងន់ មុនពេលលោកស្រីបន្តជំរុញក្រសួងឲ្យបើកការស៊ើបអង្កេត និងដាក់ទណ្ឌកម្មវិន័យជាចាំបាច់ ក្នុងករណីមានភស្តុតាងពីការយកកម្រៃបន្ថែម លេចឡើង។
គួរជម្រាបជូនថា អ្នករាយការណ៍ពិសេសរបស់អង្គការសហប្រជាជាតិ ដែលទទួលបន្ទុកផ្នែក សិទ្ធិមនុស្សប្រចាំកម្ពុជា លោកស្រី រ៉ូណា ស្មីត បានបំពេញ ទស្សនកិច្ចផ្លូវការ ចាប់ពីថ្ងៃទី១០ ដល់ថ្ងៃទី ២០ នៅកម្ពុជា។ កន្លងទៅ លោកស្រីបានជួបពិភាក្សាជាមួយមន្ត្រីជាន់ខ្ពស់រដ្ឋាភិបាលកម្ពុជា គណបក្សសង្គ្រោះជាតិ អង្គការក្រៅរដ្ឋាភិបាល និងសហគមន៍ពលរដ្ឋជាដើម។ ពួកគេបានជជែកគ្នាពីបញ្ហាសិទ្ធិមនុស្ស ការរើសអើងស្រី្ត និងកុមារ ប្រព័ន្ធយុត្តិធម៌ និងបញ្ហានយោបាយជាដើម៕ Tag:
រ៉ូណា ស្មីត
សិទ្ធិមនុស្ស
© រក្សាសិទ្ធិដោយ thmeythmey.com