ជាតិ
×![]()
ភ្នំពេញ៖ ទីភ្នាក់ងារសហប្រតិបត្តិការអន្តរជាតិជប៉ុន(JICA) បានធ្វើការស្រាវជ្រាវ និងផលិតវីដេអូ ស្តីពី៖ ស្ថានភាពចរាចរណ៍នៅភ្នំពេញ។ ក្នុងនោះ JICA បានរកឃើញថា កំណើនប្រជាជន(១.៨លាននាក់,នៅឆ្នាំ២០១៦) និងរថយន្ត(កើនឡើង៣ដង ឆ្នាំ២០០៥-២០១៥) ឥរិយាបថអ្នកបើកបរ ដែលមិនសូវគោរពច្បាប់ចរាចរណ៍ ព្រមទាំងនិន្នាការប្រើប្រាស់យានយន្តឯកជន គឺសុទ្ធសឹងជាមូលហេតុនៃការកកស្ទះចរាចរណ៍នៅរាជធានីភ្នំពេញ។ បន្ថែមពីនេះ ក្នុងគោលដៅកាត់បន្ថយការកកស្ទះចរាចរណ៍ JICA បានលម្អិតពីដំណោះស្រាយសំខាន់ៗចំនួនពីរ គឺការគោរពច្បាប់ចរាចរណ៍ និងការប្រើប្រាស់មធ្យោបាយសាធារណៈ។
ទីភ្នាក់ងារសហប្រតិបត្តិការអន្តរជាតិជប៉ុន(JICA) បានស្រាវជ្រាវ និងផលិតវីដេអូ ជាង១២នាទី រៀបរាប់ពីមូលហេតុ ផលប៉ះពាល់ និងដំណោះស្រាយនៃការកកស្ទះចរាចរណ៍នៅរាជធានីភ្នំពេញ ដែល JICA ចាត់ទុកថា បញ្ហានេះ គឺជាបញ្ហាធ្ងន់ធ្ងរសម្រាប់អ្នកបើកបរ។ វីដេអូ ដែលមានចំណងជើងថា៖«រឿង បញ្ហាចរាចរណ៍ជាមួយ វត្តទី និងអ៊ីនឌី»បានពន្យល់ថា មូលហេតុនៃការកកស្ទះចរាចរណ៍ មានពីរសំខាន់៖
មូលហេតុទី១៖ ការស្ទះចរាចរណ៍ គឺបណ្តាលមកពីកំណើនប្រជាជននៅភ្នំពេញ។ JICA រកឃើញថា នៅឆ្នាំ១៩៩៨ នៅភ្នំពេញមានប្រជាជន ១លាននាក់។ ឆ្នាំ២០០៨ ប្រជាជនបានកើនឡើង ១.៣៣លាននាក់ ខណៈនៅឆ្នាំ២០១០ មានការធ្វើសមាហរណកម្ម ឃុំចំនួន២០របស់ខេត្តកណ្តាល ធ្វើឲ្យដែនដីរាជធានីភ្នំពេញមានចំនួនប្រជាជន ១.៦៩លាននាក់នៅឆ្នាំ២០១៣។ JICA បានសន្និដ្ឋានថា ចំនួនប្រជាជននៅភ្នំពេញ អាចកើនឡើងដល់ ១.៨ លាននាក់នៅឆ្នាំ២០១៦ ហើយអាចកើនឡើងបន្ថែមទៀតរហូត ២.៨ លាននាក់នៅឆ្នាំ២០៣៥។
មូលហេតុទី២៖ ចំនួនរថយន្តដែលបានចុះបញ្ជីនៅភ្នំពេញ បានកើនឡើង៣ដងក្នុងមួយទសវត្សរ៍ចុងក្រោយនេះ។ បន្ថែមពីនេះ ការកើនឡើងចំនួនទោចក្រយានយន្ត ក៏ជាមូលហេតុនៃការកកស្ទះចរាចរណ៍ផងដែរ។
ក្រៅពីការកើនឡើងនៃចំនួនយានយន្ត ការចតរថយន្តបំពានច្បាប់ ការមិនគោរពភ្លើងសញ្ញាចរាចរណ៍ ការបើកបរបញ្ច្រាសទិស គឺសុទ្ធសឹងជាមូលហេតុនៃកកស្ទះចរាចរណ៍។
ទន្ទឹមគ្នានេះ JICA រកឃើញថា ប្រសិនបើគ្មានវិធានការណ៍នោះទេ នោះស្ថានភាពចរាចរណ៍នៅភ្នំពេញ នឹងកាន់តែធ្ងន់ធ្ងរ ដែលធ្វើឲ្យពលរដ្ឋចំណាយពេលវេលាច្រើនក្នុងការធ្វើដំណើរទៅសាលារៀន និងកន្លែងការងារ ទាំងមានអារម្មណ៍ធុញទ្រាន់ និងមិនសប្បាយចិត្ត។
ការស្រាវជ្រាវដដែល បានបង្ហាញមធ្យោបាយពីរ ដើម្បីកាត់បន្ថយការកកស្ទះចរាចរណ៍។ ទីមួយ៖ ពលរដ្ឋត្រូវគោរពច្បាប់ចរាចរណ៍ និងគិតគូរពីឥរិយាបថនៃការបើកបរ ដូចជា ការចតរថយន្តនៅលើចិញ្ចើមផ្លូវ ការចតរថយន្តនៅចំណុចផ្លូវប្រសព្វ ការចតរថយន្តនៅលើចិញ្ចើមផ្លូវសងខាង និងការចតរថយន្តជាច្រើនខ្សែនៅមុខភោជនីយដ្ឋាន ផ្សារ និងសាលារៀន ដែល សកម្មភាពទាំងនេះ បានជំរុញឲ្យមានការកកស្ទះចរាចរណ៍។ ជាងនេះទៅទៀត ការគោរពភ្លើងចរាចរណ៍ សញ្ញាចរាចរណ៍ សញ្ញាចរាចរណ៍ និងគំនូសចរាចរណ៍ ត្រូវបាន JICA ពន្យល់ថា អាចកាត់បន្ថយការកកស្ទះចរាចរណ៍ និងគ្រោះថ្នាក់ចរាចរណ៍ផងដែរ។ ទីពីរ៖ ស្របពេលដែលសាលារាជធានីភ្នំពេញ ខិតខំកែលម្អផ្លូវ និងពង្រីកផ្លូវ ព្រមទាំងសាងសង់ស្ពានអាកាសនោះ ការប្រើប្រាស់មធ្យោបាយសាធារណៈ គឺជាមធ្យោបាយដ៏ល្អបំផុត ដើម្បីកាត់បន្ថយការកកស្ទះចរាចរណ៍។ JICA ពន្យល់ថា ការងាកមកប្រើប្រាស់មធ្យោបាយសាធារណៈ ពលរដ្ឋអាចចំណេញប្រាក់ មានសុវត្ថិភាព ជាពិសេស អាចកាត់បន្ថយចំនួនរថយន្តនៅលើដងផ្លូវ ដែលអាចកាត់បន្ថយការស្ទះចរាចរណ៍។ បើតាម JICA រដ្ឋាករស្វយ័តដឹកជញ្ជូនសាធារណៈរថយន្តក្រុង នឹងពង្រីកចំនួនរថយន្តក្រុងនៅរាជធានីភ្នំពេញ ឲ្យបាន១០ខ្សែនៅឆ្នាំ២០២០៕
Tag:
JICA
ចរាចរណ៍
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
