ភ្នំពេញ៖ គណបក្សសង្គ្រោះជាតិ ត្រៀមដាក់ពាក្យប្ដឹងទៅគណកម្មាធិការជាតិរៀបចំការបោះឆ្នោត (គ.ជ.ប) ឲ្យលុបឈ្មោះជនអន្តោប្រវេសន៍ជាង២ពាន់នាក់ ចេញពីបញ្ជីឈ្មោះបោះឆ្នោតថ្មីនេះ ។ គណបក្សសង្គ្រោះជាតិ អះអាងថា ជនអន្តោប្រវេសន៍ទាំងនេះ មិនមានឯកសារត្រឹមត្រូវ តាមច្បាប់ចុះឈ្មោះបោះឆ្នោតឡើយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានបញ្ជាក់ថា ភ្នាក់ងារគណបក្សលោកបានរកឃើញ មានជនអន្តោប្រវេសន៍ខុសច្បាប់ជាង២០០០នាក់ បានចុះឈ្មោះបោះឆ្នោត ក្នុងរយៈពេលជិតពីរខែនេះ។ លោក យឹម សុវណ្ណ បន្ថែមថា គណបក្សលោក បានឲ្យមេធាវីសរសេរពាក្យបណ្តឹងរួចជាស្រេចហើយ ពាក់ព័ន្ធនឹងជនសង្ស័យ ដែលមិនមានសញ្ជាតិខ្មែរត្រឹមត្រូវទាំងនេះ ដើម្បីប្ដឹងទៅគណកម្មាធិការជាតិរៀបចំការបោះឆ្នោត(គ.ជ.ប) ឲ្យលុបឈ្មោះពួកគេចេញពីបញ្ជីចុះឈ្មោះបោះឆ្នោតវិញ។ បើតាមលោក យឹម សុវណ្ណ គណបក្សលោកនឹងដាក់ពាក្យបណ្ដឹងនេះ នៅពេលដែលគ.ជ.ប បិទបញ្ជីឈ្មោះដំបូង នៅខែមករា ឆ្នាំ២០១៧ខាងមុខ។
ថ្លែងប្រាប់សារព័ត៌មានថ្មីៗ តាមរយៈទូរសព្ទ អ្នកនាំពាក្យគណបក្សសង្គ្រោះជាតិរូបនេះ បានបញ្ជាក់ហេតុផលដូច្នេះថា៖« ជនអន្តោប្រវេសន៍ខុសនីតិវិធីច្បាប់ជាង២០០០នាក់ ដែលភ្នាក់ងារយើងរកឃើញនោះ មានខ្លះមិនមានឯកសារត្រឹមត្រូវ និងខ្លះទៀតអះអាងថា ខ្លួនមានសញ្ជាតិខ្មែរ ប៉ុន្តែគ្មានព្រះរាជក្រឹត្យត្រឹមត្រូវ តែពួកគេអាចចុះឈ្មោះបោះឆ្នោត។ ដូច្នេះយើងនឹងដាក់ពាក្យប្ដឹងទៅគ.ជ.ប ទៅតាមនីតិវិធីច្បាប់ នៅដើមខែមករា ដើម្បីជួយដោះស្រាយលុបឈ្មោះពួកគេចេញពីបញ្ជីឈ្មោះបោះឆ្នោត»។
តែយ៉ាងណាលោក យឹម សុវណ្ណ មិនទាន់អាចសន្និដ្ឋានថា តើការចុះឈ្មោះបោះឆ្នោតរបស់ជនអន្តោសប្រវេសន៍ខុសច្បាប់ទាំងនោះ អាចមកពីមានការឃុបឃិតគ្នា រវាងអាជ្ញាធរ និងជនអន្តោប្រវេសន៍នេះ យ៉ាងណានោះទេ ។ លោកគ្រាន់តែបញ្ជាក់ថា រងចាំការស៊ើបអង្កេតលើករណីនេះសិន។
សារព័ត៌មានថ្មីៗ មិនទាន់អាចទាក់ទងសុំការអត្ថាធិប្បាយពីលោក ហង្ស ពុទ្ធា អ្នកនាំពាក្យគណកម្មាធិការជាតិរៀបចំការបោះឆ្នោត ដើម្បីសុំបកស្រាយតបជុំវិញការលើកឡើងរបស់គណបក្សសង្គ្រោះជាតិនេះឡើយ។
តែយ៉ាងណាលោក ហង្ស ពុទ្ធា ធ្លាប់ប្រាប់សារព័ត៌មានថ្មីៗកន្លងមកថា ជនអន្តោប្រវេសន៍ ដែលរស់នៅប្រទេសកម្ពុជា ហើយអាចចុះឈ្មោះបោះឆ្នោតបាននោះ លុះត្រាតែពួកគេមានសញ្ជាតិខ្មែរ ដែលចេញព្រះរាជក្រឹត្យពីព្រះមហាក្សត្រ ,អាចនិយាយភាសាខ្មែរ និងមានឯកសារច្បាប់ត្រឹមត្រូវ ទើប គ.ជ.ប អាចអនុញ្ញាតឲ្យពួកគេចុះឈ្មោះបាន។ បន្ថែមពីនេះ លោក ហង្ស ពុទ្ធា ក៏បានបញ្ជាក់ថា រាល់បុគ្គលណា ដែលចង់ប្ដឹងមក គ.ជ.ប ពាក់ព័ន្ធនឹងជនអន្តោប្រវេសន៍ចុះឈ្មោះបោះឆ្នោតនោះ ពួកគេត្រូវមានភស្តុតាង និងការស៊ើបអង្កេតឲ្យច្បាស់លាស់សិន ពោលគឺមិនមែនចេះតែប្ដឹង តាមរយៈការសង្ស័យផ្ទាល់ខ្លួននោះទេ។
ពាក់ព័ន្ធនឹងជនអន្តោប្រវេសននេះដែរ កន្លងមកប្រធានរដ្ឋសភាសម្ដេច ហេង សំរិន បានស្នើទៅរដ្ឋមន្ត្រីក្រសួងមហាផ្ទៃ សម្ដេច ស ខេង ឲ្យបញ្ជីរាយឈ្មោះជនបរទេសទាំងអស់ ដែលបានទទួលសញ្ជាតិខ្មែរស្របច្បាប់ ដោយមានព្រះរាជក្រឹត្យត្រឹមត្រូវ ដើម្បីកុំឲ្យគណបក្សសង្គ្រោះជាតិមានការសង្ស័យខុស ពីចំនួនជនអន្តោប្រវេសន៍ដែលទទួលបានអត្តសញ្ញាណប័ណ្ណសញ្ជាតិខ្មែរនេះ។ តែសម្ដេច ស ខេង បដិសេធមិនបញ្ចេញរបាយការណ៍ជនអន្តោប្រវេសន៍នេះឡើយ ក្រោមហេតុផលថា ដើម្បីការពារសន្តិសុខ សុវត្ថិភាពជនអន្តោប្រវេសន៍នៅកម្ពុជា។
គួរបញ្ជាក់ថា ការចុះឈ្មោះបោះឆ្នោត ចាប់ផ្តើមតាំងពីថ្ងៃទី១ ខែកញ្ញា ហើយនឹងបញ្ចប់នៅថ្ងៃទី ២៩ ខែវិច្ឆិកា។ប្រជាពលរដ្ឋមានសិទ្ធិចុះឈ្មោះបោះឆ្នោត មានចំនួនជាង៩លាននាក់៕