អន្តរជាតិ
រូបភាព៖ PACOM
×![]()
សហរដ្ឋអាមេរិកនឹងបញ្ជូនយន្តហោះចម្បាំងស៊េរីទំនើបចុងក្រោយ F-35 ទៅកាន់មូលដ្ឋានទ័ពរបស់ខ្លួននៅប្រទេសជប៉ុននៅឆ្នាំ ២០១៧ ខាងមុខនេះ។ យន្តហោះចម្បាំងទាំងអស់ចំនួន ១៦ គ្រឿងនឹងត្រូវបញ្ជូនទៅកាន់មូលដ្ឋានទ័ព Iwakuni ហើយវាក្លាយមូលដ្ឋានទ័ពអាមេរិកដំបូងបំផុតដែលមានយន្តហោះប្រភេទនេះប្រើប្រាស់។ ក្រៅពីយន្តហោះចម្បាំង កងទ័ពជើងទឹកអាមេរិកនឹងបញ្ជូននាវាចម្បាំងដែលអាចឲ្យយន្តហោះ F-35 ហោះឡើងនិងចុះចតបានក្នុងពេលបំពេញប្រតិបត្តិការួមគ្នានោះ មកកាន់មូលដ្ឋាន Sasebo ប្រទេសជប៉ុនផងដែរ។ ការចល័តសព្វាវុធនេះទៅជប៉ុននេះធ្វើឡើងក្រោមក្របខណ្ឌនៃយុទ្ធសាស្ត្រពង្រឹងឥទ្ធិពលអាមេរិកឡើងវិញនៅក្នុងតំបន់អាស៊ីប៉ាស៊ីហ្វិក។
សូមស្ដាប់ពត៌មានលម្អិត៖
ដើមសប្តាហ៍នេះ សហរដ្ឋអាមេរិកបានប្រកាសថា យន្តហោះចម្បាំងស៊េរីទំនើប F-35 នឹងមានវត្តមាននៅមូលដ្ឋានទ័ពរបស់ខ្លួននៅក្នុងប្រទេសជប៉ុននៅឆ្នាំក្រោយ។ យោងតាមទីភ្នាក់ងារព័ត៌មានជប៉ុន Kyodo យន្តហោះប្រដេញ F-35 ទាំងនោះនឹងត្រូវពង្រាយទៅកាន់មូលដ្ឋានទ័ព Iwakuni ហើយយន្តហោះ ដែលនឹងត្រូវបញ្ជូនទៅជប៉ុននោះមានចំនួន ១៦គ្រឿង។ យន្តហោះចំនួន ១០ គ្រឿងនឹងទៅដល់ជប៉ុននៅខែមករាឆ្នាំ ២០១៧ ហើយ៦គ្រឿងទៀតនឹងទៅដល់ជប៉ុនៅខែ សីហា។ យន្តហោះស៊េរីថ្មីនេះនឹងទៅជំនួសតំណែងយន្តហោះចម្បាំង F-18 និងយន្តហោះ AV-8B Harrier ដែលកំពុងស្ថិតនៅមូលដ្ឋាន Iwakuni ស្រាប់។
(រូបភាព៖ PACOM)
បើតាមរបាយការណ៍កងទ័ពអាកាសអាមេរិក ក្រុងវ៉ាស៊ីនតោនបានផ្តល់ដំណឹងពាក់ព័ន្ធការពង្រាយសព្វាវុធថ្មីទៅកាន់ទឹកដីជប៉ុនរួចហើយតាំងពីខែសីហា ហើយដំណើរការពង្រាយសព្វាវុធនឹងចាប់ផ្តើមជាបន្តបន្ទាប់តាមកាលវិភាគដែលបានកំណត់។ កាលពីខែ សីហា រដ្ឋាភិបាលក្រុងតូក្យូបានប្រាប់អាជ្ញាធរតំបន់ Iwakuni ពីការពង្រាយសព្វាវុធរបស់អាមេរិករួចរាល់ហើយ ដើម្បីឲ្យអាជ្ញាធរបានដឹងនិងត្រៀមលក្ខណៈជាមុន។
ជារួម មូលដ្ឋានទ័ព Iwakuni នឹងក្លាយជាមូលដ្ឋានទ័ពអាមេរិកដំបូងបំផុតដែលទទួលបានយន្តហោះចម្បាំង F-35 នេះប្រើប្រាស់ ក្រោយពីកងទ័ពអាកាសអាមេរិកប្រកាសនៅថ្ងៃ ២ សីហា កន្លងទៅថា យន្តហោះ F-35 ជំហានដំបូងត្រៀមខ្លួនសម្រាប់ការប្រយុទ្ធហើយ។ យន្តហោះ F-35 ត្រូវបានគេកែសម្រួលជាច្រើនដងមុនពេលចាប់ផ្តើមដាក់ឲ្យប្រើប្រាស់ជាផ្លូវការដោយសារវានៅប្រឈមបញ្ហាបច្ចេកទេសច្រើន។ ប៉ុន្តែយន្តហោះនេះ ត្រូវបានគេចាត់ទុកថា ជាយន្តហោះចម្បាំងដ៏ទំនើបជំនាន់ទី ៥ ហើយវាមានសមត្ថភាពខ្ពស់ក្នុងការបំពេញបេសកកម្មវាយប្រហារតាមផ្លូវអាកាសថែមទៀតផង។ ហើយការចូលបំពេញការងារក្នុងវិស័យកងទ័ពអាកាសអាមេរិករបស់យន្តហោះប្រភេទនេះនឹងបង្កើនសមត្ថភាពនិងយុទ្ធសាស្ត្រយោធាអាមេរិកឲ្យកាន់តែខ្លាំងថែមទៀត។
(រូបភាព៖ PACOM)
តាមពិតទៅ ការពង្រាយសព្វាវុធទំនើបៗរបស់អាមេរិកបន្ថែមទៅ កាន់ប្រទេសជប៉ុនជាយុទ្ធសាស្ត្រមួយក្នុងការពង្រឹងឥទ្ធិពលរបស់អាមេរិកវិញនៅតំបន់អាស៊ី និងទប់ទល់ការគំរាមកំហែងសន្តិសុខមួយចំនួន។ ក្នុងនោះមានទាំងជួយ ទប់ទល់ជាមួយឥទ្ធិពល របស់មហាយក្សចិនផងដែរ។ អាមេរិកកំពុងព្យាយាមសម្រេចផែនការរបស់ខ្លួនដោយផ្ទេរកងទ័ពអាកាសនិងកងទ័ពជើងទឹករបស់ខ្លួនរហូតដល់៦០ភាគរយទៅកាន់តំបន់អាស៊ីប៉ាស៊ីហ្វិកត្រឹមឆ្នាំ ២០២០ ។ ហើយការបន្តផ្លាស់ប្តូរទីតាំងកងទ័ពដោយបញ្ជូនកងទ័ពភាគច្រើនមកកាន់តំបន់អាស៊ីប៉ាស៊ីហ្វិក ជាការពង្រឹងតួនាទី និងបង្កើនឥទ្ធិពលអាមេរិកផ្នែកយោធានៅក្នុងតំបន់ ហើយវាស្ថិតក្រោមគោលនយោបាយធ្វើឲ្យមានតុល្យភាពអំណាចនៅតំបន់អាស៊ីរបស់ប្រធានាធិបតី បារ៉ាក់ អូបាម៉ាដែរ។
ជាធម្មតាអាមេរិកបានចូលរួមយ៉ាងសកម្មនៅមហាសមុទ្រប៉ាស៊ីហ្វិកភាគខាងលិច ជាពិសេសនៅសមុទ្រចិនខាងត្បូង ដោយលើកហេតុផលថាចូលរួម «ការពារសេរីភាពក្នុងការធ្វើនាវាចរណ៍ និងរក្សាសេរីភាពក្នុងការហោះហើរផង។ អាមេរិកបន្តសកម្មភាពនេះ ទោះបីជាមានការព្រមានខ្លាំងពីក្រុងប៉េកាំង កន្លងមកក៏ដោយ។
(រូបភាព៖ PACOM)
ក្រៅពីត្រៀមបញ្ជូនយន្តហោះចម្បាំង F-35 ចំនួន ១៦ ទៅជប៉ុន អាមេរិកក៏នឹងបញ្ជូននាវាចម្បាំងថ្មីទៅកាន់មូលដ្ឋាន Sasebo នៅជប៉ុនផងដែរ។នាវាចម្បាំង USS Wasp (LHD 1) នេះនឹងត្រូវបញ្ជូនចេញពីមូលដ្ឋានទ័ពអាមេរិក Norfolk នៅរដ្ឋ Virginia ទៅជំនួសនាវា USS Bonhomme Richard (LHD 6) ដែលស្ថិតនៅមូលដ្ឋាន Sasebo នោះ។ នាវា USS Bonhomme Richard (LHD 6) នឹងត្រូវត្រឡប់ទៅកាន់មូលដ្ឋានទ័ពអាមេរិកនៅ San Diego កាលីហ្វ័រនីញ៉ាដើម្បីទទួលការថែទាំនិងកែលម្អឡើងវិញ។
ចំពោះ នាវា USS Wasp (LHD 1) នឹងត្រូវទៅឈរជើងនៅជប៉ុននៅឆ្នាំ ២០១៧ ប៉ុន្តែកាលបរិច្ឆេទជាក់លាក់ដែលនាវាចម្បាំងនេះទៅដល់ប្រទេសជប៉ុនមិនត្រូវបានគេបញ្ជាក់ឲ្យដឹងឡើយ។
នាវាចម្បាំងត្រូវបានគេធ្វើទំនើបកម្មដើម្បីអនុញ្ញាតឲ្យនាវានេះអាចបំពេញប្រតិបត្តិការជាមួយយន្តហោះចម្បាំង F-35 ក្នុងស្ថានភាពផ្សេងគ្នាច្រើន។ ក្នុងពេលបំពេញប្រតិបត្តិការ យន្តហោះចម្បាំង F-35 នេះអាចហោះឡើងក្នុងរយៈចម្ងាយខ្លី និងអាចចុះចតបញ្ឈរ(STOVL)បានលើនាវាចម្បាំងនេះផងដែរ។ ក្រៅពីយន្តហោះ F-35 យន្តហោះយោធាឯទៀតមានដូចជា MV-22 Osprey និង AV-8B Harrier ក៏អាចចុះចតលើនាវានេះបានដែរ។
នាវាចម្បាំងនេះក៏ទទួលបានការលម្អសព្វាវុធដែលបំពាក់ជាប់ជាមួយនាវាដើម្បីបង្កើនសមត្ថភាពក្នុងការប្រយុទ្ធ ដូចជា វាត្រូវបានបំពាក់ប្រព័ន្ធមីស៊ីលការពារខ្លួនច្រើនប្រភេទ,ប្រព័ន្ធរ៉ាដាថ្មី និងប្រព័ន្ធបច្ចេកវិទ្យាថ្មីៗជាច្រើនទៀតផងដែរ៕
Tag:
F-35
Iwakuni
Sasebo
ជប៉ុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
