ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
អន្តរជាតិ
នយោបាយអន្តរជាតិ
លោក ដូណាល់ ត្រាំ ហាក់ពិបាកទាក់ទាញយុវជនឲ្យគាំទ្រជាងអ្នកស្រី ហ៊ីឡារី គ្លីនតុន
28, Oct 2016 ,
2:31 pm
រូបភាព
×
ដោយ:
អាមេរិក៖យុវជនអាមេរិកមួយចំនួន ហាក់មិនពេញចិត្តចំពោះគោលនយោបាយ និងឥរិយាបថរបស់បេក្ខជនប្រធានាធិបតីនៃគណបក្សសាធារណរដ្ឋនោះឡើយ។ អ្នកជំនាញផ្នែកវិទ្យាសាស្ត្រនយោបាយអាមេរិកខ្លះ យល់ថា គណបក្សសាធារណរដ្ឋ ជាពិសេសលោក ដូណាល់ ត្រាំ មិនមានចំណុចល្អ ដើម្បីទាក់ទាញយុវជនឲ្យគាំទ្រខ្លួននោះទេ តែអ្នកគាំទ្រលោក ត្រាំ ភាគច្រើនគឺជាមនុស្សមានវ័យចំណាស់។
ក្នុងចំណោមយុវជនអាមេរិកចំនួន ១០ នាក់ ដែលសារព័ត៌មានថ្មីៗ បានសាកសួរនៅតាមផ្លូវសាធារណៈ និងនៅក្នុងសកលវិទ្យាល័យក្នុងរដ្ឋមួយចំនួននៅសហរដ្ឋអាមេរិក មានយុវជនគាំទ្រអ្នកស្រី ហ៊ីឡារី គ្លីនតុន បេក្ខជនប្រធានាធិបតីនៃគណបក្សប្រជាធិបតេយ្យ ដល់ទៅ ៦ នាក់ និងគាំទ្រលោក ដូលណាល់ ត្រាំ តែ ២ នាក់ ហើយពីរនាក់ទៀត មិនគាំទ្របេក្ខជនទាំងពីរនេះទេ។ ក្នុងចំណោមយុវជនទាំងនោះ សុទ្ធតែយល់ថា យុទ្ធានាការនៃការបោះឆ្នោតជ្រើសរើសប្រធានាធិបតីអាមេរិកនៅអាណត្តិនេះ មានលក្ខណៈប្លែក និងមានលក្ខណៈតានតឹងជាងអាណត្តិមុនៗ ដោយសារបេក្ខជននៃគណបក្សទាំងពីរចូលចិត្តវាយប្រហារគ្នារឿងផ្ទាល់ខ្លួន និងជាពិសេសពាក្យការប្រើពាក្យសម្តីរបស់លោក ដូណាល់ ត្រាំបេក្ខជនប្រធានាធិបតីនៃបក្សសាធារណៈរដ្ឋ។
យុវជនវ័យ ២៥ ឆ្នាំ ជានិស្សិតផ្នែកពាណិជ្ជកម្មនៅទីក្រុងញ៉ូវយ៉ក លោក John Clarke យល់ថា ការបោះឆ្នោតនៅក្នុងអាណត្តិនេះ គួរឲ្យអស់សំណើច ពីព្រោះតែមានបេក្ខជនប្រធានាធិបតីលោក ដូណាល់ ត្រាំ។ និស្សិត John Clarke បានប្រាប់សារព័ត៌មានថ្មីៗ នៅពេលដែលលោកធ្វើដំណើរកម្សាន្តនៅរដ្ឋ Ohio បែបនេះថា៖« ខ្ញុំគិតថា លោកត្រាំឆ្កួតណាស់។ ខ្ញុំមិនចង់ឃើញអ្នកឈរឈ្មោះបេក្ខជនប្រធានាធិបតី ដូច លោកត្រាំ នៅក្នុងប្រទេសរបស់ខ្ញុំឡើយ។ យុវជន ដែលអះអាងថា ខ្លួននឹងបោះឆ្នោតឲ្យអ្នកស្រី ហ៊ីឡារី គ្លីនតុន រូបនេះ បញ្ជាក់បន្ថែមយ៉ាងនេះទៀតថា៖«ខ្ញុំនឹងបោះឆ្នោតឲ្យគណបក្សប្រជាធិបតេយ្យ ពីព្រោះលោក ត្រាំ ដូចមនុស្សឆ្កួត គ្មានគោលនយោបាយជាក់លាក់ និយាយភូតកុហក តាមតែការនឹកឃើញរបស់ខ្លួន»។
កញ្ញា Calar និស្សិតនៅសកលវិទ្យាល័យ USC University ក្នុងរដ្ឋកាលីហ្វ័រនីញ៉ា និង កញ្ញា Amanala Rossa អាយុ ១៩ ឆ្នាំ និស្សិតនៅសកលវិទ្យាល័យ Western នៅទីក្រុង Cleveland ក្នុងរដ្ឋ Ohio និយាយដូចគ្នាថា ពួកគេនឹងបោះឆ្នោតឲ្យបេក្ខជនប្រធានាធិបតីនៃគណបក្សប្រជាធិបតេយ្យ ព្រោះនិស្សិតទាំងពីររូបនេះ យល់ថា អ្នកស្រី ហ៊ីឡារី គ្លីនតុន មានចំណុចល្អ គ្រាន់បើជាងលោក ដូណាល់ ត្រាំ។ កញ្ញា Amanala Rossa បញ្ជាក់យ៉ាងនេះថា៖«ខ្ញុំយល់ថា អ្នកស្រីមានគោលនយោបាយបើកសិទ្ធិសេរីភាព និងយកចិត្តទុកដាក់ជួយដល់យុវជន ជាពិសេសផ្នែកអប់រំ។ លោកត្រាំនិយាយអាក្រក់»។
លោក Anthony Arendas និស្សិតផ្នែក Phycology ឆ្នាំទី ៣ នៅសកលវិទ្យាល័យ CSULB University ក្នុងទីក្រុងឡុងប៊ិច រដ្ឋកាលីហ្វ័រនីញ៉ាប្រាប់សារព័ត៌មានថ្មីៗថា លោកនឹងបោះឆ្នោតឲ្យអ្នកស្រី ហ៊ីឡារី គ្លីនតុន ព្រោះលោកមិនចង់ឲ្យលោកត្រាំ ជាប់ឆ្នោត។ លោក Anthony Arendas បរិយាយដូច្នេះថា៖«ខ្ញុំនឹងបោះឆ្នោតឲ្យ Hillary ព្រោះខ្ញុំមិនចង់ឲ្យលោកត្រាំឈ្នះ។ ជាគំនិតរបស់ខ្ញុំ គិតថា យុវជនជំនាន់ក្រោយភាគច្រើនបោះឆ្នោតឲ្យអ្នកស្រី គ្លីនតុន ព្រោះពួកគេមានកង្វល់ចំពោះសម្តីលោកត្រាំ ដែលនិយាយមិនចេះគិត»។
យុវជនខាងលើ បង្ហាញយោបល់ចំពោះសកម្មភាពរបស់យុវជនអាមេរិកជុំវិញការបោះឆ្នោតនៅថ្ងៃទី ៩ ខែវិច្ឆិកា ខាងមុខបែបនេះថា៖« មនុស្សភាគច្រើនមិនចង់ទៅបោះឆ្នោត ព្រោះគិតគោលនយោបាយអ្នកទាំងពីរមិនល្អ។ ខ្ញុំគិតថា បច្ចុប្បន្នយុវជនអាមេរិកកាំង ដូចជាមិនសូវសកម្មក្នុងរឿងនយោបាយប៉ុន្មាននោះទេ»។
ជាមួយគ្នានេះ កញ្ញា Katherrine Harley បានលើកឡើងថា ការបោះឆ្នោតលើកនេះ ប្លែក តែសំខាន់ណាស់សម្រាប់រូបនាង។ កញ្ញា យល់ថា ការបោះឆ្នោតនៅអាណត្តិនេះ ធ្វើឲ្យសង្គមអាមេរិកបែកបាក់គ្នាខ្លាំង។ « វាសំខាន់ដោយសារយើងបែកបាក់គ្នាណាស់ បច្ចុប្បន្ននៅក្នុងសង្គមយើង។ បេក្ខភាពជាប្រធានាធិបតីជាលោកត្រាំ គឺជារឿងដ៏អាម៉ាសណាស់សម្រាប់ប្រទេសយើង។ អ្វីដែលលោកត្រាំលើកឡើង និងគោលនយោបាយរបស់គាត់ គឺប៉ះពាល់សិទ្ធិរបស់យើង ដូចជាសិទ្ធិក្នុងការរំលូតកូនជាដើម។ និស្សិតឆ្នាំទី ២ ផ្នែកវិទ្យាសាស្ត្របរិស្ថាននៅសកលវិទ្យាល័យ CSULB University រូបនេះ និយាយដូច្នេះហើយ ក៏បញ្ជាក់បន្ថែមទៀតយ៉ាងនេះថា៖« ហើយទាក់ទងនឹងតុលាការកំពូល បើសិនជាលោកត្រាំជាប់ឆ្នោត នឹងប៉ះពាល់ការបកស្រាយរដ្ឋធម្មនុញ្ញ ដោយសារបេក្ខជនចៅក្រមតុលាការកំពូលដែលលោកត្រាំ នឹងជ្រើសរើសនោះ មិនតំណាង និងការពារសិទ្ធិរបស់ពលរដ្ឋ»។
ដោយឡែកពីការលើកឡើងរបស់យុវជនខាងលើ យុវជន Ed Adnor ជនជាតិអាមេរិក ដើមកំណើតអេស្បាញ យល់ថា រវាងបេក្ខជនទាំងពីរនេះ សុទ្ធតែមិនសូវមានចំណុចល្អដូចគ្នា តែលោកថា ប្រសិនបើលោកទៅបោះឆ្នោត លោកប្រហែលជានឹងជ្រើសរើសយកលោក ដូណាល់ ត្រាំ។ និស្សិតនៅសកលវិទ្យាល័យ CSUlB University រូបនេះ និយាយបន្ថែមដូច្នេះថា៖« ខ្ញុំប្រហែលជារើសលោក ត្រាំ»។
លោក Mike John យុវជនដែលកំពុងរកការងារធ្វើនៅក្នុងរដ្ឋ Ohio ឲ្យដឹងថា រូបលោកនឹងបោះឆ្នោតឲ្យបេក្ខជនរូបណា ដែលជួយឲ្យសេដ្ឋកិច្ចរីកចម្រើន និងយុវជនមានការងារធ្វើ។ «ខ្ញុំនឹងបោះឆ្នោត។ ខ្ញុំប្រហែលជាបោះឆ្នោតឲ្យលោកត្រាំ។ លោកត្រាំ គាត់មានបទពិសោធច្រើនផ្នែកពាណិជ្ជកម្ម។ ខ្ញុំយល់ថា លោកត្រាំ អាចជួយឲ្យយុវជនមានការងារ និងសេដ្ឋកិច្ចរីកចម្រើន»។ នេះជាការបញ្ជាក់របស់លោក Mike John ។
លោក ឆាល ណូប៊ល ( Charles Npble) សាស្ត្រាចារ្យផ្នែកវិទ្យាសាស្ត្រនយោបាយ នៅសកលវិទ្យាល័យ California State University of Long Beach ក្នុងរដ្ឋកាលីហ្វ័រនីញ៉ា សង្កេតឃើញ ក្នុងអំឡុងពេលយុទ្ធានាការឃោសនាបោះឆ្នោតកន្លងមកនេះ អ្នកស្រី ហ៊ីឡារី គ្លីនតុន ធ្វើបានល្អជាងលោក ត្រាំ ឆ្ងាយណាស់ ក្នុងការទាក់ទាញចិត្តយុវជន។ «លោកត្រាំ គឺគ្មានចំណុចទាក់ទាញឲ្យយុវជនបោះឆ្នោតឲ្យនោះទេ។ គណបក្សសាធារណរដ្ឋ មានបញ្ហាមួយធំ ក្នុងការទាក់ទាញអ្នកបោះឆ្នោតវ័យក្មេង។ ចំណុចកត់សម្គាល់ ភាគច្រើនអ្នកបោះឆ្នោតវ័យក្មេងនៅអាមេរិកចម្រុះជនជាតិច្រើនជាងអ្នកវ័យចំណាស់ ហើយភាគច្រើនមានកំរិតវប្បធម៌ខ្ពស់ជាងអ្នកវ័យចំណាស់ផង។ គណបក្សសាធារណរដ្ឋ ទាក់ទាញអ្នកគាំទ្របានតែអ្នកមានកម្រិតវប្បធម៌ទាប»។ នេះជាការបញ្ជាក់បន្ថែមរបស់លោក ឆាល ណូប៊ល។
សាស្ត្រាចារ្យរូបនេះ បានលើកឡើងនូវឧទាហរណ៍ជាក់ស្តែងអំពីកូនសិស្សរបស់លោក ដែលបាននិយាយប្រាប់ខ្លួនថា៖« វាច្បាស់ណាស់ថា យុវជនភាគច្រើនគាំទ្រអ្នកស្រី ហ៊ីឡារី គ្លីនតុន ច្រើនជាងលោកត្រាំ។ កូនសិស្សភាគច្រើន មិនសូវគាំទ្រលោកត្រាំទេ ពីព្រោះតែគោលនយោបាយអភិរក្សនិយម ដូចជា មិនឲ្យអ្នកស្រឡាញ់ភេទដូចគ្នារៀបការជាដើម»។ លោក ឆាល ណូប៊ល បន្ថែមទៀតថា ហេតុផលសំខាន់មួយ ដែលធ្វើឲ្យយុវជនគាំទ្រអ្នកស្រី ហ៊ីឡារី គ្លីនតុន ច្រើនជាងលោក ត្រាំ គឺដោយសារអ្នកស្រី បន្តជំហរពីលោក Bernie Sander ដែលមានគោលនយោបាយសំខាន់ទៅលើការអប់រំយុវជន។
តែយ៉ាងណាសាស្ត្រាចារ្យរូបនេះ រិះគន់គោលនយោបាយលើកកម្ពស់ការអប់រំដល់យុវជនរបស់អ្នកស្រី ហ៊ីឡារី គ្លីនតុន ថា មិនមានភាពប្រាកដប្រជានោះទេ។ លោកថា គោលនយោបាយរបស់អ្នកស្រី ហ៊ីឡារី គ្លីនតុន ដែលចង់ឲ្យនិស្សិតរៀនសាលារដ្ឋដោយមិនចាំបាច់បង់ថ្លៃ ចំពោះគ្រួសារដែលមានចំណូលមិនជាក់លាក់ ឬចំណូលតិចនោះ គឺមិនច្បាស់លាស់នោះទេ។ លោកសង្កត់ធ្ងន់បែបនេះថា៖«វាមិនងាយស្រួលទេ វាធ្វើឲ្យសិស្សឈប់រៀនសាលាឯកជន មករៀនសាលារដ្ឋវិញ។ តើរដ្ឋមានលុយទេ? ខ្ញុំកំពុងឃ្លាំមើលចំណុចនេះ។ តើគាត់នឹងធ្វើបានដូចម្តេច»។
លោកស្រី Rachel Gunther ប្រធានប្រចាំតំបន់ស្រុក Los Angeles របស់គណបក្សសាធារណរដ្ឋ ប្រាប់សារព័ត៌មានថ្មីៗថា លោក ដូណាល់ ត្រាំ ទទួលបានគាំទ្រច្រើនពីយុវជន ហើយយុវជនទាំងនោះ សុទ្ធតែអ្នកគោរពច្បាប់។ «យើងមានយុវជនចូលរួមច្រើននៅពេលយើងជួបជុំគ្នា គ្រាន់តែពេលខ្លះគាត់មិនប្រាប់ថា គាំទ្រលោកត្រាំ ទេ ។ អ្នកគាំទ្រ លោកត្រាំ ជាយុវជនឆ្លាតៗ យុវជនធ្វើតាមច្បាប់ ចេះគិតពីសារសំខាន់នៃការបោះឆ្នោត។ បើយុវជនមិនចង់ឲ្យប្រទេសជាតិធ្លាក់ចុះ តែចង់ឲ្យប្រទេសជាតិរុងរឿង នឹងបោះឆ្នោតឲ្យលោកត្រាំ»។
លោកស្រី Rachel Gunther ប្រធានប្រចាំតំបន់ស្រុក Los Angeles របស់គណបក្សសាធារណរដ្ឋ
នៅពេលដែលសារព័ត៌មានថ្មីៗ លើកឡើងថា ក្នុងចំណោមយុវជន ១០ នាក់ ដែលបានសាកសួរនៅតាមផ្លូវ និងនៅតាមសកលវិទ្យាល័យមួយចំនួន ភាគច្រើនគាំទ្រ អ្នកស្រី ហ៊ីឡារី គ្លីនតុន ជាងលោក ដូណាល់ ត្រាំ លោកស្រី Rachel Gunther ឆ្លើយតបបែបនេះថា៖«ប្រហែលជាទៅរកកន្លែងខុស ឬទៅរកកន្លែងហ៊ីឡារី គ្លីនតុន។ ជួបសម្ភាសន៍នៅតាមផ្លូវ ពេលខ្លះ គាត់មិនស្គាល់ទាំងឈ្មោះបេក្ខជនប្រធានាធិបតីផង។ ពេលខ្លះទៀត ពួកគាត់ ជាមនុស្សមើល CNN និងNBC ដែលគ្រប់គ្រងដោយអ្នកស្រី ហ៊ីឡារី គ្លីនតុន»៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ហ៊ីឡារី គ្លីនតុន
ដូណាល់ ត្រាំ
បោះឆ្នោតអាមេរិក
© រក្សាសិទ្ធិដោយ thmeythmey.com
អត្ថបទពេញនិយម
តើពាក្យ «សិទ្ធិ, សិទ្ធ» ប្រើខុសគ្នាដូចម្តេច?
4 ថ្ងៃ
កម្ពុជា នឹងមានភ្លៀងធ្លាក់ ពីថ្ងៃទី៤-៦ឧសភា
5 ថ្ងៃ
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ
6 ថ្ងៃ
«នាំអាត» និង«នាំអាទិ៍»មួយណាត្រឹមត្រូវ?
1 ថ្ងៃ
ការប្រឡងគ្រូអនុវិទ្យាល័យ នឹងរៀបចំ២ដំណាក់កាល ដើម្បីសម្រាំងយកបេក្ខជន៤៤១នាក់ប៉ុណ្ណោះ
5 ថ្ងៃ
អត្ថបទពេញនិយមបន្ថែម