លោក ស៊ុន ចាន់ថុល ដាស់តឿនមន្ត្រីក្រោមឱវាទកុំឲ្យ«ធ្វើផ្លូវជាប់រហូត» តែធ្វើឲ្យរឹងមាំ

ជាតិ

លោក ស៊ុន ចាន់ថុល ដាស់តឿនមន្ត្រីក្រោមឱវាទកុំឲ្យ«ធ្វើផ្លូវជាប់រហូត» តែធ្វើឲ្យរឹងមាំ

31, Oct 2016 , 10:39 pm

រូបភាព

រូបភាពពីក្រសួងសាធារណការ និងដឹងជញ្ជូន

ដោយ:

ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានដាស់តឿនមន្ត្រីក្រោមឱវាទ ឲ្យកសាងផ្លូវតាមបែបបទបច្ចេកទេសឲ្យបានត្រឹមត្រូវ ដើម្បីធានាគុណភាពផ្លូវ។ លោកថ្លែងយ៉ាងដូច្នេះថា៖«កន្លងមកមានការទិតៀនថា ក្រសួងសាធារណការធ្វើផ្លូវជាប់រហូត ធ្វើមុខខូចក្រោយ ធ្វើក្រោយខូចមុខ មួយទៀតគេថាក្រសួងសាធារណការចាក់ស្ដើងស៊ីក្រាស់។ ល្មមឈប់ហើយ ដល់ពេលយើងធ្វើផ្លូវតាមលក្ខខណ្ឌបច្ចេកទេស ធ្វើឲ្យជាប់បានយូរ ធ្វើឲ្យរឹងមាំ»។

ថ្លែងក្នុងពិធីបើកការដ្ឋានជួសជុលផ្លូវជាតិលេខ៤ និងផ្លូវក្នុងក្រុងព្រះសីហនុ នៅថ្ងៃទី៣១ខែតុលានេះ លោក ស៊ុន ចាន់ថុល ឲ្យដឹង ក្រសួងកំពុងរៀបចំនីតិវិធីតាមដានការដ្ឋានទាំងអស់ ដោយលោកអះអាងថា បើការសាងសង់ផ្លូវខុសក្បួនខ្នាតបច្ចេកទេស នោះក្រសួងមិនទទួលយកផ្លូវទាំងនោះទេ។

លោក ស៊ុន ចាន់ថុល ក៏បានជំរុញមន្ត្រីថ្នាក់ក្រោម ឲ្យជួសជុលផ្លូវ (សំបុកមាន់) ក្នុងដែនសមត្ថកិច្ចរបស់ខ្លួន។ លោកប្រាប់ថា ក្រសួងនឹងផ្ដល់ម៉ូតូកង់បី ដោយមានបំពាក់ឧបករណ៍ជួសជុលផ្លូវ ដល់គ្រប់មន្ទីរសាធារណរាជធានី ខេត្ត។

សូមស្តាប់ប្រសាសន៍ លោក ស៊ុន ចាន់ថុល ខាងក្រោមនេះ៖