កីឡាជាតិ
កីឡាការិនីវាយសីម្នាក់បោះបង់ការប្រកួតនៅពេលគូប្រជែងវាយគ្រាប់សីចំភ្នែក
×
កីឡាការិនីវាយសីម្នាក់បានបោះបង់ការប្រកួតពាក់កណ្តាលទីនៅពេលគូប្រកួតវាយគ្រាប់សីចំភ្នែកក្នុងអំឡុងពេលប្រកួតវាយសីដណ្តើមជើងឯកប្រចាំព្រឹត្តិការណ៍កីឡាជាតិលើកទី១ក្នុងវគ្គជម្រុះនៅទីលានវាយសីក្នុងពហុកីឡដ្ឋានជាតិកាលពីព្រឹកថ្ងៃទី៣១ ខែតុលា។
កីឡាការិនីមកពីខេត្តកោះកុង ឧធីត ធីតារ៉ាត់ ដៃគូជាមួយ សុខ ប៊ុនហូ បានបោះបង់ការប្រកួតពាក់ទាំងកណ្តាលទីខណៈដែលកីឡាការិនី ឧធីត ធីតារ៉ាត់ ត្រូវបានគូប្រជែងរាជធានីភ្នំពេញដែលមានកីឡាការិនី កែរ ពេជ្រឆរ៉ាវី ចាប់ដៃគូជាមួយកីឡាការិនី កែវ ពេជ្រ លីឌីណេត វាយគ្រាប់សីចំភ្នែកដែលមិនអាចបន្តការប្រកួតបាន។
សម្រាប់ការប្រកួតកីឡាវាយសីក្នុងវគ្គជម្រុះលើវិញ្ញាសាវាយគូនារីដែលធ្វើឡើងនៅទីលានវាយសីក្នុងពហុកីឡដ្ឋានជាតិនាព្រឹត្តិការណ៍កីឡាជាតិលើកទី១កាលពីព្រឹកថ្ងៃទី៣១ ខែតុលា ក្រុមកីឡាការិនីមកពីខេត្តកោះកុងបានចាញ់ក្រុមកីឡាការិនីរាជធានីភ្នំពេញក្នុងសិតទី១។
នៅសិតទី២មុនក្រុមកីឡាការិនីខេត្តកោះកុងបោះបង់ការប្រកួតក្រុមនេះបាននាំមុខក្រុមកីឡាការិនីរាជធានីភ្នំពេញក្នុងលទ្ធផល ១៦-១៥ ប៉ុន្តែគ្រាប់សីដែលចំភ្នែកកីឡាការិនីខេត្តកោះកុងបានជួយឲ្យរាជធានីភ្នំពេញតាមស្មើខេត្តកោះកុង ១៦-១៦ ហើយក៏ជាលទ្ធផលជ័យជម្នះរបស់រាជធានីភ្នំពេញ។
បើយោងតាមអ្នកជំនាញភ្នែកដែលបានពិនិត្យពីស្ថានភាពរបួសរបស់កីឡាការិនី ឧធីត ធីតារ៉ាត់ គ្រាប់ភ្នែកដែលរងរបួសដោយគ្រាប់សីនោះមិនមានស្ថានភាពធ្ងន់ធ្ងរប៉ះពាល់ដល់គ្រាប់ភ្នែកនោះឡើយ៕
Tag:
វាយសី
ឧធីត ធីតារ៉ាត់
កីឡាជាតិលើកទី១
© រក្សាសិទ្ធិដោយ thmeythmey.com