ជាតិ
សាលារាជធានីភ្នំពេញ គ្រោងចំណាយថវិកា ៥ លានដុល្លារស្ថាបនាផ្លូវបឹងធំ ភ្ជាប់ពីផ្លូវជាតិលេខ៤ ដល់លេខ៣
×![]()
ភ្នំពេញ៖ សាលារាជធានីភ្នំពេញ ចំណាយថវិកា ៥លាន ដុល្លារសម្រាប់ស្ថាបនាផ្លូវបឹងធំ តភ្ជាប់ពីផ្លូវជាតិលេខ៤ ដល់ផ្លូវជាតិលេខ៣។ ផ្លូវបឹងធំ ជាផ្លូវដែលក្រវាត់ក្រុង ជាប់ខេត្តកណ្ដាល ខណ្ឌពោធិ៍សែនជ័យ និងខណ្ឌដង្កោ ដែលរងការខូចខាត ត្រូវបានបើកស្ថាបនាឡើងវិញ ដែលគ្រោងចាក់បេតុង កម្រាស់២តឹក ទទឹង៧ ម៉ែត្រ ដែលចំណាយថវិកា ៥ លានដុល្លា។ នេះបើតាមទីភ្នាក់ងារសារព័ត៌មានកម្ពុជា AKP។
អភិបាលរាជធានីភ្នំពេញ លោក ប៉ា សុជាតិវង្ស បានបញ្ជាក់ថា ក្រោយពីទទួលបានអនុសាសន៍ពីប្រមុខរាជរដ្ឋាភិបាលកម្ពុជា កាលពីសប្ដាហ៍មុនកន្លងទៅ រដ្ឋបាលរាជធានីភ្នំពេញ និងរដ្ឋបាលខេត្តកណ្ដាល បានឯកភាពគ្នា ចាប់ផ្ដើមបើកការដ្ឋានស្ថាបនាផ្លូវមួយខ្សែនេះ។
ផ្លូវ១ខ្សែនេះ មានឈ្មោះថា ផ្លូវប្រទះឡាង ជាផ្លូវយុទ្ធសាស្ត្ររវាងផ្លូវជាតិលេខ៣ និងផ្លូវជាតិលេខ៤ ដើម្បីតភ្ជាប់ចរាចរការដឹកជញ្ជូន និងការកាត់បន្ថយការកកស្ទះចរាចរណ៍។ ផ្លូវនេះរងការខូចខាត ស្ទើរទាំងស្រុង បើតាមការគ្រោងទុកនាពេលខាងមុខ កំណាត់ផ្លូវមួយនេះ នឹងត្រូវពង្រីកទទឹងរហូតដល់១២ ម៉ែត្រ ប៉ុន្តែដោយសារតែថវិកានៅមានកម្រិត អាជ្ញាធរសម្រេចស្ថាបនាតែទទឹង៧ម៉ែត្រសិន។
អភិបាលរាជធានីភ្នំពេញ បានបញ្ជាក់យ៉ាងដូច្នេះថា៖ «តាមការសិក្សារបស់អ្នកជំនាញ ផ្លូវនេះមិនមែនត្រឹមតែបម្រើ ផលប្រយោជន៍ដល់ប្រជាពលរដ្ឋដែលឆ្លងកាត់តំបន់នេះនោះទេ គឺអាចកាត់បន្ថយការការកកស្ទះចរាចរណ៍លើផ្លូវជាតិលេខ៤ និងលេខ៣ផងដែរ។ ជាពិសេសត្រង់ចំណុចប្រសព្វវង្វង់មូលចោមចៅ ដែលជាចំណុចតភ្ជាប់ ពីផ្លូវជាតិលេខ៤ ទៅលេខ៣ និងពីផ្លូវជាតិលេខ៣មកលេខ៤វិញ»។
លោក ប៉ា សុជាតិវង្ស រំពឹងថា ផ្លូវនេះ នឹងស្ថាបនាបញ្ចប់មុនពិធីបុណ្យចូលឆ្នាំខ្មែរ ព្រោះដោយសារដំណើរការដ្ឋានចំនូនពីរចាប់ផ្ដើមព្រមគ្នាក្នុងពេលតែមួយ គឺពីចំណុចផ្សារបែកចាន និងការដ្ឋានមូយទៀតចាប់ផ្ដើមពីចំណុចវត្តស្លែងឆ្ពោះមកប្រសព្វគ្នាតែម្ដង៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
