អន្តរជាតិ
រុស្ស៊ី-ជប៉ុន នឹងពង្រឹងចំណងសេដ្ឋកិច្ច តែមិនគ្រប់គ្រងដែនជម្លោះកោះគូរីលរួមគ្នាទេ
× រដ្ឋាភិបាលជប៉ុន កំពុងបញ្ចុះបញ្ចូលក្រុមហ៊ុននិងអ្នកវិនិយោគរបស់ខ្លួនឲ្យសហការជាមួយក្រុមហ៊ុនរុស្ស៊ីនិងដាក់ទុនវិនិយោគនៅរុស្ស៊ីផងដែរ ដើម្បីពង្រឹងកិច្ចសហប្រតិបត្តិការសេដ្ឋកិច្ចរួមគ្នា។ ជប៉ុនជឿថា ការរឹតបន្តឹងកិច្ចសហប្រតិបត្តិការសេដ្ឋកិច្ចនេះជួយ ត្រួសត្រាយផ្លូវសម្រាប់ការដោះស្រាយជម្លោះដែនកោះរួមគ្នា។ គេរំពឹងថា ក្នុងដំណើរទស្សនកិច្ចរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន ទៅកាន់ប្រទេសជប៉ុនពាក់កណ្តាលខែធ្នូខាងមុខ លោក និងមេដឹកនាំជប៉ុននឹងពិភាក្សាក៏ដូចជាកំណត់គម្រោងវិនិយោគនិងកិច្ចសហប្រតិបត្តិការរួមគ្នានេះចុងក្រោយជាផ្លូវការ។ ប៉ុន្តែ ការដោះស្រាយជម្លោះកោះស្ថិតនៅលើផ្លូវវែងឆ្ងាយ ហើយរុស្ស៊ីបានបញ្ជាក់ហើយ «ការដោះដូរ ឬទិញទឹកដី គ្មានឡើយរវាងជប៉ុននិងរុស្ស៊ី»។ ហើយការគ្រប់គ្រងកោះរួមគ្នាមិនមែនជាអ្វីដែលភាគីចង់ជ្រើសយកឡើយ។
រដ្ឋាភិបាលលោក ស៊ីនហ្សូ អាបេ កំពុងញាប់ដៃញាប់ជើងបញ្ចុះបញ្ចូលក្រុមហ៊ុនឯកជនជប៉ុនឲ្យចូលរួមក្នុងគម្រោងកិច្ចសហប្រតិបត្តិការសេដ្ឋកិច្ចនិងវិនិយោគជាមួយរុស្ស៊ី។ ការពន្លឿនគម្រោងនេះ ធ្វើឡើងមុនពេលលោក វ្ល៉ាឌីមៀ ពូទីន បំពេញទស្សនកិច្ចផ្លូវការនៅជប៉ុននៅថ្ងៃ ១៥ ខែធ្នូខាងមុខនេះ ហើយលោក ពូទីន និងលោក អាបេ ត្រូវសម្រេចជាផ្លូវការ។
យោងតាមទីភ្នាក់ងារព័ត៌មាន Reuters រដ្ឋបាភិបាលក្រុងតូក្យូ កំពុងប្រឹងប្រែងត្រួសត្រាយផ្លូវសម្រាប់ការរឹតបន្តឹងកិច្ចសហប្រតិបត្តិការសេដ្ឋកិច្ចជាមួយរុស្ស៊ីឲ្យកាន់តែស៊ីជម្រៅ និងស្អិតល្មួតក្នុងនាមជាអ្នកជិតខាង ហើយលោករំពឹងថា ទំនាក់ទំនងសេដ្ឋកិច្ចល្អរវាងភាគីទាំងពីរនឹងជួយដល់ការដោះស្រាយជម្លោះដែនកោះគូរីល (Kurils) ដែលជាឧបសគ្គធំរារាំងភាគីទាំងពីរមិនឲ្យចុះកិច្ចព្រមព្រៀងសន្តិភាពរួមគ្នាផងដែរ។
១.ទស្សនកិច្ចលោក ពូទីន ទៅជប៉ុនខែធ្នូ បើកទំព័រប្រវត្តិសាស្ត្រកិច្ចសហប្រតិបត្តិការសេដ្ឋកិច្ច
ដូចបានរៀបរាប់ខាងលើ លោក វ្ល៉ាឌីមៀ ពូទីន នឹងមានវត្តមាននៅជប៉ុននៅក្នុងខែធ្នូ ហើយលោកនឹងពិភាក្សាជាមួយមេដឹកនាំជប៉ុនលើបញ្ហាជាច្រើនជាពិសេស សម្រចគម្រោងវិនយោគរួមគ្នាតែម្តង។
ខាងជប៉ុន រដ្ឋាភិបាលលោក អាបេ បន្តបញ្ចុះបញ្ចូលក្រុមហ៊ុនជប៉ុនឲ្យចូលរួមជាមួយរុស្ស៊ី ប៉ុន្តែជាធម្មតាវាជាជម្រើសពីព្រោះរាល់គម្រោងវិនិយោគ និងកិច្ចសហប្រតិបត្តិការសេដ្ឋកិច្ចរួមគ្នាត្រូវដឹកនាំដោយក្រុមហ៊ុនឯកជន។ បើតាមទីភ្នាក់ងារព័ត៌មាន Reuters រដ្ឋាភិបាលកំពុងជ្រើសរើសក្រុមហ៊ុនដែលពេញចិត្តដាក់ទុនវិនិយោគនៅរុស្ស៊ី និងចាប់ដៃ ក្រុមហ៊ុនរុស្ស៊ី។
យ៉ាងណាមិញ ក្រុមហ៊ុនជប៉ុនមួយចំនួននៅបារម្ភខ្លាំងពីបរិស្ថានក្នុងការធ្វើជំនួញនៅរុស្ស៊ី ជាពិសេសហានិភ័យនិងផលចំណេញដែលគេអាចទទួលបានពេលដាក់ទុនរកស៊ីជាមួយរុស្ស៊ី។ជាធម្មតា បើសិនជាវាមិនចំណេញ ទោះរដ្ឋាភិបាលដាក់សម្ពាធ ឬបញ្ចុះបញ្ចូលយ៉ាងណា ក៏អ្នកវិនិយោគទាំងនោះមិនព្រមទៅវិនិយោគទេ។
មកទល់ពេលនេះគេមិនទាន់អាចប្រកាសបាននៅឡើយទេថា គម្រោងណាខ្លះនឹងត្រូវអនុវត្ត ឬមិនអាចអនុវត្តបាន ព្រោះភាគីនៅបន្តពិភាក្សានិងសិក្សានៅឡើយ។ ប៉ុន្តែថ្ងៃ ១៥ ធ្នូ គេនឹងអាចឃើញលទ្ធផលជាផ្លូវការហើយ។
តាមពិតទៅ គម្រោងវិនិយោគរួមគ្នានេះផ្តោសំខាន់ លើកកិច្ចសហប្រតិបត្តិការលើវិស័យចំនួន៨ ក្នុងនោះមានវិស័យថាមពល, បច្ចេកវិទ្យា, ការអភិវឌ្ឍឧស្សាហកម្ម, ជំរុញការនាំចេញទំនិញពីតំបន់ចុងបូព៌ា, និងលើកស្ទួយទំនាក់ទំនាក់និងការប្រាស្រ័យទាក់ទងរវាងប្រជាជននិងប្រជាជន។ វិស័យចំនួន៨នេះ ត្រូវបានស្នើឡើងពីដងមកហើយដោយលោក អាបេ។ លើកទីមួយ ក្នុងជំនួបទ្វេភាគីជាផ្លូវការ លោក អាបេនិងលោក ពូទីន នៅទីក្រុង Vladivostok នាខែកញ្ញា និងលើទីពីរលោកស្នើឡើងពេលជជែកជាមួយប្រមុខរដ្ឋរុស្ស៊ីនៅទីក្រុង Sochi នៅខែឧសភា។
សូមបញ្ជាក់បន្តិចដែរថា ដើម្បីរឹតបន្តឹងកិច្ចសហប្រតិបត្តិការសេដ្ឋកិច្ចឲ្យកាន់តែមានប្រសិទ្ធភាព នាយករដ្ឋមន្ត្រីជប៉ុនលោក អាបេ បានសម្រេចតែងតាំងរដ្ឋមន្ត្រីសេដ្ឋកិច្ច ពាណិជ្ជកម្មនិងឧស្សាហកម្មលោក Hiroshige Seko ជាអ្នកទទួលបន្ទុកសម្របសម្រួលកិច្ចសហប្រតិបត្តិការសេដ្ឋកិច្ចជាមួយរុស្ស៊ី។ ដែលវាបានន័យថាមន្ត្រីជាន់ខ្ពស់ម្នាក់នេះនឹងមានតួនាទីសំខាន់ក្នុងការផ្សាភ្ជាប់ទំនាក់ទំនងនិងកិច្ចសហប្រតិបត្តិការរវាងជប៉ុននិងរុស្ស៊ីក្នុងវិស័យជាច្រើនដែរ។
២. រុស្ស៊ីមិនដោះដូរឬលក់ដីជាមួយជប៉ុនឡើយ
អាចថា ការពង្រឹងកិច្ចសហប្រតិបត្តិការសេដ្ឋកិច្ចនិងពាណិជ្ជពិតជាសំខាន់និងជួយត្រួសត្រាយផ្លូវសម្រាប់ភាគីទាំងពីរដោះស្រាយជម្លោះកោះគូរីល ដែលរារាំងភាគីទាំងពីរមិនឲ្យចុះកិច្ចព្រមព្រៀងសន្តិភាពជាមួយគ្នាជាង ៧ទសវត្សរ៍មកនោះ។ ប៉ុន្តែបើជប៉ុនយកប្រយោជន៍សេដ្ឋកិច្ច ដើម្បី ចរចាទិញ ឬជួញដូរទឹកដីពីរុស្ស៊ីនោះ កុំសង្ឃឹមថាអាចធ្វើបានឲ្យសោះ។
ក្នុងបទសម្ភាសន៍ជាមួយសារព័ត៌មាន Bloomberg នៅថ្ងៃទី ១ កញ្ញាកន្លងទៅ ប្រមុខរដ្ឋរុស្ស៊ីរូបនេះបញ្ជាក់ច្បាស់ គ្មានហេតុផលណាដែលរុស្ស៊ីត្រូវជួញដូរកោះជម្លោះ គូរីល (Kurils) ជាមួយជប៉ុនដើម្បីជាថ្នូរនឹងការបង្កើតកិច្ចព្រមព្រៀងសន្តិភាពនិងដើម្បីកិច្ចសហប្រតិបត្តិការសេដ្ឋកិច្ចទេ។
លោកបន្តពន្យល់ថា៖« យើងមិនមែនកំពុងនិយាយពីការលក់ឬប្តូរទឹកដីជម្លោះឡើយ។ តែយើងកំពុងនិយាយពីការស្វែងរកដំណោះស្រាយដែលភាគីទទួលយកបានដោយគ្មានអ្នកចាញ់និងអ្នកឈ្នះ»។
យ៉ាងណាមិញមេដឹកនាំរុស្ស៊ីម្នាក់នេះក៏យល់ឃើញថា ការសម្រេចបាននូវកិច្ចព្រមព្រៀងសន្តិភាពរវាងមិត្តជិតខាងទាំងពីរជារឿងសំខាន់។ ប៉ុន្តែដូចបានលើកឡើងខាងដើមស្រាប់រុស្ស៊ីមិនដោះដូរ ឬលក់ទឹកដីខ្លួនកាន់កាប់ដែលជាលទ្ធផលក្រោយសង្គ្រាមលោកលើកទីពីរនេះឡើយ។ ហើយម្យ៉ាង រឿងកិច្ចព្រមព្រៀងសន្តិភាព ជប៉ុនខ្លួនឯងទេជាបដិសេធអនុវត្ត។
សូមរម្លឹកបន្តិចដែរថា ក្រោយចប់សង្គ្រាមលោកលើកទី២ ពេលជប៉ុនចាញ់សង្គ្រាម នៅឆ្នាំ ១៩៤៩ រុស្ស៊ីបានដណ្តើមយកកោះដែលជប៉ុនកាន់កាប់ ដែលនេះជាសម្អាងមួយថាខ្លួនបានកាប់កាន់ជាក់ស្តែង។ តែ២ឆ្នាំក្រោយមក កិច្ចព្រមព្រៀងសន្តិភាព San Francisco ត្រូវបានគេបង្កើតឡើង ហើយវាត្រូវបានចុះហត្ថលេខាដោយមេដឹកនាំជប៉ុន និងបណ្តាប្រទេសសម្ព័ន្ធមិត្ត ដោយជប៉ុនសម្រេចបោះបង់សិទ្ធិទាមទារកាន់កាប់លើកោះ គូរីល ។ តែយ៉ាងណាសូវៀតមិនបានចូលរួមក្នុងការចុះហត្ថលេខាលើកិច្ចព្រមព្រៀងនេះឡើយ។ ដូច្នេះហើយទើបជប៉ុននៅរក្សាអះអាងថាកោះទាំងបួននៅតែស្ថិតក្នុងអធិបតេយ្យភាពរបស់ខ្លួនដដែល។
ក្រោយមកនៅក្នុងឆ្នាំ១៩៥៦ សូវៀត និងជប៉ុនបានចេញសេចក្តីថ្លែងការណ៍រួមមួយដើម្បីស្តារឡើងវិញទំនាក់ទំនងឡើងវិញ ដោយសូវៀតយល់ព្រមបោះបង់កោះពីរ គឺកោះ Shikotan និងកោះ Habomai ទៅអោយជប៉ុនបន្ទាប់ពីមានការចុះហត្ថលេខាលើសន្ធិសញ្ញាមួយជាផ្លូវការរួមគ្នា។ តែយ៉ាងណា ក្រោយមរដ្ឋាភិបាលជប៉ុន នៅតែរក្សាសិទ្ធិទាមទារកោះទាំងបួន ហើយជាលទ្ធផលគ្មានសន្ធិសញ្ញាសន្តិភាពណាមួយត្រូវបានចុះដោយភាគីទាំងពីរឡើយចាប់តាំងពីពេលនោះមក។ មកទល់ពេលនេះ ជប៉ុនអះអាងថា បើយោងតាមច្បាប់អន្តរជាតិ កោះទាំងបួនដែលស្ថិតនៅភាគខាងត្បូងរបស់ប្រជុំកោះគូរីល គឺជាកោះដែលស្ថិតក្នុងដែនអធិបតេយ្យភាពជប៉ុន។ ហើយដោយសារតែសម្បូរដោយធនធានធម្មជាតិមានប្រេង ឧស្ម័ន និងធនធានសមុទ្រផ្សេងទៀតផង ទើបបានជាគូភាគីបន្តទាមទារយករៀងៗខ្លួន។ ប៉ុន្តែរុស្ស៊ីចាប់ផ្តើមពង្រឹងទំនើបកម្មយោធានៅលើកោះដើម្បីពង្រឹងសិទ្ធិកាន់កាប់របស់ខ្លួនផងដែរក្នុងរយៈពេលប៉ុន្មានឆ្នាំចុងក្រោយ។
៣.ការគ្រប់គ្រងកោះជម្លោះរួមគ្នាជារឿងមិនអាចទៅរួច?
កន្លងមកសារព័ត៌មាន Nikkeiរបស់ជប៉ុន បានផ្សាយថា ជប៉ុន និងរុស្ស៊ីអាចនឹងចាប់ផ្តើមកំណត់គម្រោងមួយដើម្បីបង្កើតតំបន់គ្រប់គ្រងរដ្ឋបាលរួមគ្នានៅលើកោះជម្លោះ។ សារព័ត៌មាននេះបានបញ្ជាក់ថា គម្រោងនេះត្រូវបាននាយករដ្ឋមន្ត្រីជប៉ុនលោក ស៊ីនហ្សូ អាបេ ស្នើឡើងក្នុងពេលលោកជួបជាមួយលោក វ្ល៉ាឌីមៀ ពូទីន នៅក្រុង Sochi កាលពីខែឧសភាកន្លងមក។
ប៉ុន្តែរបាយការណ៍នេះត្រូវបានរដ្ឋាភិបាលជប៉ុនទាត់ចោល។ ក្រសួងការបរទេសជប៉ុនអះអាងថា គ្មានឡើយការជជែកពិភាក្សាគ្នាស្តីពីការកំណត់រដ្ឋបាលគ្រប់គ្រងរួមគ្នាលើកោះជម្លោះគូរីល (Kuril)។ ក្រសួងនេះបានបញ្ជាក់ឡើងវិញផងដែរថា ជប៉ុនមិនផ្លាស់ប្តូរជំហររបស់ខ្លួនឡើយក្នុងការដោះស្រាយជម្លោះជាមួយរដ្ឋាភិបាលរុស្ស៊ី។ ជប៉ុនចង់សម្រេចឲ្យបាននូវកិច្ចព្រមព្រៀងសន្តិភាពមួយ ដោយកំណត់សិទ្ធិកាន់កាប់កោះទាំងបួននៅប្រជុំកោះគូរីលនេះឲ្យបានជាក់លាក់តែម្តង។ នេះមាន័យថា ភាគីទាំងពីរត្រូវស្វែងរកដំណោះស្រាយមួយតាមរយៈការចរចា ដើម្បីកំណត់ឲ្យច្បាស់ថា តើកោះណាជារបស់រុស្ស៊ី ហើយកោះណាជារបស់ជប៉ុននោះ។ ដូច្នេះការកាន់កាប់រួមគ្នា និងអភិវឌ្ឍកោះជម្លោះរួមគ្នា មិនមែនជាអ្វីដែលជប៉ុនចង់បានឡើយ។
៤. ជប៉ុនហាមអាមេរិកឈរជើងនៅកោះជម្លោះ បើសិនរុស្ស៊ីចែកកោះខ្លះដល់ខ្លួន
ខណៈការចរចានៅបន្តទៅមុខ ហើយដំណោះស្រាយជាក់លាក់មិនទាន់ត្រូវបានភាគីកំណត់នោះ របាយការណ៍ខ្លះអះអាងថា ជប៉ុនអាចសន្យាហាមទ័ពអាមេរិកឈរជើងនៅលើកោះជម្លោះគូរីល បើសិនជារុស្ស៊ីព្រមប្រគល់កោះខ្លះឲ្យខ្លួន។ ជប៉ុនជឿជាក់ថា ការសន្យាបែបនេះ នឹងជំរុញឲ្យរុស្ស៊ីព្រមប្រគល់កោះខ្លះឲ្យខ្លួនផងដែរ។
ដូចបានបញ្ជាក់ខាងលើ សេចក្តីថ្លែងការណ៍រួមមួយ ឆ្នាំ១៩៥៦ រវាងសូវៀតនិងជប៉ុន កំណត់ប្រគល់កោះពីរ គឺកោះ Shikotan និងកោះ Habomai ទៅអោយជប៉ុន។ ដូច្នេះ វាជាការពិតដែល រុស្ស៊ីអាចពិចារណាអនុវត្តតាមសេចក្តីថ្លែងការណ៍នេះ បើសិនជាការចរចាត្រូវរ៉ូវគ្នានោះ។
ប្រភពការទូតមួយប្រាប់ទីភ្នាក់ងារព័ត៌មានជប៉ុន Kyodo ថា រុស្ស៊ីប្រហែលបារម្ភខ្លាំងថា យោធាអាមេរិកអាចនឹងត្រូវបញ្ជូនទៅឈរជើងនៅលើកោះជម្លោះ បើសិនជាជប៉ុនបានទទួលកោះនេះ ព្រោះថាអនុលោមតាមសន្ធិសញ្ញាសន្តិសុខរួមរវាងជប៉ុនិងអាមេរិក អនុញ្ញាតឲ្យអាមេរិកដាក់ទ័ពនៅទីកន្លែងណាក៏បានទូទាំងប្រទេសជប៉ុន។
ប្រភពដដែលបានបន្តថា រដ្ឋាភិបាលជប៉ុនកំពុងសិក្សាពីគម្រោងកែប្រែបទបញ្ញត្តិដែលមានចែងក្នុងសន្ធិសញ្ញាដើម្បីបញ្ចៀសការតាំងទ័ពនៅកោះគូរីល ក្នុងករណីដែលរុស្ស៊ីព្រមប្រគល់កោះឲ្យខ្លួននោះ។
ប៉ុន្តែមកដល់ថ្ងៃ ៣១ ខែតុលានេះ សារព័ត៌មានរុស្ស៊ី Sputnik បានចុះផ្សាយថា រដ្ឋាភិបាលជប៉ុនបដិសេធព័ត៌មានដែលថា ខ្លួនសិក្សាពីគម្រោងហាមឃាត់ទាហានអាមេរិកចូលឈរជើងនៅលើកោះជម្លោះគូរីលនោះ៕
Tag:
ស៊ីហ្សូ អាបេ
វ្ល៉ាឌីមៀ ពូទីន
Kuril
© រក្សាសិទ្ធិដោយ thmeythmey.com