សាតា ម៉ូរ៉ាត ចង់ប្រើជំនាញរៀននៅតួកគីជួយអភិវឌ្ឍន៍វិស័យសុខាភិបាលនៅកម្ពុជា

បទយកការណ៍ / បទសម្ភាសន៍

សាតា ម៉ូរ៉ាត ចង់ប្រើជំនាញរៀននៅតួកគីជួយអភិវឌ្ឍន៍វិស័យសុខាភិបាលនៅកម្ពុជា

05, Nov 2016 , 10:19 pm

រូបភាព

ដោយ: អុីសា រ៉ហានី (Isa Rohany)

សាតា ម៉ូរ៉ាត គឺជានិស្សិតខ្មែរដ៏កម្រម្នាក់ ដែលទទួលបានអាហារូបករណ៍ទៅសិក្សានៅប្រទេសតួកគី នៅប៉ែកអឺរ៉ុប។ ម៉ូរ៉ាត គឺជាខ្មែរឥស្លាមម្នាក់ ដែលបានចូលរៀននៅសាលាដែលតឹងរឹង និងមិនងាយមានសិស្សនិស្សិតណាប្រឡងជាប់ឡើយ។ ជាសិស្សពូកែមួយរូប ម៉ូរ៉ាត កំពុងសិក្សាលើជំនាញសុខភាពសាធារណ ហើយគេមានក្តីស្រម៉ៃថា ក្រោយបញ្ចប់ការសិក្សានៅតួកគី គេនឹងបានរួមចំណែកអភិវឌ្ឍន៍វិស័យសុខាភិបាលកម្ពុជា ដែលត្រូវគេមើលឃើញថា នៅមានភាពទន់ខ្សោយនៅឡើយ។

នៅឆ្នាំ២០១៤ សាតា ម៉ូរ៉ាត ទទួលបានដំណឹងល្អ ដោយគេបានប្រឡងជាប់អាហារូបករណ៍ពីរាជរដ្ឋាភិបាលប្រទេសតួកគី។ ភ្លាមៗ ម៉ូរ៉ាត បានចាកចេញទៅទីក្រុង Ankara ដើម្បីសិក្សាលើជំនាញ សុខភាពសាធារណ ដែលគេបានជ្រើសរើស និងជាជំនាញមួយពិបាក។

មុនពេលជាប់អាហារូបករណ៍ពីរដ្ឋាភិបាលតួកគី ម៉ូរ៉ាត បានរម្លឹកថា គេត្រូវផ្ញើសញ្ញាបត្រ និងព្រឹត្តិប័ត្រពិន្ទុទៅឲ្យខាងសាលាដែលគេស្នើអាហារូបករណ៍មើល ក្រោយមកទើបខាងសាលាជ្រើសរើស និងជួបសម្ភាស។ ម៉ូរ៉ាត បានចូលសម្ភាសនៅសណ្ឋាគារ ឡឺ រ៉ូយ៉ាល់ ដែលកាលនោះ តួកគី មិនទាន់មានស្ថានទូតប្រចាំនៅកម្ពុជាឡើយ។ មានសិស្សនិស្សិតកម្ពុជារាប់រយនាក់ដែលបានដាក់ពាក្យសុំអាហារូបករណ៍ ហើយចុងក្រោយមាននិស្សិតខ្មែរតែ១០នាក់ប៉ុណ្ណោះ ដែលបានប្រឡងជាប់ និងត្រូវឡើងទៅយកវីសានៅស្ថានទូតតួកគី ប្រចាំប្រទេសថៃ។

សម្បុរស្រអែម ភ្នែកតឹងៗដូចកូនចៅចិន មិនសមជាកូនកសិករអ្នកស្រុកកណ្តៀង ខេត្តពោធិ៍សាត់ នៅឆ្នាំនេះ ម៉ូរ៉ាត រៀនឆ្នាំទី៣ នៃសាកលវិទ្យាល័យ Hacettepe ក្នុងទីក្រុង Ankara ប្រទេសតួកគី។ ម៉ូរ៉ាត ពន្យល់ពីការរៀនជំនាញសុខភាពសាធារណថា៖« ការងារនេះ ត្រូវដើរទន្ទឹមនឹងគ្រូពេទ្យដែរ តែគ្រូពេទ្យ ពេលមានមនុស្សឈឺទើបព្យាបាល តែជំនាញដូចខ្ញុំ គឺរិះរកធ្វើយ៉ាងណា ទប់ស្កាត់កុំឲ្យមានជំងឺកើតឡើង»។

ពេលទៅដល់ប្រទេសតួកគីភ្លាម ខាងសាលាតម្រូវឲ្យនិស្សិតបរទេសទាំងអស់ រៀនភាសាតួកគីមួយឆ្នាំសិន ដើម្បីទទួលបានសញ្ញាបត្រកម្រិតមួយ ផ្នែកភាសាជាតិ។ ទោះជាជំនាញដែលត្រូវជ្រើសរើស ត្រូវរៀនជាភាសាតួកគី ឫភាសាអង់គ្លេសក៏ដោយចុះ និស្សិតបរទេសទាំងអស់ ត្រូវរៀនភាសាតួកគី ទើបអាចចូលរៀនថ្នាក់បរិញ្ញាបត្រនៅទីនោះបាន។ «ភាសាតួកគី ជាភាសាមួយពិបាក អ្នកណាៗក៏ទទួលស្គាល់ថាវាពិបាកមែន គឺវេយ្យាករណ៍ខុសឆ្ងាយពីភាសាអង់គ្លេស និងភាសាខ្មែរ»។ នេះបើតាមការបញ្ជាក់របស់ ម៉ូរ៉ាត ដែលអះអាងថា គេអាចប្រើប្រាស់ភាសាតួកគី បានកម្រិតមួយ សម្រាប់ប្រាស្រ័យទាក់ទងមិត្តភក្តិក្នុងថ្នាក់។

នៅឆ្នាំនេះ ម៉ូរ៉ាត មានអាយុ២០ឆ្នាំហើយ។ ជាកូនទី៣ ក្នុងគ្រួសារកសិករមួយ ដែលមានស្រុកកំណើតនៅភូមិស្ថានីយ៍ ឃុំកណ្តៀង ស្រុកកណ្តៀង ខេត្តពោធិ៍សាត់ ដែលមានបងប្អូន៤នាក់ ម៉ូរ៉ាត បានប្រឡងជាប់សញ្ញាបត្រទុតិយភូមិ ឫបាក់ឌុប នៅឆ្នាំ២០១៣។ ជាសិស្សពូកែជាប់និទ្ទេសB ម៉ូរ៉ាត បានបោះបង់អាហារូបករណ៍១០០%នៅសាលាភូមិន្ទកសិកម្មចំការដូង ហើយសម្រេចចិត្តចូលរៀនជំនាញសំណង់ស៊ីវិល ក្រោយប្រឡងជាប់នៅសាលាតិចណូ។ យ៉ាងណា នៅសាលាតិចណូ ម៉ូរ៉ាត រៀនបានត្រឹមមួយឆ្នាំ ហើយបោះបង់ឳកាសជាលើកទី២នៅសាលាក្នុងស្រុក និងសម្រេចតោងយកអាហារូករណ៍ក្រៅប្រទេស។

អតីតសិស្សវិទ្យាល័យ ហ៊ុន សែន កណ្តៀង បានរៀបរាប់ពីផលលំបាកខ្លះៗ ពេលទៅដល់តួកគីដំបូង។ ទីមួយទាក់ទងនឹងរបបអាហារ និងទីពីរ បញ្ហាអាកាសធាតុ។ អាហារនៅប៉ែកអឺរ៉ុប មិនសូវប្រើគ្រឿងច្រើនដូចប៉ែកអាស៊ីនោះទេ ទើបធ្វើឲ្យ ម៉ូរ៉ាត មិនសូវទម្លាប់ ចំណែកអាកាសធាតុនៅទីក្រុង Ankara មានភាពត្រជាក់ខ្លាំង ពិសេសពេលព្រឹកព្រលឹម ដែល ម៉ូរ៉ាតត្រូវក្រោកដើម្បីចេញទៅសាលា។ ក្រៅពីនេះ ម៉ូរ៉ាត ត្រូវចំណាយពេលជិះរទេះភ្លើងក្រោមដីប្រហែល១ម៉ោងទើបដល់សាលា ដែលគេច្រើនសង់នៅតំបន់ភ្នំ។

នៅក្នុងសាកលវិទ្យាល័យដែល ម៉ូរ៉ាតកំពុងសិក្សា គឺមាននិស្សិតបរទេស៤នាក់ប៉ុណ្ណោះ ក្នុងនោះមានមកពីអាហ្វ្រិក អាស៊ីកណ្តាល និងកម្ពុជា។ រដ្ឋាភិបាលតួកគី បានផ្តល់របបអាហារសម្រាប់សិស្សអាហារូបករណ៍បានយ៉ាងល្អ ក្នុងនោះក្រៅពីកន្លែងស្នាក់នៅ ក្នុងមួយខែម៉ូរ៉ាត ទទួលបានថវិកាឧបត្ថម្ភចំនួន ២៥០ដុល្លារ ធានារ៉ាប់រងសុខភាព។ល។ ពីរដ្ឋាភិបាលតួកគីផងដែរ។

ដោយសារជាប្រធាននិស្សិតកម្ពុជាប្រចាំប្រទេសតួកគី ម៉ូរ៉ាត បានដឹងយ៉ាងច្បាស់ពីតួលេខនិស្សិតខ្មែរដែលកំពុងសិក្សានៅទីនោះ។ គិតក្នុងឆ្នាំ២០១៦នេះ មាននិស្សិតខ្មែរចំនួន ១១៥នាក់ (មិនទាន់គិតចំនួនសិស្សថ្មី) ដែលកំពុងរៀនជំនាញផ្សេងៗនៅតួកគី ក្នុងនោះមានទាំងសិក្សាផ្នែកសាសនា (ច្បាប់សាសនាឥស្លាម) និងសិក្សាសង្គមផ្សេងៗ។

ម៉ូរ៉ាត បានបង្ហើបពីមហ្ឆិតា ដែលបានលាក់ក្នុងខ្លួនជាយូរមកហើយ នោះគឺគេចង់ក្លាយជាបុគ្គលម្នាក់ ដែលអាចជួយសង្គមបាន តាមជំនាញដែលគេបានរៀន។ ម៉ូរ៉ាត ចង់បម្រើការងារក្នុងក្រសួងសុខាភិបាល ដើម្បីជួយឲ្យវិស័យនេះមានការរីកចម្រើនដូចទៅនឹងបណ្តាប្រទេសអភិវឌ្ឍន៍ផ្សេងដែរ និងមិនចង់ឮពីកង្វះខាតលើសេវានេះបន្តទៀតឡើយ។ ម៉ូរ៉ាត ក៏មានបំណងចង់ផ្សារភ្ជាប់ការងាររបស់ខ្លួនទៅនឹងអង្គការសង្គមស៊ីវិលមួយចំនួន ដើម្បីភាពរីកចម្រើនដល់វិស័យសុខាភិបាលនេះដែរ៕