អន្តរជាតិ
ឈានទៅឈ្នះឆ្នោត លោស្រី ហ៊ីឡារី ពឹងលើប្រជាប្រិយភាពលោក បារ៉ាក់ អូបាម៉ា?
× ប្រជាប្រិយភាពប្រធានាធិបតីជិតផុតអាណត្តិលោក បារ៉ាក អូបាម៉ា ស្ថិតនៅកម្រិតខ្ពស់បំផុតមិនធ្លាប់មាន ក្នុងចំណោមប្រធានាធិបតីដែលកាន់តំណែងពីរអាណត្តិពោលគឺខ្ពស់ជាងប្រធានាធិ បតី រ៉ូណាល់ រីហ្កែន (Ronald Reagan) កាលឆ្នាំ ១៩៨៨ ទៅទៀត។ ប្រជាប្រិយភាពខ្ពស់នេះឥទ្ធិពលខ្លាំងលើ អ្នកបោះឆ្នោត ហើយលោក អូបាម៉ា បន្តយុទ្ធនាការជួយឃោសនាលោកស្រី ហ៊ីឡារី គ្លីនតុន យ៉ាងសស្រាក់សស្រាំ ខណៈនៅប៉ុន្មានម៉ោងទៀតការបោះឆ្នោតនឹងមកដល់។
សូមស្ដាប់ព័ត៌មានលម្អិត៖
របាយការណ៍ស្ទង់មតិ Gallup Survey បង្ហាញ ប្រជាប្រិយភាពរបស់លោក បារ៉ាក់ អូបាម៉ា ក្នុងអាណត្តិទី២ កើនឡើងខ្លាំងគួរឲ្យកត់សម្គាល់ក្នុងរដូវកាលឃោសនាបោះឆ្នោត នេះ។ ប្រជាប្រិយភាពលោក កើនឡើងរហូតដល់ ៥៦ ភាគរយ ឯណោះគិតត្រឹមថ្ងៃចន្ទមុនការបោះឆ្នោតប្រធានាធិបតីអាមេរិកមកដល់ មួយថ្ងៃនោះ។ គេវាយតម្លៃថា លោក អូបាម៉ា ក៏មាន ឥទ្ធិពលកាន់តែខ្លាំងលើការសម្រេចចិត្តរបស់ប្រជាជនអាមេរិក ក្នុងការជ្រើសរើសមេដឹកនាំថ្មីដែលនឹងត្រូវបន្តតំណែងលោកនោះ។ មកដល់ថ្ងៃចន្ទទី ៧ ខែវិច្ឆិកា លោក អូបាម៉ា នៅបន្តឃោសនាឲ្យលោកស្រី ហ៊ីឡារី គ្លីនតុន យ៉ាងសស្រាក់សស្រាំ ជាទីបំផុត ហើយលោកបន្តបញ្ចុះបញ្ចូលឲ្យរាល់អ្នកបោះឆ្នោតអាមេរិកដែលស្រឡាញ់ និងជឿជាក់លើលោក ទៅបោះឆ្នោតរើសលោកស្រី ហ៊ីឡារី គ្លីនតុនជាប្រធានាធិបតីផងដែរ។
១. ប្រជាប្រិយភាពលោក អូបាម៉ា ខ្ពស់ជាងប្រជាប្រិយភាពលោក រូណាល់ រីហ្កែន?
យោងតាមសារព័ត៌មាន Telegraph ប្រជាប្រិយភាព លោក បារ៉ាក់ អូបាម៉ា កើនឡើងដល់កម្រិតខ្ពស់បំផុតមិនធ្លាប់មានក្នុងចំណោមប្រធានាធិបតីអាមេរិកដែលកាន់តំណែងពីរអាណត្តិ។ បើផ្អែកតាមទិន្នន័យនេះ លោក បារ៉ាក់ អូបាម៉ា មានប្រជាប្រិយភាពខ្ពស់ជាងប្រជាប្រិយភាពរបស់ប្រធានាធិបតី រ៉ូណាល់ រីហ្កែន កាលពីឆ្នាំ ១៩៨៨ នោះ។
ស្ថិតនៅកម្រិត ៥៦ ភាគរយ ប្រជាប្រិយភាពលោក អូបាម៉ា កើនឡើងរហូតដល់ ១២ ភាគរយឯណោះចាប់តាំងពីខែមិថុនា ពោលគឺនៅពេលដែលយុទ្ធនាការឃោសនាបោះឆ្នោតប្រធានាធិបតីអាមេរិកចាប់ផ្តើមដំបូងនោះ។
ប៉ុន្តែ ទោះជាយ៉ាងណាក៏ដោយ អ្វីដែលគួរឲ្យកត់សម្គាល់នោះ ប្រជាប្រិយភាពលោក អូបាម៉ា នាពេលបច្ចុប្បន្ននៅតែទាបជាងកាលពីឆ្នាំ ២០០៩ នៅពេលដែលលោកឡើងកាន់អំណាចក្នុងអាណត្តិទី ១ ព្រោះប្រជាប្រិយភាពលោកកាលនោះមិនទាបជាង ៦០ភាគរយឡើយ។
ប៉ុន្តែគេនៅតែមើលឃើញថា វាជារឿងកម្រ ព្រោះជារួមឲ្យតែប្រធានាធិបតីដែលកាន់តំណែងពីរអាណត្តិ ប្រជាប្រិយភាពពួកគេច្រើនតែធ្លាក់ចុះខ្លាំងនៅអាណត្តិចុងក្រោយ។
២.លោក អូបាម៉ា យកប្រជាប្រិយភាពមកជួយឃោសនាលោកស្រី ហ៊ីឡារី ទឹកបង្ហើយ
ឧទាហរណ៍ បើលោក អូបាម៉ា អាចឈរឈ្មោះបានម្តងទៀត លោក ដូណាល់ ត្រាំ ប្រហែលជាត្រូវចាញ់ឆ្នោតតាំងពីមុនប្រកួតក៏ថាបាន។ តែសម្រាប់លោកស្រី ហ៊ីឡារី គ្លីនតុន វាជារឿងផ្សេងទៀត។ ប៉ុន្តែប្រជាប្រិយភាពខ្ពស់របស់លោក អូបាម៉ា នេះបានហុចផលដល់លោកស្រី ហ៊ីឡារី គ្លីនតុន ដែលជាបេក្ខជនរួបរឹតដោយរឿងអាស្រូវនេះដែរ។
ខណៈនៅសល់ប៉ុន្មានម៉ោងទៀត ការបោះឆ្នោតចូលមកដល់ លោក បារ៉ាក់ អូបាម៉ា បន្តខ្នះខ្នែងជួយឃោសនាឲ្យលោកស្រី ហ៊ីឡារី គ្លីនតុន មិនឈប់ឈរ។ លោករំពឹងថា ប្រជាជនអាមេរិកដែលស្រឡាញ់ និងជឿជាក់លើលោកនាំគ្នាបោះឆ្នោតឲ្យលោកស្រី ហ៊ីឡារី គ្លីនតុនដែរ។
ក្នុងការឃោសនានៅ Michigan លោក បារ៉ាក់ អូបាម៉ា បានស្នើឲ្យអ្នកបោះឆ្នោតទាំងអស់ជួយធ្វើរឿងមួយសម្រាប់លោកគឺបោះឆ្នោតជូនអតីតរដ្ឋមន្ត្រីការបរទេសលោកស្រី ហ៊ីឡារី គ្លីនតុននៅថ្ងៃអង្គារ។
លោកថា៖ «ខ្ញុំសូមឲ្យអ្នកបោះឆ្នោតឲ្យលោកស្រី ហ៊ីឡារី គ្លីនតុន ដូចពេលអ្នកបោះឆ្នោតឲ្យខ្ញុំនោះ។ អ្នកមានឱកាសទាត់ចោលនយោបាយបំបែកបាក់, រើសអើងនិងនាំយើងត្រឡប់ក្រោយ។ ហើយក៏មានឱកាសរើសប្រធានាធិបតីស្ត្រីដំបូងបំផុតរបស់សហរដ្ឋអាមេរិកដែរ»។
ពេលទៅដល់រដ្ឋ New Hampshire លោក អូបាម៉ា ក៏បានបន្តអំពាវនាវឲ្យប្រជាជនបោះឆ្នោតគាំទ្រលោកស្រី ហ៊ីឡារី គ្លីនតុនដែរ។ លោកបញ្ជាក់ថា ទោះបីជាលោកមិនស្ថិតនៅលើសន្លឹកឆ្នោតក៏ដោយ សមិទ្ធផលដែលលោកសម្រេចបានក្នុងរយៈពេល ៨ ឆ្នាំនិងមរតកនយោបាយផ្សេងទៀតនោះ សុទ្ធតែស្ថិតនៅលើសន្លឹកឆ្នោតទាំងអស់៕
© រក្សាសិទ្ធិដោយ thmeythmey.com