អូបាម៉ា និងត្រាំអង្គុយពិភាក្សាគ្នារឿង«ផ្ទេរអំណាច» បន្ទាប់ពីលាបពណ៌គ្នាពេលឃោសនា

អន្តរជាតិ

នយោបាយអន្តរជាតិ

អូបាម៉ា និងត្រាំអង្គុយពិភាក្សាគ្នារឿង«ផ្ទេរអំណាច» បន្ទាប់ពីលាបពណ៌គ្នាពេលឃោសនា

11, Nov 2016 , 11:24 am

រូបភាព

រូបភាព៖ The Star

ដោយ: សៅ ផលនិស្ស័យ (Sao Phal Niseiy)

ថ្ងៃព្រហស្បតិ៍ទី ១០ វិច្ឆិកា ប្រធានាធិបតីជិតផុតអាណត្តិ លោក បារ៉ាក់ អូបាម៉ា ជួបជាមួយប្រធានាធិបតិទើបជាប់ឆ្នោត ដូណាល់ ត្រាំ ដោយផ្ទាល់ដើម្បីជជែកពីការផ្ទេរអំណាចដោយសន្តិវិធី។ ក្រៅរឿងផ្ទេរអំណាច ប្រធានបទជាច្រើនមានទាំងគោលនយោបាយក្នុងស្រុកនិងនយោបាយក្រៅប្រទេសនោះត្រូវបានលើកយកមកពិភាក្សាក្នុងការិយាល័យពងក្រពើ (Oval Office) ផងដែរ។មន្ត្រីសេតវិមាន អះអាងថា ជំនួបទ្វេភាគីលើកដំបូងរវាងមេដឹកនាំទាំងពីរនេះធ្វើឡើងយ៉ាងល្អ និងរលូនបំផុត។

«លោក ដូណាល់ ត្រាំ មិនស័ក្តិសមកាន់តំណែងប្រធានាធិបតីទេ»។ នេះជាអ្វីដែលលោក បារ៉ាក់ អូបាម៉ា តែងលើកឡើងក្នុងពេលដែលលោកជួយឃោសនាបោះឆ្នោតឲ្យលោកស្រី ហ៊ីឡារី គ្លីនតុន និងពេលដែលលោកឆ្លើយតបទៅកាន់អ្នកកាសែតមុនបោះឆ្នោត។

ចំណែកលោក ដូណាល់ ត្រាំ ឯណោះវិញក៏មិនណយដែរ។ លោកចំណាយពេលយ៉ាងច្រើនទិតៀនរដ្ឋបាលលោក បារ៉ាក់ អូបាម៉ា ឥតមានសំចៃមាត់ឡើយ។ លោកហ៊ានរហូតដល់ចោទលោក បារ៉ាក់ អូបាម៉ា មិនមែនកើតនៅអាមេរិកនិង ជាអ្នកបង្កើតក្រុមភេរវជនរដ្ឋឥស្លាមថែមទៀតផង។

ប៉ុន្តែគ្រប់យ៉ាងប្រែប្រួល ក្រោយលទ្ធផលបោះឆ្នោតថ្ងៃ ៨ វិច្ឆិកា បង្ហាញថា លោក ដូណាល់ ត្រាំ ឈ្នះឆ្នោត។ អ្នកទាំងពីរត្រូវចាប់ដៃគ្នា និងអង្គុយជជែកគ្នាក្នុងនាមជាប្រធានាធិបតី ដែលម្នាក់ត្រៀមចេញនិងម្នាក់ត្រៀមចូលកាន់តំណែងថែមទៀត។

ក្រោយដឹងថា លោក ដូណាល់ ត្រាំ ជាប់ឆ្នោតភ្លាម លោក បារ៉ាក់ អូបាម៉ា បានទូរសព្ទទៅសាទរនិងអញ្ជើញលោក ដូណាល់ ត្រាំ មកពិភាក្សាគ្នាពីការផ្ទេរអំណាចនៅការិយាល័យពងក្រពើនៅថ្ងៃព្រហស្បតិ៍ទី ១០ វិច្ឆិកា។

១.ជំនួបលើដំបូងប្រព្រឹត្តទៅដោយរលូននិងប្រសើរបំផុត

លោក អូបាម៉ា ចំណាយពេលវេលារហូតដល់ ៩០ នាទីដើម្បីជជែកជាមួយលោក ដូណាល់ ត្រាំ ដោយលោកត្រូវនិយាយរឿងផ្ទេរអំណាចផង និងបញ្ហាគោលនយោបាយអាមេរិកផង មុនពេលលោក ដូណាល់ ត្រាំ ស្បថចូលកាន់តំណែង។

ទោះបី វាជំនួបលើកដំបូងរវាងអ្នកទាំងពីរ ក្រោយលោក ដូណាល់ ត្រាំជាប់ឆ្នោតក៏ដោយ ទីភ្នាក់ងារព័ត៌មាន AFP ស្រង់សម្តីមន្ត្រីសេតវិមានថា ជំនួបទ្វេភាគីនេះធ្វើឡើងយ៉ាងរលូននិងល្អបំផុតផងដែរ។

ក្នុងជំនួបនោះ លោក បារ៉ាក់ អូបាម៉ា បានថ្លែងចំពោះមុខលោក ដូណាល់ ត្រាំ ថា៖« វាជារឿងសំខាន់សម្រាប់យើងគ្រប់គ្នា ដែលត្រូវសាមគ្គីគ្នា និងធ្វើការរួមគ្នា ក៏ដូចជាដោះស្រាយបញ្ហាដែលយើងទាំងអស់គ្នាប្រឈម ទោះជាយើងមាននិន្នាការនយោបាយបែបណា ឬមកពីបក្សណាក៏ដោយ»។

លោកបានបន្តប្រាប់លោក ដូណាល់ ត្រាំ ថា រដ្ឋបាលរបស់លោកនឹងធ្វើគ្រប់យ៉ាងដែលអាចជួយឲ្យលោកដូណាល់ ត្រាំ ទទួលជោគជ័យក្នុងការដឹកនាំប្រទេសព្រោះអាមេរិកនឹងជោគជ័យដែរ។

២. ដូណាល់ ត្រាំ ហៅ អូបាម៉ាថាជា«បុរសល្អ »

ក្រោយលោក អូបាម៉ា និយាយចប់ លោក ដូណាល់ ត្រាំចាប់ផ្តើមនិយាយម្តង។ លោក ដូណាល់ ត្រាំ ខុសប្លែកពីសព្វមួយដង ដោយលោក ស្ងៀមស្ងាត់ជាងមុន ហើយលោកបានហៅលោក បារ៉ាក់ អូបាម៉ា ថាជាបុរសល្អម្នាក់ទៀត។

លោកថ្លែងថា៖« លោកប្រធានាធិបតី វាជាកិត្តិយសណាស់សម្រាប់ខ្ញុំដែលបានជជែកជាមួយលោក។ លោកជាបុរសម្នាក់ដ៏ល្អ»។

ពេលលោក ដូណាល់ត្រាំ ថ្លែងចប់ អ្នកទាំងពីរបានចាប់ដៃគ្នា ហើយលោក អូបាម៉ា ប្រាប់លោកដូណាល់ ត្រាំ កុំឆ្លើយសំណួរអ្នកសារព័ត៌មានឲ្យសោះ។ អាចថា អ្នកទាំងពីរបានត្រៀមលក្ខណៈរួចរាល់ហើយដើម្បីផ្ទេរនិងទទួលតំណែងដើម្បីដឹកនាំប្រទេសបន្តនៅថ្ងៃ ២០ មករាឆ្នាំ ២០១៧។

ប៉ុន្តែ ទោះជាមានការទទួលស្គាល់ពីជ័យជម្នះរបស់លោក ដូណាល់ ត្រាំ ក៏ដោយ គេឃើញមានចលនាបាតុកម្មប្រឆាំងអនាគតប្រធានាធិបតីអាមេរិកលោក ដូណាល់ ត្រាំ ដែរ។ វាកើតឡើងកើតឡើងនៅទីក្រុងជាច្រើនទូទាំងសហរដ្ឋអាមេរិក រួមទាំងរដ្ឋធានីវ៉ាស៊ីនតោនផង។ ពួកគេកាន់បដាដែលសរសេរថា លោក ដូណាល់ ត្រាំ មិនមែនជាប្រធានាធិបតីរបស់អាមេរិកឡើយ។

៣.លោក អូបាម៉ា រៀបរាប់ពីបញ្ហាជាច្រើនរួមទាំងវិបត្តិពិភពលោកប្រាប់ ដូណាល់ ត្រាំ

ក្រោយបញ្ចប់កិច្ចពិភាក្សា មន្ត្រីសេតវិមានបានប្រាប់អ្នកសារព័ត៌មានថា លោក បារ៉ាក់ អូបាម៉ា បានឆ្លៀតឱកាសរៀបរាប់ប្រាប់លោក ដូណាល់ ត្រាំ ពីបញ្ហាជាច្រើនដែលមានទាំងបញ្ហានយោបាយក្នុងស្រុកនិងបញ្ហាពិភពលោក។ បញ្ហាសុខាភិបាល, សេដ្ឋកិច្ច, ការងារ ពាណិជ្ជកម្មនិងសន្តិសុខអន្តរជាតិសុទ្ធតែជាប្រធានបទដែលលោក អូបាម៉ា លើកឡើង។

ប្រធានាធិបតីជិតផុតអាណត្តិរូបនេះ ក៏រៀបរាប់សង្ខេបពីដំណើរទស្សនកិច្ចរបស់លោក ទៅកាន់ប្រទេស អាល្លឺម៉ង់,ក្រិក និងប្រទេសប៉េរូផងដែរ។ ការរៀបរាប់ប្រាប់ពីបញ្ហានេះ ជាការត្រៀមលក្ខណៈមួយ ដើម្បីជួយឲ្យប្រធានាធិបតីថ្មីយល់ដឹងពីកិច្ចការទាំងអស់ មុនស្បថចូលកាន់តំណែងនោះ៕