ពីនេះ ពីនោះ
មន្ត្រីល្អអាចធ្វើឲ្យមានច្បាប់ល្អ ប៉ុន្តែច្បាប់ល្អ មិនប្រាកដថាអាចធ្វើឲ្យមានមន្ត្រីល្អឡើយ
×![]()
ដោយ: ថ្មីៗ
ភ្នំពេញ៖ សង្គមមានប្រព័ន្ធច្បាប់ គ្រប់គ្រង ដែលធានាបានយុត្តិធម៌ គឺជាសេចក្ដីត្រូវការរបស់ប្រជាពលរដ្ឋស្ទើរគ្រប់ៗរូប។ ចំណែកបច្ចុប្បន្ននេះ មានការរិះគន់ថាច្បាប់នៅក្នុងប្រទេស មិនល្អ អ្នកខ្លះថាល្អហើយ នៅខ្វះតែការអនុវត្តជាក់ស្ដែង ដែលមិនទាន់បានគ្រប់ជ្រុងជ្រោយ។ តែទោះជាយ៉ាងណា សង្គមមួយមានច្បាប់ល្អប៉ុណ្ណាក៏ដោយ ក៏មិនប្រាកដថា មន្ត្រីដែលអនុវត្តច្បាប់ទាំងអស់គឺជាបុគ្គលល្អ ត្រឹមត្រូវនោះដែរ។ 
ការអះអាងផ្សេងៗគ្នាទៅលើច្បាប់ប្រទេស គឺជាផ្នែកមួយដ៏សំខាន់ ឈានទៅរកការកែប្រែចំណុចខ្វះខាត់របស់ច្បាប់ ដើម្បីឲ្យមានគ្រប់លក្ខខណ្ឌ ដែលធានាបានភាពត្រឹមត្រូវក្នុងការអនុវត្ត។ យ៉ាងណាក្នុងស្ថានភាពជាក់ស្ដែងរបស់ប្រទេស គេអាចនិយាយបានថា ច្បាប់គ្រប់គ្រងសង្គមបច្ចុប្បន្ន កំពុងឈានទៅដល់ដំណាក់កាលមួយដែលល្អប្រសើហើយ។ ទោះបីមានច្បាប់ត្រូវខ្លះ ខុសខ្លះ ប៉ុន្តែអាចយកមកធ្វើការអនុវត្តបាន។
ដ្បិតថា គ្មានអ្នកណាអាចយល់ច្បាស់ពីច្បាប់ក្រៅពីអ្នកធ្វើការពាក់ព័ន្ធ ប៉ុន្តែគេអាចដឹងថា ច្បាប់មួយដែលល្អគឺអាស្រ័យទៅលើប្រសិទ្ធភាពនៃការប្រតិបត្តិជាក់ស្ដែង ថាបានផ្ដល់យុត្ដិធម៌បានកម្រិតណា។ បន្ថែមពីនោះគឺអាស្រ័យទៅភ្នាក់ងារអនុវត្តច្បាប់ផ្ទាល់តែម្ដង។ ព្រោះប្រសិនបើជាមន្ត្រីអាក្រក់ ទោះច្បាប់ល្អ ក៏ប្រសិទ្ធផល អាចមានបញ្ហាសម្អៀងជាមិនខាន។
ដោយឡែក ទោះបីរដ្ឋបង្កើតច្បាប់បានល្អកម្រិតណាក៏ដោយ ប្រសិនបើសមត្ថភាពរបស់ស្ថាប័ន សមត្ថភាពមន្ត្រីអនុវត្តច្បាប់ ឥរិយាបថអ្នកអនុវត្តច្បាប់ ទង្វើមន្ត្រីអនុវត្តច្បាប់ មិនបានចាត់ទុកយុត្តិធម៌ជាកត្តាចម្បង ក៏មិនអាចឲ្យគេមើលឃើញថា ជាច្បាប់ល្អបានដែរ។ ច្បាប់ គឺវាគ្រាន់តែជាសំណងឃ្លា ដែលគេតាក់តែងឡើងលើក្រដាស់ អាចអាន អាចសរសេរ អាចនិយាយបានគ្រប់ទីកន្លែង គ្រប់ពេលវេលា។ ប៉ុន្តែការអាន ការសរសេរ ការនិយាយទាំងនោះមិនបានបញ្ជាក់ពីចំណុចខ្លាំងរបស់ច្បាប់ទេ។
ហេតុនេះ ការព្យាយាមគិតពិចារណា អំពីប្រសិទ្ធភាពនៃការប្រតិបត្តិ និងការកែប្រែសមត្ថភាពស្ថាប័ន មធ្យោបាយអនុវត្តច្បាប់ សមត្ថភាពមន្ត្រី ឆន្ទៈស្នេហាយុត្តិធម៌ មនសិការឯករាជ្យរបស់មន្ត្រី គឺជាកត្ដាសំខាន់បន្ទាប់ដើម្បីបញ្ជាក់ថា ច្បាប់នោះគឺពិតជាល្អពិតប្រាកដមែន។ ច្បាប់ល្អត្រូវការមន្ត្រីល្អអនុវត្តទើបធានាបានយុត្តិធម៌។ ដោយឡែកមន្ត្រីមិនល្អមកអនុវត្តច្បាប់ល្អ គឺមិនប្រាកដថា អាចទទួលបានយុត្តិធម៌នោះទេ។ ហេតុនេះហើយ មន្ត្រីល្អអាចធ្វើឲ្យមានច្បាប់ល្អ ប៉ុន្តែច្បាប់ល្អ មិនប្រាកដថាអាចធ្វើឲ្យមានមន្ត្រីល្អឡើយ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
