ជាតិ
លោក គៀត ច័ន្ទថារិទ្ធ៖ សន្តិសុខបុណ្យអុំទូកថ្ងៃទី១ មិនមានបញ្ហាធំគួរឲ្យកត់សម្គាល់
× ភ្នំពេញ៖ ការការពារសន្តិសុខ សុវត្ថិភាព របស់ប្រជាពលរដ្ឋនៅក្នុងពិធីបុណ្យអុំទូកថ្ងៃទី១ឆ្នាំនេះ មិនមានហេតុការណ៍ធំដុំកើតឡើង គួរឲ្យកត់សម្គាល់នោះទេ ទោះបីមានករណីចោរឆក់កើតឡើងតិចតួចក៏ដោយ។ នេះជាការបញ្ជាក់របស់ លោក គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិ ។ បើតាម អ្នកនាំពាក្យរូបនេះ ករណីចោឆក់ កើតឡើងតែ៣ករណីប៉ុណ្ណោះ ក្នុងបុណ្យអុំទូកថ្ងៃទី១ ។
លោក គៀត ច័ន្ទថារិទ្ធ ថ្លែងប្រាប់សារព័ត៌មានថ្មីៗថា នៅក្នុងថ្ងៃទី១ នៃព្រះរាជពិធីបុណ្យអុំទូក នៅរាជធានីភ្នំពេញ កើតមានករណីចោរឆក់កាបូប និងទូរស័ព្ទចំនួន ៣ករណី ប៉ុន្តែត្រូវកម្លាំងសមត្ថកិច្ចចាប់ខ្លួនជនសង្ស័យបាន២នាក់ ស្មើ២ករណី។
អ្នកនាំពាក្យអគ្គស្នងការដ្ឋាននគរបាលជាតិរូបនេះ លើកឡើងថា ពិធីបុណ្យអុំទូកថ្ងៃទី១នេះ ប្រព្រឹត្តទៅបានល្អ ព្រោះមានការរៀបចំទុកជាមុនលើផ្នែកសន្តិសុខ និងការយល់ដឹងរបស់ពលរដ្ឋ។ «យើងគិតគូរ រៀបចំមុនបានល្អ ហើយយើងផ្សព្វផ្សាយទៅធ្វើឲ្យពលរដ្ឋប្រយ័ត្នប្រយែង និងចូលរួម ដូច្នេះធ្វើឲ្យដំណើរការបានល្អ»។ នេះជាការជាបញ្ជាក់របស់ លោក គៀត ច័ន្ទថារិទ្ធ ។
លោក គៀត ច័ន្ទថារិទ្ធ អះអាងថា កម្លាំងនគរបាលប្ដេជ្ញាការពារសន្តិសុខក្នុងអំឡុងពិធីបុណ្យអុំទូកទាំងបីថ្ងៃឲ្យបានល្អបំផុត។ លោកប្រាប់ដូច្នេះថា៖«ខ្ញុំគិតថា សន្តិសុខនឹងមិនមានបញ្ហាអ្វីចោទទេ។ ទោះយ៉ាងណា យើងប្ដេជ្ញាចិត្តការពារឲ្យខាងតែបាន»៕
Tag:
អុំទូក
សន្តិសុខ
គៀត ច័ន្ទថារិទ្ធ
© រក្សាសិទ្ធិដោយ thmeythmey.com