ជាតិ
ក្រសួងបរិស្ថាន រៀបចំកម្មវិធីប្រកួតរូបថត«សម្រស់ធម្មជាតិ និងបរិស្ថាន»
× ភ្នំពេញ៖ ក្រសួងបរិស្ថាន នឹងរៀបចំកម្មវិធីប្រកួតរូបថត ក្រោមប្រធានបទ «សម្រស់ធម្មជាតិ និងបរិស្ថាន» ។ កម្មវិធីនេះ ជាកម្មវិធីដែលបង្ហាញពីសម្រស់ធម្មជាតិដ៏ស្រស់ស្អាត និងលើកកម្ពស់បរិស្ថានល្អរបស់ប្រទេសកម្ពុជា ដែលនឹងចាប់ផ្ដើមពីថ្ងៃទី ០៧ ដល់ ៣០ ខែវិច្ឆិកា ឆ្នាំ២០១៦។ នេះបើតាមទំព័រហ្វេសប៊ុកផ្លូវការរបស់ក្រសួងបរិស្ថាន។
ការប្រកួតនេះ រៀបចំឡើងក្នុងគោលបំណង លើកកម្ពស់ការអប់រំផ្សព្វផ្សាយ តាមរយៈសកម្មភាព ប្រកួតប្រជែង និងពិព័រណ៌រូបភាព ទាក់ទងនឹងបរិស្ថានបៃតង ជុំវិញខ្លួនប្រចាំថ្ងៃនៅក្នុងតំបន់ទៅទីក្រុង ជាពិសេស ជំរុញលើកទឹកចិត្តដល់អ្នកចូលចិត្តថតរូប និងយុវវ័យ ចូលរួមចំណែកផ្សព្វផ្សាយបរិស្ថានតាមរយៈការចែករំលែករូបភាព ដែលបង្កប់នូវសារអប់រំទាក់ទងនឹងបរិស្ថាន។ ម្យ៉ាងទៀតជំរុញ និងលើកទឹកចិត្ត ដល់វិស័យឯកជនក្នុងស្រុក ឲ្យបានចូលរួមចំណែកថែរក្សាបរិស្ថាន និងទទួលខុសត្រូវ ទាក់ទងនឹងវិស័យបរិស្ថាន នៅក្របខណ្ឌការងារឯកជន។
លក្ខខណ្ឌនៃការចូលរួមប្រកួត បេក្ខជនត្រូវមានអាយុចន្លោះពី ១៨ឆ្នាំ ដល់៥០ឆ្នាំ ជាជនជាតិខ្មែរ និងបរទេស។ ចំពោះរូបភាពទាំងអស់ ជាប្រភេទ JPG ដែលមានទំហំចាប់ពី ៥ ដល់ ៨មេហ្កាប៉ៃ រីឯរូបថតដែលដាក់ចូលរួមប្រកួត អាចកែសម្រួលលើរូបភាពដើម បានតែបន្តិចបន្តួចប៉ុណ្ណោះ។ ជាមួយគ្នានេះ រូបថតទាំងអស់ត្រូវជាស្នាដៃផ្ទាល់ខ្លួន ហើយជារូបថតនៅក្នុងប្រទេសកម្ពុជា ក្នុងឆ្នាំ២០១៦ ។ បន្ថែមលើនេះ រូបថតដែលចូលរួមមិនត្រូវថតចេញពីកាមេរ៉ាទូរស័ព្ទ GoPro ឬ Drone និងមិនអនុញ្ញាតឲ្យបង្ហាញ Logo ឬ water mark នោះទេ ហើយរូបថតដែលដាក់ប្រកួត កម្មវិធីសូមសិទ្ធិប្រើប្រាស់ជាផលប្រយោជន៍កម្មវិធី និងស្ថាប័នពាក់ព័ន្ធ។
សូមបញ្ជាក់ថា បើបេក្ខជនណាមានចំណាប់អារម្មណ៍អាច ផ្ញើស្នាដៃរូបថតរបស់ខ្លួន ដោយភ្ជាប់ជាមួយឈ្មោះ លេខទូរសព្ទ និងការពណ៌នារូបថតដោយខ្លី តាមលេខទូរស័ព្ទ ០៩៦ ៥៥៧ ៧៧៧៧ និងតាមអ៊ីម៉ែល [email protected]។
បេក្ខជនចួលរួមដែលជាប់ជ័យលាភីលេខ១ នឹងទទួលបានរង្វាន់ Camera Canon 6D Body ១គ្រឿង, ជ័យលាភីលេខ២ ទទួលបានរង្វាន់ Camera Canon 80D Body ១គ្រឿង និងជ័យលាភីលេខ៣ ទទួលបានរង្វាន់ Camera Canon 70D Body ១គ្រឿង។ សម្រាប់ជ័យលាភីទាំងអស់នឹងទទួលបានលិខិតបញ្ជាក់ចំណាត់ថ្នាក់ ពីក្រសួងបរិស្ថាន៕
© រក្សាសិទ្ធិដោយ thmeythmey.com