បញ្ហារាប់សែនករណី កំពុងកើតឡើង ខណៈការចុះឈ្មោះបោះឆ្នោត កាន់តែជិតបញ្ចប់

ជាតិ

បញ្ហារាប់សែនករណី កំពុងកើតឡើង ខណៈការចុះឈ្មោះបោះឆ្នោត កាន់តែជិតបញ្ចប់

15, Nov 2016 , 6:19 pm

រូបភាព

ដោយ: ម៉ៅ សុផា

ភ្នំពេញ៖ បញ្ហាមិនតិចជាង២សែនករណីទេ ដែលគ.ជ.ប កំពុងជួបប្រទះ ក្នុងដំណើរការនៃការចុះឈ្មោះបោះឆ្នោត កន្លងមកនេះ។ អ្នកជំនាញខាងការបោះឆ្នោតនៅកម្ពុជា ចាប់ផ្តើមព្រួយបារម្ភកាន់តែខ្លាំង ចំពោះបញ្ហាទាំងនោះ ខណៈកាលបរិច្ឆេទនៃការបិទបញ្ជីចុះឈ្មោះបោះឆ្នោត កាន់តែខិតជិតមកដល់។ តែគ.ជ.ប អះអាងថា នឹងខិតខំដោះស្រាយបញ្ហាទាំងនោះ ឲ្យទាន់ពេលវេលា។

បើផ្នែកតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលបានចុះផ្សាយកាលពីប៉ុន្មានថ្ងៃមុន បញ្ហាជាច្រើន ដែលមានរហូតជាង២សែនករណី បានកើតឡើង ក្នុងអំឡុងពេលនៃការចុះឈ្មោះបោះឆ្នោត។ បញ្ហាទាំងអស់នេះ បានកើតឡើង ខណៈការចុះឈ្មោះបោះឆ្នោត នឹងត្រូវបញ្ចប់ នៅថ្ងៃទី២៩ ខែវិច្ឆិកា ឆ្នាំ២០១៦។

បញ្ហាទាំងនោះ មានដូចជា កំហុសផ្នែកទិន្នន័យជាង២សែនករណី, កំហុសក្នុងការកំណត់ទីតាំងការិយាល័យចុះឈ្មោះបោះឆ្នោត ជិត៤រយករណី និងឈ្មោះស្ទួនរបស់អ្នកចុះឈ្មោះបោះឆ្នោត ជិត២ម៉ឺនករណី។ ក្រៅពីបញ្ហាខាងលើ គ.ជ.ប ក៏នៅជួបបញ្ហាផ្សេងៗទៀតដែរ ដូចជា កង្វះធនធានមនុស្ស, ការខូចខាតសម្ភារបច្ចេកទេសក្នុងអំឡុងនៃការចុះឈ្មោះបោះឆ្នោត និងភាពយឺតយ៉ាវ ក្នុងការបញ្ជូនទិន្នន័យពីឃុំ-សង្កាត់ ទៅកាន់ គ.ជ.ប ជាដើម។ នេះបើតាមសេចក្តីប្រកាសព័ត៌មានដដែលរបស់គ.ជ.ប។

នាយកប្រតិបត្តិនៃអង្គការនិកហ្វិក លោក សម សុគន្ធាមី ដែលជាអ្នកឃ្លាំមើលការបោះឆ្នោតនៅកម្ពុជា បានលើកឡើងថា បញ្ហាខាងលើ អាចធ្វើឲ្យបញ្ជីឈ្មោះបោះឆ្នោត មិនមាន «គុណភាព»។ លោកពន្យល់ថា បញ្ជីឈ្មោះបោះឆ្នោត ដែលគ្មានគុណភាព គឺជាបញ្ជីឈ្មោះបោះឆ្នោត ដែលមិនមានភាពសុក្រឹត ហើយប្រជាពលរដ្ឋដែលទៅចុះឈ្មោះបោះឆ្នោត នឹងបាត់បង់ទំនុកចិត្ត ដោយសារតែភាពមិនប្រក្រតីទាំងនោះ។

លោក សម សុគន្ធាមី អះអាងថា ប្រសិនបើ គ.ជ.ប មិនអាចដោះស្រាយបញ្ហាទាំងនោះ ឲ្យបានទាន់ពេលវេលាទេ ការបោះឆ្នោតនាពេលខាងមុខ ក៏អាចមានបញ្ហាដែរ។ លោក បន្តថា ប្រជាពលរដ្ឋ អាចនឹងតវ៉ាក្នុងអំឡុងនៃការបោះឆ្នោត ឬក៏ប្រឆាំងនឹងលទ្ធផលបោះឆ្នោត ដោយសារតែពួកគេ មិនទុកចិត្តលើបញ្ជីឈ្មោះបោះឆ្នោត តែម្តង។

អ្នកជំនាញខាងបោះឆ្នោតរូបនេះសង្កត់ធ្ងន់ៗថា៖«បញ្ជីឈ្មោះថ្មីហ្នឹង អាចនឹងជួបបញ្ហា បើគ.ជ.ប ដោះស្រាយមិនទាន់។ បើបញ្ជីឈ្មោះបោះឆ្នោត មានបញ្ហាច្រើន ឬគ្មានគុណភាព ការបោះឆ្នោត ក៏អាចមានបញ្ហាដែរ។ នេះ ជារឿងដែលខ្ញុំព្រួយបារម្ភ ខ្លាំងមែនទែន»។

លោក សម សុគន្ធាមី បានបង្ហាញពីកត្តាធំៗមួយចំនួន ដែលបណ្តាលឲ្យគ.ជ.ប ជួបបញ្ហាយ៉ាងច្រើនបែបនេះ។ លោក រៀបរាប់លម្អិតថា បញ្ហាចម្បង គឺដោយសារតែ គ.ជ.ប មានពេលវេលាខ្លីពេក ក្នុងការរៀបចំដំណើការចុះឈ្មោះបោះឆោ្នត។ លោក បញ្ជាក់ថា មុនការចុះឈ្មោះបោះឆ្នោត មកដល់ គ.ជ.ប មានពេលវេលាតិចតួចប៉ុណ្ណោះ ក្នុងការបណ្តុះបណ្តាលមន្ត្រីចុះឈ្មោះបោះឆ្នោត។

ជាងនេះទៀត ប្រទេសដែលមានជាម្ចាស់ជំនួយ ក៏មានភាពយឺតយ៉ាវ ក្នុងការផ្តល់ឧបករណ៍បច្ចេកទេស ទៅកាន់គ.ជ.ប ថែមទៀត។ នេះជាការបន្ថែមរបស់លោក សម សុគន្ធាមី ដដែល ហើយបន្ទាប់មក លោកក៏បន្តថា កង្វះធនធានមនុស្ស ក៏ជាផ្នែកមួយ ដែលធ្វើឲ្យគ.ជ.ប ជួបការលំបាកផងដែរ។

ប្រធានអង្គការ ដែលជំនាញខាងការបោះឆ្នោតរូបនេះ យល់ឃើញថា ការចុះឈ្មោះបោះឆ្នោតលើកនេះ គឺធ្វើឡើងតាមប្រព័ន្ធកំព្យូទ័រ ដែលជាប្រព័ន្ធបែបទំនើប ដូច្នេះ ត្រូវទាមទារឲ្យគ.ជ.ប មានអ្នកជំនាញ និងគ្រឿងបច្ចេកទេស រួមទាំងពេលវេលាគ្រប់គ្រាន់ ក្នុងការបណ្តុះបណ្តាលដល់មន្ត្រីចុះឈ្មោះបោះឆ្នោត។

ផ្ទុយពីលោក សម សុគន្ធាមី លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) ហាក់ដូចជាជឿជាក់លើគ.ជ.ប ថ្មី ថានឹងមានសមត្ថភាពគ្រប់គ្រាន់ ក្នុងការដោះស្រាយបញ្ហាខាងលើ ទាន់ពេលវេលា មុនការចុះឈ្មោះបោះឆ្នោត ត្រូវបានបញ្ចប់។ លោក សង្កត់ធ្ងន់ថា វា ជាចំណុចវិជ្ជមានមួយ ដែលគ.ជ.ប អាចដឹងគ្រប់ជ្រុងជ្រោយ ចំពោះបញ្ហាទាំងឡាយ។

លោក គល់ បញ្ញា បញ្ជាក់ដូច្នេះ៖«ខ្ញុំយល់ថា មិនមានបញ្ហាអ្វីទេ។ បញ្ហាច្រើនមែន តែគ.ជ.ប អាចក្តាប់បាន ហើយអាចដឹងថា មានបញ្ហាប៉ុន្មានកើតឡើង។ អ៊ីចឹងខ្ញុំជឿថា គាត់ (គ.ជ.ប) អាចដោះស្រាយបាន»។

ចំណែកឯ លោក ហង្ស ពុទ្ធា អ្នកនាំពាក្យរបស់គ.ជ.ប អះអាងថា រាល់បញ្ហាទាំងនោះ មិនអាចប៉ះពាល់ដល់ដំណើរការនៃការចុះឈ្មោះបោះឆ្នោតទាំងមូលបានទេ។ លោក ប្រាប់ថា គ.ជ.ប កំពុងតែប្រឹងប្រែងដោះស្រាយបញ្ហាទាំងនោះ ជាបន្តបន្ទាប់។

អ្នកនាំពាក្យរបស់គ.ជ.ប រូបនេះ បន្តទៀតថា គ.ជ.ប នៅតែខិតខំធ្វើយ៉ាងណា ដើម្បីរៀបចំបញ្ជីឈ្មោះបោះឆ្នោតថ្មី ឲ្យបានជោគជ័យ។ លោក បញ្ជាក់ដូច្នេះថា៖«មិនមានបញ្ហាអ្វីទេ ហើយគ.ជ.ប ក៏មិនព្រួយបារម្ភដែរ។ ទោះបីជាបញ្ហាច្រើនមែន តែយើងអាចក្តាប់បានទាំងអស់ ហើយនឹងព្យាយាមដោះស្រាយឲ្យទាន់ពេលវេលា»។

សូមបញ្ជាក់បន្តិចថា ការចុះឈ្មោះបោះឆ្នោត បានដំណើរការមក តាំងពីថ្ងៃទី១ ខែកញ្ញា ឆ្នាំ២០១៦មកម្ល៉េះ។ រហូតមកដល់ពេលនេះ ប្រជាពលរដ្ឋជាង៧លាននាក់ហើយ បានទៅចុះឈ្មោះបោះឆ្នោត៕