ពីនេះ ពីនោះ
យុវជន​៖ «​ស្នេហា​ជាតិ​» ភាសា​និយាយ​ច្រើនជាង​ប្រតិបត្តិ​ជាក់ស្ដែង​ដើម្បី «​ជាតិ​»
17, Nov 2016 , 8:19 am        
រូបភាព
ដោយ: ថ្មីៗ
​ភ្នំពេញ​៖ មនុស្ស​ស្ទើ​គ្រប់គ្នា​តែងតែ​អះអាងថា​«​ខ្លួន​ស្នេហា​ជាតិ​» ស្រឡាញ់​ជាតិ ចង់​ជួយ​ជាតិ​ណាស់​។ ចំណុច​នេះ ក្នុងសង្គម​បច្ចុប្បន្ន មាន​សំឡេង​ចេញពី​យុវជន​ស្នង​ឫស្សី​ច្រើន​ដែល​បាន​និយាយ​ប្រចាំថ្ងៃ ទាំង​នៅក្នុង​ទីសាធារណៈ សាលា វេទិកាសាធារណៈ សិក្ខាសាលា​នានា​ទាក់ទង​បញ្ហា​សង្គម និង​រូបភាព​ជាច្រើន​ផ្សេងទៀត​។

 


​ជាតិ​មួយ គឺ​ត្រូវមាន​លក្ខណៈ​រួមមួយ​ចំនួន​ដូចជា ទឹកដី ប្រជាជន អធិបតេយ្យភាព ស្ថាប័ន​គ្រប់គ្រង​រដ្ឋ​(​រដ្ឋាភិបាល​) មាន​សេដ្ឋកិច្ច មាន​នយោបាយ និង​វប្បធម៌ អរិយធម៌​ជាដើម​។​ល​។ ក្នុងន័យ​បែបនេះ ជន​ដែល​ស្នេហា​ជាតិ មិនមែន​គ្រាន់តែ​បានបង្ហាញ​ជា​សកម្មភាព​ថា​ខ្លួន​ជាម​នុស្ស​ស្នេហា​ជាតិ​នោះទេ ប៉ុន្តែ​ទាំង​ខួរក្បាល របស់គេ​គឺ​ត្រូវ​ប្រកបដោយ សុ​ឆន្ទៈ ដើម្បី​ជាតិ បុព្វេ​ហេតុ​ជាតិ  ដែល​ស្ដែងឡើង​តាមរយៈ​សមត្ថភាព  គុណធម៌ និង​មនសិការ​ក្នុងនាម​ជាម​នុស្ស​។ ផ្ទុយ​មកវិញ​បើ​សកម្មភាព​នាំ​ឲ្យ​ជាតិ​លិចលង់ អសកម្ម​ភាព​ពុំ​អាច​ហៅថា អ្នកស្នេហាជាតិ​បានទេ​។

​ហេតុនេះ បុគ្គល​ម្នាក់​ដែល​ចាត់ទុកថា​ស្នេហា​ជាតិ គួរណា​ស់មាន​លក្ខណៈសម្បត្តិ​ជា​បុគ្គល​ដែល​ហ៊ាន​លះបង់​ផ្នែក​ណាមួយ​ក្នុង​ជីវិត​របស់ខ្លួន​ដើម្បី​ជាតិ ប្រយោជន៍​ជាតិ ប្រជាជន​ទូទៅ​។ បន្ថែម​ពីនេះ​គឺជា​បុគ្គល​ដែលមាន​សីលធម៌​ខ្ពស់​ស្រឡាញ់​កេរ្តិ៍ឈ្មោះ​, កិត្តិយស​,  និង​សេចក្ដីថ្លៃថ្នូរ​ជាជាង​ទ្រព្យសម្បត្តិ​របស់ខ្លួន​, មាន​វិចារណញ្ញាណ​គ្រប់គ្រាន់​ក្នុង​ការគិត​វិនិច្ឆ័យ​ពី​បញ្ហា​ជាតិ​។

​ចំណែក​ការងារ​ផ្សេងៗ​ទៀត​គឺ មិន​បំផ្លាញ​ជាតិ​ឯង ហើយ​ដាក់​ជាតិ​ខ្លួនឯង​ឲ្យ​នៅក្រោម​អាណានិគម​, សុខចិត្ត​ស្លាប់​ខ្លួន ដោយ​មិន​ព្រម​ឲ្យ​ជាតិ និង​ប្រជាជន ស្ថិតក្រោម​អំណាច​ជាតិ​សាសន៍​ដទៃ​។ តើ​អ្នក​អះអាងថា​ស្នេហា​ជាតិ យល់ថា​ខ្លួន​បាន​ត្រៀមខ្លួន​ធ្វើ​កិច្ចការ​នេះ​ទេ​? ឬមួយ​គ្រាន់តែ​និយាយ​?

​បន្ថែម​ពីនេះ គឺ​ប្រឹងប្រែង​ធ្វើ​ឲ្យ​ខ្លួនឯង​ក្លាយជា​ធនធាន​ដ៏​សំខាន់​សម្រាប់​សង្គម ទោះបី​មិនបាន​ធ្វើ​កិច្ច​ដែលមាន​ប្រយោជន៍​ធំធេង ប៉ុន្តែ​ឲ្យ​តែ​តាំងចិត្ត​ថា ខ្លួន​ត្រូវតែ​ចូលរួម​ក្នុង​ផ្នែក​ណា ហើយ​បំពេញ​ឲ្យ​បានល្អ នោះ​គឺជា​ជន​មាន​ប្រយោជន៍​សម្រាប់​ជាតិ​ហើយ​។ វា​គឺជា​រឿង​ដែល​គួរ​ឲ្យ​ខ្មាស់​ខ្លួនឯង​ណាស់ នៅពេលដែល​មនុស្ស​ម្នាក់​ស្រែកថា ខ្ញុំ​ស្នេហា​ជាតិ ខ្ញុំ​ចង់​ជួយ​ជាតិ ទាំង​ខ្លួនឯង​មិនបាន​ខិតខំ​ជួយ​ខ្លួនឯង​ឲ្យ​ក្លាយជា​មនុស្ស​ដែលមាន​ប្រយោជន៍​ជាមុន​។​

​ជារួម​ទៅ​ស្នេហា​ជាតិ អ្នកណា​ក៏​អាចនិយាយបាន​ដែរ ប៉ុន្តែ​អ្វីដែល​សំខាន់​គឺ​ការប្រតិបត្តិ​ជាក់ស្ដែង និង​គោលការណ៍​ផ្ទាល់​របស់​បុគ្គល​ម្នាក់ៗ ថា​តើ​អាច​អនុវត្តន​បាន​កម្រិតណា​? នោះ​ទើប​ជា​រឿង​ដែល​សំខាន់​។ ព្រោះថា ជាតិ​មួយ​មិន​ដើរទៅ​ចោល​បុគ្គល​គ្រប់គ្នា​នោះទេ ប៉ុន្តែ​មានតែ​បុគ្គល​ទេ​ដែល​ទៅ​ចោល​ជាតិ​។ ជាតិ​អាច​ចាំ​សម្ដី​បុគ្គល​និយាយ​ជានិច្ច​ប៉ុន្តែ​បុគ្គល​ទេ​ដែល​ភ្លេច​សម្ដី​ខ្លួនឯង​។ ជាតិ ចាំមើល​ការសន្យា​របស់​បុគ្គល​ជានិច្ច ប៉ុន្តែ​បុគ្គល​ទេ ដែល​សន្យា​ហើយ​មិន​ព្រមធ្វើ​៕  


© រក្សាសិទ្ធិដោយ thmeythmey.com