ជាតិ
កុមារកម្ពុជាភាគច្រើន បារម្ភពីសុវត្ថិភាពពួកគេនៅសាលារៀន រូបភាពពីហ្វេសប៊ុកក្រសួងអប់រំ យុវជន និងកីឡា
× កុមារនៅកម្ពុជា ៣ នាក់ ក្នុងចំណោម៤នាក់ បារម្ភពីសុវត្ថិភាពពួកគេនៅសាលារៀន។ យោងតាមលទ្ធផលនៃការអង្កេតជាសកលថ្មីមួយរបស់ក្រុមអង្គការជំនួយអន្តរជាតិឆាល់ហ្វាន កុមារកម្ពុជា បានឲ្យនិយមន័យថា សុវត្ថិភាពនៅសាលារៀន គឺជាកន្លែងដែលមិនមានហានិភ័យនៃការរំលោភបំពានផ្លូវកាយ ផ្លូវចិត្ត ឬអំពើហិង្សា។
យោងតាមរបាយការណ៍អង្កេតប្រចាំឆ្នាំលើកទី៧ ដែលមានឈ្មោះថា «សំឡេងតូច សុបិនធំ» របស់អង្គការ ChildFund កុមារ៧៦ភាគរយ ក្នុងចំណោម១០០ភាគរយ និយាយថាសាលារៀនពួកគេមានសុវត្ថិភាពតែពេលខ្លះប៉ុណ្ណោះ ខណៈ១៩ភាគរយទៀតនិយាយថាសាលារៀនពួកគេតែងតែមានសុវត្ថិភាព។
បើតាមសេចក្តីប្រកាសព័ត៌មានរបស់ ChildFund នៅថ្ងៃទី១៦វិច្ឆិកា ឆ្នាំនេះមានកុមារច្រើនជាង៦ពាន់នាក់ អាយុពី ១០ ដល់ ១២ ឆ្នាំ ក្នុងប្រទេសចំនួន៤១ បានចូលរួមការអង្កេត និងបានបង្ហាញពីភាពស្រដៀងគ្នា និងភាពខុសគ្នារវាងកុមារក្នុងប្រទេសកំពុងអភិវឌ្ឍន៍ និងប្រទេសអភិវឌ្ឍន៍ ក្នុងតំបន់ផ្សេងៗនៃពិភពលោក។ ពួកគេ បានកំណត់និយមន័យផ្សេងៗគ្នា អំពីសុវត្ថិភាពក្នុងសាលារៀន។ នៅកម្ពុជា កុមារ៧៤ភាគរយ និយាយថាសាលារៀនដែលមានសុវត្ថិភាព ជាកន្លែងដែលមិនមានហានិភ័យនៃការរំលោភបំពានផ្លូវកាយ ផ្លូវចិត្ត ឬអំពើហិង្សា។ កុមារី ស៊ីណា អាយុ១០ឆ្នាំ និយាយថា៖«សាលាដែលមានសុវត្ថិភាពជាសាលាដែលមិនមានការវាយតប់គ្នា»។ បន្ថែមពីនេះ កុមារ៤៥ភាគរយនៅកម្ពុជា និង ៣០ ភាគរយនៃកុមារនៅប្រទេសកំពុងអភិវឌ្ឍន៍នៅអាស៊ី រៀបរាប់ថា សាលារៀនមានសុវត្ថិភាព គឺមានអគារសិក្សា និងបរិស្ថានស្អាត។
របាយការណ៍នេះ ក៏បានបង្ហាញពីទស្សនៈ របស់កុមារពីការអប់រំ និងសុវត្ថិភាពសាលារៀនផងដែរ។ កុមារកម្ពុជា ៩០ភាគរយ និយាយថាដោយសារការអប់រំជួយឲ្យពួកគេទទួលបានការងារធ្វើល្អនៅពេលធំពេញ វ័យ។ កុមារី ស្រណាត អាយុ១១ឆ្នាំ និយាយថា៖«ព្រោះពេលមានចំណេះ ខ្ញុំអាចរកបានការងារថ្លៃថ្នូរ និងជួយឪពុកម្តាយខ្ញុំ»។
លោក ប្រាស្សាន វើម៉ា នាយកប្រចាំប្រទេសនៃអង្គការឆាលហ្វានកម្ពុជា និយាយថាទោះបីរស់នៅកន្លែងណាក៏ដោយ ក៏កុមារមើលឃើញពីតម្លៃអប់រំដូចគ្នា ប៉ុន្តែមិនអាចមើលរំលង ចំពោះការសិទ្ធិរៀនសូត្ររបស់ពួកគេ ក្នុងបរិយាកាសសុវត្ថិភាព និងភាពកក់ក្តៅ។
អង្គការឆាលហ្វានកម្ពុជា មិនត្រឹមតែកំណត់អាទិភាពទៅលើការទទួលបានការអប់រំរបស់កុមារគ្រប់រូប (កុមារី កុមារពិការ និងកុមារជនជាតិដើមភាគតិច) ប៉ុណ្ណោះទេ តែក៏បានធ្វើការជាដៃគូជាមួយអង្គការខេប ដើម្បីកែលម្អគុណភាពអប់រំនៅតាមតំបន់ជនបទផងដែរ។ លោក វើម៉ា បន្តថា៖«នៅតំបន់ជនបទតម្រូវការកែលម្អ និងជួលជុលអគារសិក្សា និងទំនើបកម្មវិធីសាស្ត្របង្រៀន មានតម្រូវការខ្ពស់»។
លោក វើម៉ា បន្តបញ្ជាក់ថា លទ្ធផលនៃការអង្កេតនេះ បញ្ជាក់ពីសារៈសំខាន់ក្នុងការបង្កើតនូវបរិយាកាសរៀនសូត្រមួយ ដែលកុមារមិនត្រឹមតែមានអារម្មណ៍ថា មានសុវត្ថិភាព និងទទួលបានការការពារប៉ុណ្ណោះទេ ថែមទាំងមានការលើកទឹកចិត្ត និងផ្តល់ឱកាស ក្នុងការចូលរួមរៀនសូត្រទៀតផង៕
Tag:
អប់រំ
កុមារ
ChildFund Cambodia
© រក្សាសិទ្ធិដោយ thmeythmey.com